កម្ពុជា-ចិន ប្តេជ្ញារួមគ្នាកសាងបរិយាកាសធុរកិច្ចគ្មានអំពើពុករលួយ

អង្គភាពប្រឆាំងអំពើពុករលួយកម្ពុជា និងគណៈត្រួតពិនិត្យកិច្ចការរដ្ឋចិន ខេត្តយូណាន ជំរុញកិច្ចសហប្រតិបត្តិការឱ្យកាន់តែស៊ីជម្រៅលើការងារប្រឆាំងអំពើពុករលួយ ជាពិសេសការប្ដេជ្ញាចិត្តរួមគ្នាកសាងបរិយាកាសធុរកិច្ចគ្មានអំពើពុករលួយ។

ការប្ដេជ្ញាចិត្តនេះ បានធ្វើឡើងក្នុងជំនួបទ្វេភាគីរវាងអង្គភាពប្រឆាំងអំពើពុករលួយកម្ពុជា និងគណៈត្រួតពិនិត្យកិច្ចការរដ្ឋចិន ខេត្តយូណាន នារសៀលថ្ងៃទី២៦ ខែវិច្ឆិកា ឆ្នាំ២០២៤ ក្នុងឱកាសដែលគណៈប្រតិភូចិន ដឹកនាំដោយលោក Wang Jianghua មកបំពេញទស្សនកិច្ចនៅកម្ពុជា។

លោក យន់ ស៊ីណាត អនុប្រធានអង្គភាពប្រឆាំងអំពើពុករលួយកម្ពុជា តំណាងលោកទេសរដ្ឋមន្ត្រី ឱម យ៉ិនទៀង បានចាត់ទុកដំណើរទស្សនកិច្ចរបស់លោក Wang Jianghua និងសហការី ធ្វើឡើងចំពេលដែលថ្នាក់ដឹកនាំជាន់ខ្ពស់ទាំងពីរ កម្ពុជានិងចិន កំពុងបង្កើនទំនាក់ទំនងដ៏សំខាន់ជាមួយគ្នា ជាមិត្តយូរអង្វែង និងមិត្តភាពដែកថែបរវាងស្ថាប័នទាំងពីរ ក៏ដូចរដ្ឋាភិបាលទាំងពីរ ពិសេសការយកចិត្តទុកដាក់ចំពោះកិច្ចសហប្រតិបត្តិការប្រឆាំងអំពើពុករលួយ ដែលជាទិសដៅអាទិភាព និងជាជម្រើសយុទ្ធសាស្ត្ររបស់ប្រទេសនីមួយៗ។

លោកអនុប្រធាន បានប្រាប់ប្រតិភូចិនអំពីយុទ្ធសាស្ត្រមុខព្រួញរបស់អង្គភាពប្រឆាំងអំពើពុករលួយកម្ពុជា គឺការងារអប់រំ បង្ការ ទប់ស្កាត់ និងកសាងសំណុំរឿងបញ្ជូនទៅតុលាការ ដែលជាការងារធ្វើមិនចេះចប់ មានតួនាទីស្នូលក្នុងការជំរុញអប់រំ និងបំផុសចលនា ដើម្បីឱ្យទាំងគ្រឹះស្ថានសិក្សា ក្រសួង ស្ថាប័ននីមួយៗ វិស័យឯកជន មានវិធានការរៀងៗខ្លួន ដើម្បីចូលរួមអប់រំ និងបង្ការ ទប់ស្កាត់អំពើពុករលួយ។

ក្នុងជំនួបការងារនេះ លោក Wang Jianghua អនុលេខាគណៈអធិការកិច្ចវិន័យ និងគណៈត្រួតពិនិត្យកិច្ចការរដ្ឋចិន ខេត្តយូណាន បានលើកឡើងថា ការផ្លាស់ប្តូរកិច្ចសហប្រតិបត្តិការលើគ្រប់វិស័យរវាងខេត្តយូណាន និងកម្ពុជា ពិតជាមានសារសំខាន់ណាស់ ពីព្រោះខេត្តយូណាន ជាស្ពាននៅក្នុងគំនិតផ្តួចផ្តើម «ខ្សែក្រវាត់ និងផ្លូវ» ថែមទាំងផ្លាស់ប្តូរបទពិសោធនគ្នាឱ្យស៊ីជម្រៅថែមទៀតជាមួយអង្គភាពប្រឆាំងអំពើពុករលួយរបស់កម្ពុជា ជាពិសេសទៅលើកិច្ចការប្រយុទ្ធប្រឆាំងអំពើពុករលួយក្នុងបណ្តាប្រទេសអនុវត្តគម្រោង «ខ្សែក្រវាត់ និងផ្លូវ» និងការកសាងបរិយាកាសធុរកិច្ចដែលគ្មានអំពើពុករលួយ ។

លោក គូសបញ្ជាក់ថា ការកសាងផ្លូវសូត្រសស្អាត ផ្តោតលើការកសាងសុចរិតភាពសម្រាប់ការអភិវឌ្ឍរួមគ្នា ការកសាងភាពជាដៃគូ និងការកសាងបរិយាកាសធុរកិច្ចប្រកបដោយសុចរិតភាព ហើយភាគីចិន បានប្តេជ្ញាជំរុញការប្រឆាំងអំពើពុករលួយ ដែលជាការងារគន្លឹះមួយសម្រាប់ការអនុវត្តគម្រោងផ្លូវសូត្រសស្អាតឱ្យបានគុណភាពខ្ពស់ មានចីរភាពយូរអង្វែង។

ភាគីទាំងពីរ ក៏បានឯកភាពគ្នាអញ្ជើញអ្នកច្បាប់របស់អង្គភាពប្រឆាំងអំពើពុករលួយទៅផ្សព្វផ្សាយច្បាប់ស្តីពីការប្រឆាំងអំពើពុករលួយជូនដល់ក្រុមហ៊ុនធុរកិច្ចចិននៅខេត្តសៀមរាប នៅថ្ងៃទី២៧ ខែវិច្ឆិកា ឆ្នាំ ២០២៤នេះផងដែរ៕