សម្ដេចតេជោ ប្រាប់ទូតចិនថា កម្ពុជាប្ដូរនាយករដ្ឋមន្ត្រីថ្មី តែមិនប្ដូរជំហរជាមួយចិនឡើយ

«ក្នុងនាមជាប្រធានគណបក្សប្រជាជនកម្ពុជា សម្តេចនឹងស្ថិតនៅយូរអង្វែង ហើយបើទោះបីជាមានការផ្លាស់ប្ដូរនាយករដ្ឋមន្ត្រីក៏ដោយ ក៏ជំហររបស់កម្ពុជាជាមួយមិត្តចិន ពុំមានការផ្លាស់ប្ដូរនោះទេ»។ នេះជាការគូសបញ្ជាក់របស់សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា ប្រាប់ទៅកាន់លោក​ Wang Wenbin ឯកអគ្គរដ្ឋទូតចិនប្រចាំកម្ពុជា ដែលទើបចូលកាន់តំណែងថ្មី ក្នុងជំនួបសម្ដែងការគួរសមនៅព្រឹកថ្ងៃទី១៨​ ខែកក្កដា នៅវិមានព្រឹទ្ធសភា។

តាមរយៈឯកអគ្គរដ្ឋទូតចិនប្រចាំកម្ពុជា សម្តេចតេជោ ហ៊ុន សែន  បានស្នើឱ្យចិនបន្តការគាំទ្រកម្ពុជាជាបន្តទៀតលើការអភិវឌ្ឍគ្រប់វិស័យ​។ សម្តេចតេជោ ក៏បានរំលឹកពីជំហររបស់កម្ពុជាក្នុងការប្រកាន់ខ្ជាប់នូវ “នយោបាយចិនតែមួយ” ហើយចាត់ទុកបញ្ហាហុងកុង ចិនតៃវ៉ាន់ ទីបេ និងស៊ីនជាំងជាបញ្ហាផ្ទៃក្នុងរបស់ចិន។

ក្នុងជំនួបនេះ សម្តេចតេជោ ក៏បានគូសបញ្ជាក់អំពីសារៈសំខាន់មិនអាចខ្វះបាននៃទំនុកចិត្តនិងការគោរពឱ្យតម្លៃគ្នាទៅវិញទៅមក ក្នុងការវិវត្តនៃទំនាក់ទំនងរវាងកម្ពុជា-ចិន ពីដៃគូយុទ្ធសាស្ត្រ ទៅជាដៃគូយុទ្ធសាស្ត្រគ្រប់ជ្រុងជ្រោយ និងជាមិត្តដែកថែប ដើម្បីរួមគ្នាកសាងសហគមន៍ជោគវាសនារួម។

សម្ដេចតេជោ អះអាងប្រាប់ទូតចិនថ្មីទៀតថា កម្ពុជាបានរក្សាចំណងមិត្តភាពជាប្រពៃណីដ៏ល្អនេះតាំងពីថ្នាក់ដឹកនាំជំនាន់មុន ហើយថ្នាក់ថ្នមថែរក្សាទំនាក់ទំនងនេះឱ្យមានភាពរឹងមាំជារៀងរហូតមក។ សម្ដេចតេជោបានចាត់ទុកថា ទំនាក់ទំនងជាប្រវត្តិសាស្ត្រ រវាងប្រទេសទាំងពីរ តម្រូវឱ្យប្រទេសទាំងពីរនៅតែជាដៃគូដ៏ស្មោះត្រង់ជាមួយគ្នា។

នៅចំពោះមុខសម្ដេចតេជោ លោក Wang Wenbin បេ្តជ្ញាថា ក្នុងអាណត្តិការទូតរបស់លោកនៅកម្ពុជា លោក នឹងពង្រឹងនិងពង្រីកបន្ថែមទៀតនូវទំនាក់ទំនងសេដ្ឋកិច្ច-សង្គម, សន្តិសុខ-យោធា,​ និងទំនាក់ទំនងរវាងប្រជាជននិងប្រជាជន ឱ្យកាន់តែប្រសើរឡើងមួយកម្រិតទៀត។ ឆ្លៀតក្នុងឱកាសនៃជំនួបនេះផងដែរ លោកឯកអគ្គរដ្ឋទូត ក៏បានគោរពអញ្ជើញ សម្តេច ដើម្បីទៅបំពេញទស្សនកិច្ចនៅប្រទេសចិន ក្នុងពេលវេលាសមស្របណាមួយនាពេលខាងមុខ​។

