ព្រះមហាក្សត្រ ចាត់ទុកសម្ដេចតេជោ ជាស្ថាបនិកដ៏អស្ចារ្យធ្វើឱ្យពុទ្ធសាសនា វត្តអារាមរស់ឡើងវិញ នាំឱ្យមានសន្តិភាព ស្ថិរភាព

ព្រះករុណា ព្រះបាទ សម្ដេចព្រះបរមនាថ  នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា មានព្រះរាជបន្ទូលកោតសរសើរ និងចាត់ទុកសម្ដេចតេជោ ហ៊ុន សែន ជាស្ថាបនិកដ៏អស្ចារ្យធ្វើឱ្យពុទ្ធសាសនា វត្តអារាមរស់ឡើងវិញ នាំឱ្យមានសន្តិភាព ស្ថិរភាព ដូចបាវនាជាតិបច្ចុប្បន្ន។​

សម្ដេចនរោត្ដម សីហមុនី មានព្រះរាជបន្ទូលបែបនេះ៖«ឆ្លៀតនៅក្នុងឱកាសដ៏ប្រពៃថ្លៃថ្លានេះ ខ្ញុំព្រះករុណាខ្ញុំសូមអរគុណ និងកោតសរសើរជាទីបំផុតចំពោះសម្ដេចអគ្គមហាសេនាបតីតេជោ ហ៊ុន សែន  ប្រធានព្រឹទ្ធសភា និងជាប្រធានក្រុមឧត្ដមប្រឹក្សាព្រះមហាក្សត្រ ដែលជាស្ថាបនិកដ៏អស្ចារ្យ ប៉ិនប្រសប់ និងឈ្លាសវៃ ក្នុងការធ្វើឱ្យព្រះពុទ្ធសាសនាខ្មែរ និងវត្តអារាម មានព្រលឹងរស់ឡើងវិញដូចសព្វថ្ងៃដែលនាំឱ្យមានស្ថិរភាពសង្គម សន្តិភាព ក្រោមបាវចនា ជាតិ សាសនា ព្រះមហាក្សត្រ»។

គួររម្លឹកថា ព្រះពុទ្ធសាសនាបានចាក់ឬសក្នុងសង្គមខ្មែរជាយូរលង់ណាស់មកហើយ ប៉ុន្តែនៅឆ្នាំ១៩៧៥ ក្នុងពេលដែលកម្ពុជាស្ថិតក្រោមការដឹកនាំរបស់របបខ្មែរក្រហម របបនេះ បានចាប់ផ្សឹកព្រះសង្ឈ វាយកម្ទេចវាយអារាម និងយកវត្តអារាមធ្វើកន្លែងធ្វើជី ចិញ្ចឹមសត្វ​ ឃ្លាំង និងគុកជាដើម។

ក្រោមចលនាតស៊ូដឹកនាំរបស់សម្ដេចតេជោ ហ៊ុន សែន រំដោះប្រទេសចេញពីរបបអាវខ្មៅមួយនេះ និងកសាងសន្តិភាពជូនកម្ពុជាពេញលេញ ពេញដោយការអភិវឌ្ឍ ពលរដ្ឋអាចគោរពសាសនាឡើងវិញ ព្រះពុទ្ធសាសនានៅកម្ពុជា និងវត្តអារាមអាចរស់ឡើងវិញ និងកើតឡើងឡើងជាលំដាប់។ គិតត្រឹមឆ្នាំ២០២៤ ពាសពេញប្រទេស កម្ពុជាមានវត្តអារាមចំនួន​៥​ ១៤៦វត្ត ដោយក្នុងនោះគណៈមហានិកាយ​ មានចំនួន៤ ​៨៧៦វត្ត និង គណៈធម្មយុត្តិកនិកាយមានចំនួន២៧២វត្ត​។ សម្រាប់ព្រះសង្ឃសរុប គឺមានចំនួន ៧១,១៧៤ព្រះអង្គ​ ដោយក្នុងនោះ គណៈមហានិកាយ​ មានព្រះសង្ឃ៦៨ ៦៥៩អង្គ។​

គួរជ្រាបដែរថា ក្រោយព្រះពុទ្ធសាសនារស់រាសមានជីវិតឡើងវិញ សាសនារបស់ព្រះសម្មាសម្ពុទ្ធ ត្រូវបានការពារដោយច្បាប់។ក្នុងនោះ រដ្ឋធម្មនុញ្ញកម្ពុជាមាត្រា៤៣ កថាខណ្ឌទី៣បានចែងថា ព្រះពុទ្ធសាសនាជាសាសនារបស់រដ្ឋ។ បន្ថែមលើនេះក្រមព្រហ្មទណ្ឌកម្ពុជាក៏បានការពារដល់សាសនារបស់រដ្ឋនេះផងដែរ។ ក្នុងមាត្រា ៥១៦ នៃក្រមព្រហ្មទណ្ឌ ការប្រមាថចំពោះព្រះសង្ឃ ដូនជី និងតាជី អាចប្រឈមនឹងដាក់ទោសពន្ធនាគារពី ១ថ្ងៃទៅ៦ថ្ងៃ និងពិន័យជាប្រាក់ពី ១ពាន់រៀល ដល់១សែនរៀល៕

ដោយ៖ ង៉ិល ណារ៉ាត់