លោក វ៉ា ថន៖ ២០ ឧសភា ជាថ្ងៃបុណ្យជាតិផ្លូវការរំលឹកដល់ជនរងគ្រោះ និងការឈឺចាប់ពីឧក្រិដ្ឋកម្មក្នុងរបបប្រល័យពូជសាសន៍ ប៉ុល ពត

លោក វ៉ា ថន អភិបាលខេត្តក្រចេះ បានលើកឡើងថា ថ្ងៃ២០ ឧសភា ជាថ្ងៃបុណ្យជាតិជាផ្លូវការនៅព្រះរាជាណាចក្រកម្ពុជា សម្រាប់រំលឹកដល់ជនរងគ្រោះ និង​ការ​ឈឺចាប់ពី​​ឧក្រិដ្ឋកម្ម ដែល​កើត​មានក្នុងរបប កម្ពុជា​ប្រជាធិបតេយ្យ ចាប់ពីថ្ងៃទី១៧ មេសា ឆ្នាំ១៩៧៥ ដល់ថ្ងៃទី០៦ ខែមករា ឆ្នាំ១៩៧៩ ដោយបានសម្លាប់ប្រជាជនប្រមាណជាង ៣លាននាក់។

លោកបានថ្លែងបែបនេះ ក្នុងឱកាសទិវានៃការចងចាំ ២០ ឧសភា នៃរបប​ប្រល័យ​ពូជសាសន៍​ប៉ុល ពត នៅ​កម្ពុជា ដែលប្រារព្ធធ្វើឡើងនៅថ្ងៃទី ២០ ខែឧសភា ឆ្នាំ ២០២៥ នៅវត្ត​សម្តេច​ព្រះនាគវន្តវរពោធិ៍ (វត្តសំបុក) ស្ថិតនៅភូមិសំបុក ឃុំសំបុក ស្រុកចិត្របុរី ដើម្បី​ឧទ្ទិសកុសល​ជូនដល់​អ្នកស្លាប់ក្នុង​របបខ្មែរក្រហម។

លោក អភិបាលខេត្ត បានមានប្រសាសន៍ថា​ ការ​ប្រារព្ធ​ខួប​ទិវា​ជាតិ​នៃការចងចាំជា​ប្រវត្តិសាស្ត្រនេះ គឺធ្វើឡើងក្នុងស្មារតីចងចាំនិច្ច និងមិន​អាច​បំភ្លេច​បាន​នូវមហា​ឧក្រិដ្ឋកម្ម​ដល់​របបប្រល័យ​ពូជសាសន៍ ប៉ុល ពត។

ជា​មួយ​គ្នា​នេះ លោក វ៉ា ថន អភិបាលខេត្ត បានស្នើដល់អាជ្ញាធរ ស្រុក ឃុំ និងកងកម្លាំង​សម្ថកិច្ចគ្រប់​លំដាប់​ថ្នាក់នៃ​ស្រុកចិត្របុរី និង​ប្រជាពលរដ្ឋ ត្រូវចូលរួមក្នុងការអនុវត្តគោលនយោបាយ “ភូមិ-ឃុំ-សង្កាត់​មាន​សុវត្ថិភាព” ដើម្បីបង្ការ ទប់ ស្កាត់ និង​បង្ក្រាប​សកម្មភាព លួច ឆក់ ប្លន់ ល្បែងស៊ីសងខុសច្បាប់ ក្រុមក្មេង​ទំនើង និងទប់​ស្កាត់ការចែកចាយ ជួញដូរ និងប្រើប្រាស់គ្រឿងញៀននៅក្នុងមូលដ្ឋាននៅក្នុងឃុំ និងស្រុកចិត្របុរី ទាំងមូល ឱ្យបានម៉ឺងម៉ាត់បំផុត។

លោក​ក៏បានអំពាវនាវដល់​ប្រជាពលរដ្ឋ​ចូលរួមថែរក្សានូវសុខភាពអនាម័យឱ្យបានល្អ ជាពិសេស​កូនៗ ឬក្មួយៗក្នុងគ្រួសារ ករណីមានរោគសញ្ញាមិនប្រក្រតីណាមួយ សូមរួសរាន់ទៅមណ្ឌលសុខភាព និងមន្ទីរពេទ្យបង្អែក ដើម្បីពិគ្រោះ ពិនិត្យ និងព្យាបាល។

មួយ​វិញ​ទៀត​ ត្រូវជៀសឆ្ងាយពីគ្រឿងញៀន និងជួយតាមដាន និងជំរុញដល់កូនៗឱ្យខិតខំសិក្សារៀនសូត្រ និងបណ្តុះបណ្តាលរៀនជំនាញនានា ជាពិសេសទប់ស្កាត់ និងហាមឃាត់ ការប្រើប្រាស់គ្រឿងញៀន ដែលនាំ​ឱ្យ​បាត់បង់​ស្មារតី និង​ខាតបង់​ប្រយោជន៍​សង្គមជាតិ និង​គ្រួសារ៕

អត្ថបទ៖ ប្រុញ វិធិន