ពាក្យគន្លឹះចំនួន ២៦ ដែលត្រូវប្រើប្រាស់ក្នុងពិធីថ្វាយព្រះភ្លើងព្រះបរមសព សម្តេចព្រះមហាសង្ឃរាជ ទេព វង្ស

គណៈកម្មាធិការជាតិរៀបចំបុណ្យជាតិ-អន្ដរជាតិ និងក្រសួងធម្មការ និងសាសនា នឹងរៀបចំព្រះរាជពិធីថ្វាយព្រះភ្លើងព្រះបរមសព សម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជនៃព្រះរាជាណាចក្រកម្ពុជា នៅថ្ងៃទី​ ៣ ខែមិថុនា ឆ្នាំ ២០២៤ ខាងមុខនេះ។

ជាមួយគ្នានេះ ក្រសួងធម្មការ និងសាសនា បានស្រង់នូវពាក្យគន្លឹះចំនួន ២៦ ពាក្យ សម្រាប់ប្រើប្រាស់នៅ ក្នុងព្រះរាជពិធីថ្វាយព្រះភ្លើងដល់ព្រះបរមសព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក្យគន្លឹះទាំងនោះរួមមាន ១-ស្រពព្រះភក្ត្រ(ជម្រះមុខ) ២-ព្រះទីនាំងនាគរាជតម្កល់មញ្ជូសា ៣-ហែព្រះបរមសព ៤-ព្រះរាជពិធីដង្ហែរព្រះបរមសព ៥-ឆ្ពោះទៅព្រះមេរុ (ទីបញ្ចុះសព) ៦-តម្កល់ព្រះបរមឆាយាលក្ខណ៍ (តម្កល់រូបថត)៧-ព្រះទីនាំងរាជហង្សបុស្បុកតម្កល់ព្រះពុទ្ធរូប និងព្រះត្រៃបិដក ៨-ព្រះទីនាំងព្រះអភិធម្មមាតិកា (ទីអង្គុយសម្រាប់ព្រះសង្ឃអភិធម្ម) ៩-ព្រះមាតិកា គង់អមមញ្ជូសា ១០-ក្រុមព្រះញាតិព្រះបរមសព ១១-ព្រះសត្តប្បករណាភិធម្ម (បង្សុកូល) ១២-ថ្វាយព្រះរាជវន្ទនកិច្ច (ថ្វាយការគោរព) ១៣-ក្បួនហែព្រះបរមសព ១៤-ថ្វាយព្រះរាជកុសល។

១៥-រំកិលព្រះមញ្ជូសា (រំកិលមឈូស) ១៦-ស្វាគមន៍ថ្វាយព្រះពរ ១៧-ប្រថាប់ព្រះទីនាំងកៅអី នៅលើព្រះពន្លាកិត្តិយស (អង្គុយកៅអីលើវេទិកា) ១៨-ប្រទក្សិណព្រះបរមសព (ដើរព័ទ្ធជុំវិញបុគ្គលនៅជាខាងស្តាំដៃ)១៩-បីជុំព្រះមេរុ(បីជុំទីបញ្ចុះសព) ២០-ឧត្តរាព័ត៌(ដំណើរវិលទៅទិសខាងឆ្វេង)២១-ព្រះវិយោគកថា (សេចក្តីថ្លែងរៀបរាប់អំពីទុក្ខសោក និងការស្តាយ)២២-ព្រះជីវប្រវត្តិ ២៣-ព្រះសង្ឃមាតិកា(ព្រះសង្ឃគង់អមមឈូស) ២៤-កិច្ចបច្ឆាមរណៈ (ការគោរពចុងក្រោយ ឬធ្វើកិច្ចចុងក្រោយ) ២៥-សុំព្រះភ្លើង ២៦-ថ្វាយព្រះភ្លើងពីព្រះពន្លាជ័យ (កិច្ចថ្វាយព្រះភ្លើងពីវេទិកា)។

សម្តេចព្រះមហាសង្ឃរាជ ទេព វង្ស  នៅវេលាម៉ោង ១៧ និង ៤០ នាទីល្ងាច នាថ្ងៃទី ២៦ ខែកុម្ភៈ ឆ្នាំ ២០២៤ បានខ្យល់អស្សាស:បស្សាស:នៃសម្តេចជាអម្ចាស់ បានចេញពីព្រះកាយព្រះអង្គអស់សូន្យសុង សម្តេចជាអម្ចាស់ ទ្រង់យាងចូលទិវង្គតដោយស្ងប់ស្ងៀមក្នុងព្រះរាជដំណាក់វត្ត ឧណ្ណាលោម ក្នុងព្រះជន្ម ៩៣ ព្រះវស្សា៕

អត្ថបទ៖ ឡាយ សាមាន