គួរជម្រាបថា លោក Wang Wenbin គឺត្រូវបានរដ្ឋាភិបាលចិនតែងតាំងជាឯកអគ្គរដ្ឋទូតចិនប្រចាំកម្ពុជា ជំនួសលោក វ៉ាង វិនធាន ដែលចប់អាណត្តិការងារ។ លោក​ Wang Wenbin មកដល់កម្ពុជាកាលពីថ្ងៃទី០៥ ខែកក្កដា ដើម្បីត្រៀមបំពេញការងារជាឯកអគ្គរដ្ឋទូត ជំនួសលោក វ៉ាង វិនធាន។ ដាក់ជើងជាន់ដីកម្ពុជា ​នៅម៉ោងជិត១១យប់ លោក Wang Wenbin ក៏បានថ្លែងសារស្វាគមន៍ភ្លាមៗទៅកាន់អ្នកសារព័ត៌មាន នៅទីតាំងអាកាសយានដ្ឋានអន្តរជាតិភ្នំពេញ។ ថ្លែងសារស្វាគមន៍រយៈប្រមាណ៥នាទី កាលណោះ លោក វ៉ាង វិនប៊ីន ឆ្លៀតប្រកាសពីប្ដេជ្ញាចិត្តថា រូបលោកនឹងប្រឹងប្រែងយ៉ាងឥតឈប់ឈរ ដើម្បីឱ្យទំនាក់់ទំនងចិន និងកម្ពុជា កាន់តែស៊ីជម្រៅបន្ថែម និងរុញច្រានឱ្យខ្លាំងការកសាងសហគមន៍ជោគវាសនារួមរវាង ចិន និងកម្ពុជា ដើម្បីផ្ដល់ជាប្រយោជន៍រួម។

តាមរយៈអ្នកបកប្រែជាភាសាខ្មែរ លោក Wang Wenbin ថ្លែងដូច្នេះ«ខ្ញុំនឹងសហការជាមួយមិត្តភក្ដិមកពីគ្រប់មជ្ឈដ្ឋានរវាងចិន និងកម្ពុជា ដើម្បីបង្កើនមរតកនៃចំណងមិត្តភាពរវាងចិន និងកម្ពុជា។ អនុវត្តន៍យ៉ាងខ្ជាប់ខ្ជួនក្នុងកុងសង់ស៊ីសសំខាន់ៗ ដែលសម្រេចបានដោយថ្នាក់ដឹកនាំប្រទេសទាំងពីរ ខិតខំប្រឹងឥតឈប់ឈរ ដើម្បីធ្វើឱ្យកានតែស៊ីជម្រៅនៃទំនាក់ទំនងរវាងចិន និងកម្ពុជា ដើម្បីជំរុញការកសាងសហគមន៍ជោគវាសនារួមរវាងចិន និងកម្ពុជា ក្នុងយុគសម័យនេះ ឱ្យទទួលបានសមិទ្ធផលជាផ្លែផ្កាហើយបានកាន់តែច្រើន ហើយផ្ដល់ផលប្រយោជន៍ដល់ប្រជាជននៃប្រទេសទាំងពីរ»។

ជាការកត់សម្គាល់ រយៈពេលជិត២សប្ដាហ៍ ដែលលោក វ៉ាង វិនប៊ីន បានមកដល់កម្ពុជា លោកផ្ដើមកិច្ចការងារមួយចំនួនដូចជា បានចូលរួមក្នុងពិធីពិនិត្យទីតាំងត្រៀមរៀបចំពិធីសម្ពោធផ្លាកឈ្មោះមហាវិថីស៊ីជីនពីង និងមុនជួបជាមួយសម្ដេចតេជោ ហ៊ុន សែន នាព្រឹកថ្ងៃទី១៨ ខែកក្កដា នេះ, លោក វ៉ាង វិនប៊ីន បានចូលក្រាបបង្គំគាល់ព្រះមហាក្សត្រកម្ពុជា ដើម្បីថ្វាយសារតាំងនៅរសៀលថ្ងៃទី១៧ ខែកក្កដា ឆ្នាំ២០២៤៕

ដោយ៖ ង៉ិល ណារ៉ាត់