ព័ត៌មានជាតិ

ខេត្តព្រះសីហនុត្រៀមទីតាំងមួយកន្លែងទៀត សម្រាប់ព្យាបាលអ្នកជំងឺកូវីដ១៩

បានផុស

៤ years មុន

នៅ

ថ្ងៃសៅរ៍ ២៧ មីនា ២០២១

ដោយ

ព្រះសីហនុ ៖ ខេត្តព្រះសីហនុបានត្រៀមទីតាំងមួយកន្លែងទៀតសម្រាប់ព្យាបាលអ្នកជំងឺកូវីដ១៩ខណៈចំនួនអ្នកឆ្លងថ្មីបានកើនឡើងជាបន្តបន្ទាប់។

ជាក់ស្តែងគ្រាន់តែថ្ងៃទី២៧ខែមីនានេះ ខេត្តព្រះសីហនុមានអ្នកឆ្លងកូវីដ១៩ថ្មីមានរហូតដល់ទៅ១៤៣នាក់ ដែលជាចំនួនមួយដ៏ច្រើនបំផុតចាប់តាំងពីមានព្រឹត្តិការណ៍សហគមន៍២០កុម្ភៈមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឃាង ភារម្យ អ្នកនាំពាក្យសាលាខេត្តព្រះសីហនុបានឲ្យដឹងនៅរសៀលថ្ងៃទី២៧មីនានេះថា បច្ចុប្បន្ននេះខេត្តព្រះហនុមានទីតាំងសម្រាប់ព្យាបាលអ្នកជំងឺកូវីដ១៩ចំនួន២ទីតាំងដែលទី១មន្ទីរពេទ្យបង្អែកខេត្តព្រះសីហនុនិងទី២នៅសណ្ឋាគារ សាកាណាដែលមានទីតាំងស្ថិតនៅផ្លូវ១២២ ភូមិ១ សង្កាត់លេខ៣ ក្រុងព្រះសីហនុ។

លោកបានបន្តថា «យើងកំពុងសិក្សាមួយទីតាំងទៀតដែលស្ថិតនៅក្នុងភូមិសាស្ត្រសង្កាត់លេខ៣ក្រុងព្រះសីហនុដែលយើងកំពុងចចារសិក្សារៀបចំ។ អឹចឹងបើយើងចរចាបានវានឹងឡើងដល់បីទីតាំង»។

យោងតាមលទ្ធផលតេស្តសំណាកកូវីដ-១៩ នៅថ្ងៃទី២៦ខែមីនា ឆ្នាំ២០២១នៅខេត្តព្រះសីហនុមានអ្នកវិជ្ជមានកូវីដ-១៩ ថ្មីចំនួន ១៤៣នាក់ និងមានអ្នកជាសះស្បើយចំនួន ០៦នាក់។ ដូច្នេះតុល្យការអ្នកជំងឺកូវីដ-១៩ ដែលកំពុងសម្រាកព្យាបាលមានចំនួន២០៧នាក់ ស្រី១៣៦នាក់។

បើតាមក្រសួងសុខាភិបាលបានឲ្យដឹងថា អ្នកឆ្លងថ្មីនៅខេត្តព្រះសីហនុចំនួន១៤៣នាក់នោះមានរហូតដល់ទៅ៥ជនជាតិក្នុងនោះ មានជនជាតិខ្មែរមានច្រើនជាងគេរហូតដល់១០៥នាក់ ជនជាតិចិនចំនួន២៦នាក់ ជនជាតិមីយ៉ានម៉ាចំនួន១០នាក់ ជនជាតិហ្វីលីពីន១នាក់និងជនជាតិន័រវេស១នាក់៕

ដោយ ៖ សំអឿន