ប្រវត្តិខ្លះៗពីលោក គួច ចំរើន ដែលនឹងត្រូវចូលកាន់តំណែងជាអភិបាលខេត្តកណ្តាលនៅព្រឹកថ្ងៃទី១​កក្កដានេះ

លោក គួច ចំរើន មានឋានន្តរស័ក្តិឧត្តមមន្ត្រីថ្នាក់លេខ១ ដែលមុននេះមានមុខតំណែងជាមន្ត្រីកងទ័ព ជាអភិបាលរងខណ្ឌចំការមន ជាអភិបាលខណ្ឌមានជយ័ ជាអភិបាលខណ្ឌដូនពេញ ជាអគ្គនាយករងរដ្ឋបាលក្រសួងមហាផ្ទៃ ជាអភិបាលខេត្តកំពង់ចាម និងជាអភិបាលខេត្តព្រះសីហនុ ត្រូវបានព្រះរាជក្រឹត្យចុះថ្ងៃទី២៤ ខែមិថុនា ឆ្នាំ២០២៤ត្រាស់បង្គាប់អោយធ្វើជាអភិបាលនៃគណៈអភិបាលខេត្តកណ្តាល។

លោក គួច ចំរើន កើតនៅថ្ងៃទី៤ ខែវិច្ឆិកា ឆ្នាំ១៩៧២ សញ្ជាតិខ្មែរ នៅភូមិតាពរ័លើ ឃុំពង្រក្រោម ស្រុកជីក្រែង ខេត្តសៀមរាប។

ក្រោយថ្ងៃរំដោះថ្ងៃ៧មករា ឆ្នាំ១៩៧៩ លោក គួច ចំរើន ដែលស្ថិតនៅក្នុងវ័យកុមារនៅឡើយ បានចូលរៀនថ្នាក់ដំបូងក្រោមផ្ទះមួយនៅក្នុងភូមិត្រាចថ្មី ឃុំកំពង់ក្តី ស្រុកជីក្រែង ខេត្តសៀមរាប។ ចូលដល់ថ្នាក់ទី២ បានទៅរៀននៅសាលាគំរូកំពង់ក្តី បន្ទាប់មកបានបន្តការសិក្សារហូតដល់ចប់ចំណេះដឹងទូទៅនៅសាលា១០មករាសៀមរាបនៅថ្ងៃទី១៨ ខែមិថុនាឆ្នាំ១៩៨៩។

នៅឆ្នាំ១៩៩០ លោក គួច ចំរើន បានចូលរៀននៅមហាវិទ្យាលយ័បច្ចេកទេសកងទ័ព ប្រទេសវៀតណាម ក្រោយមកនៅថ្ងៃ២៨ ខែមីនា ឆ្នាំ១៩៩៣ បានសិក្សាបន្តនៅមហាវិទ្យាលយ័និតិសាស្ត្រ និងវិទ្យាសាស្ត្រសេដ្ឋកិច្ច ដែលបញ្ចប់នៅថ្ងៃទី២២ ខែកក្កដា ឆ្នាំ១៩៩៧ ដោយទទួលបានបរិញ្ញាបត្រវិទ្យាសាស្ត្រសេដ្ឋកិច្ច។ នៅថ្ងៃទី០១ ខែតុលា ឆ្នាំ២០០៤ បានចូលសិក្សានៅសាកលវិទ្យាល័យនិតិសាស្ត្រ និងវិទ្យាសាស្ត្រសេដ្ឋកិច្ច ទទួលបានបរិញ្ញាបត្រជាន់ខ្ពស់រដ្ឋបាល​សាធារណៈ​ នៅថ្ងៃទី០១ ខែសីហា ឆ្នាំ២០០៧។

លោក គួច ចំរើន អាចប្រើប្រាស់បាននូវភាសាអង់គ្លេស និងវៀតណាម។ ក្រៅពីការសិក្សានៅតាមមហាវិទ្យាល័យ និងសាកលវិទ្យាល័យ លោកក៏បានទទួលការបណ្តុះបណ្តាល និងវគ្គសិក្សាខ្លីៗ កម្រិតវិញ្ញាបនបត្រ ពីអង្គការJICAលើការគ្រប់គ្រងរដ្ឋបាលមូលដ្ឋាន ពីក្រសួងរៀបចំដែនដីនគរូបនីយកម្មនិងសំណង់ លើផ្នែកច្បាប់ភូមិបាល ពីវិទ្យាស្ថានខ្មែរសម្រាប់សហប្រតិបត្តិការ និងសន្តិភាព លើផ្នែកហ្វឹកហ្វឺនទំនាក់ទំនងអន្តរជាតិ ពីវិទ្យាស្ថានកម្ពុជាដើម្បីសិទ្ធិមនុស្ស លើការងាររដ្ឋបាលសម្រាប់មន្ត្រីខេត្ត-ក្រុង ពី UNIVERSITY OF SANFRANCISCO លើច្បាប់បោះឆ្នោត,ពីវិទ្យាស្ថានកម្ពុជាដើម្បីសិទ្ធិមនុស្សលើផ្នែកអភិបាលកិច្ចល្អ និងទទួលបានវិញ្ញាបនបត្រពីសាលាក្រុងភ្នំពេញលើការងាររដ្ឋបាល។

ក្នុងពេលបម្រើការងារនៅរាជធានីភ្នំពេញ ពីថ្ងៃទី២៨ ខែមីនាឆ្នាំ១៩៩៣ ដល់ថ្ងៃទី១៣ ខែកក្កដាឆ្នាំ១៩៩៩ លោក គួច ចំរើន ជាបុគ្គលិកចាត់តាំងសាលាខណ្ឌចំការមន រាជធានីភ្នំពេញ។ ពីថ្ងៃទី១៣ ខែកក្កដា ឆ្នាំ១៩៩៩ ឆ្នាំ២០០៤ ជាអភិបាលរងខណ្ឌចំការមន។ ពីថ្ងៃទី២៣ ខែកក្កដាឆ្នាំ២០០៤ ដល់ថ្ងៃទី១៦ ខែឧសភា ឆ្នាំ២០១៤ ជាអភិបាលខណ្ឌមានជ័យ។ ពីថ្ងៃទី១៦ ខែឧសភាឆ្នាំ២០១៤ ដល់ថ្ងៃទី៦ ខែធ្នូ ឆ្នាំ២០១៦ ជាអភិបាលខណ្ឌដូនពេញ។ ពីថ្ងៃទី៦ ខែធ្នូ ឆ្នាំ ២០១៦ ដល់ថ្ងៃទី២៧ ខែមិថុនា ឆ្នាំ២០១៧ ជាអគ្គនាយករងរដ្ឋបាលក្រសួងមហាផ្ទៃ។ ជាអភិបាល នៃគណៈអភិបាលខេត្តកំពង់ចាម និងជាអភិបាលខេត្តព្រះសីហនុ។

លោក គួច ចំរើន មានភរិយាឈ្មោះ អ៊ូ ធីតាពៅ កើតថ្ងៃទី២៤ ខែមេសា ឆ្នាំ១៩៨៤ មានមុខរបរជាមេធាវី និងមានកូនប្រុសបីនាក់៕

អត្ថបទ៖ នរា