ព័ត៌មានជាតិ

ថ្ងៃដំបូង នៃដំណើរការប្រឡងបាក់ឌុបនៅខេត្តកោះកុង ប្រព្រឹត្តទៅក្រោមបរិយាកាសល្អប្រសើរ

បានផុស

៩ ខែ មុន

នៅ

ថ្ងៃសុក្រ ២៩ សីហា ២០២៥

ដោយ

នៅថ្ងៃដំបូង នៃដំណើរការប្រឡងសញ្ញាបត្រមធ្យមសិក្សាទុតិយភូមិ ក្នុងខេត្តកោះកុង ប្រព្រឹត្តទៅក្រោមបរិយាកាសល្អប្រសើរ ដោយមានបេក្ខជនប្រឡងអនុវត្តតាមបទបញ្ជា វិន័យ និងសន្តិសុខសណ្ដាប់ធ្នាប់ របៀបរៀបរយ តាមមណ្ឌលប្រឡងនីមួយៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ង៉ែត ឡឹង ប្រធានមន្ទីរអប់រំ យុវជន និងកីឡាខេត្តកោះកុង បានគូសបញ្ជាក់នៅព្រឹកថ្ងៃទី ២៩ ខែសីហា ឆ្នាំ ២០២៥ ថា ថ្ងៃដំបូង នៃការប្រឡងសញ្ញាបត្រមធ្យមសិក្សាទុតិយភូមិ កាលពីម្សិលមិញ គឺស្ថិតនៅក្នុងស្ថានភាពស្ងប់ស្ងាត់ល្អគ្រប់មណ្ឌលប្រឡងក្នុងក្រុងខេមរភូមិន្ទ។

លោកប្រធានមន្ទីរអប់រំ យុវជន និងកីឡាខេត្ត បន្តទៀតថា គ្រប់គណៈប្រយោគ និងអ្នកសង្កេតការណ៍ សុទ្ធតែបានបំពេញការងាររបស់ខ្លួនទៅតាមភារកិច្ចរៀងៗ ខ្លួន តាមការចាត់ទុករបស់គណៈប្រឡង។ ចំណែកឯបេក្ខជនប្រឡងវិញ ពួកគេបានប្រឹងប្រែងបំពេញកិច្ចការលំហាត់ទៅតាមចំណេះដឹងសមត្ថភាពរបស់ពួកគេបានរៀនសូត្រពីលោកគ្រូអ្នកគ្រូអំឡុងពេលប្រឡង ដោយមិនល្មើសនឹងបទបញ្ជាវិន័យអ្វីឡើយ។

គួរជម្រាបថា នៅឆ្នាំ ២០២៥ នេះ ខេត្តកោះកុង មានបេក្ខជនប្រឡងសរុបចំនួន ១.១៧០ នាក់ ស្រី ៦២៩ នាក់ មានមណ្ឌលប្រឡងចំនួន ៣ មណ្ឌល គឺ ទី១-មណ្ឌលប្រឡងវិទ្យាល័យចំណេះទូទៅបច្ចេកទេសតេជោសែន កោះកុង , ទី២-មណ្ឌលប្រឡងអនុវិទ្យាល័យ ជា ស៊ីម សាមគ្គី និង ទី៣-មណ្ឌលប្រឡងសាលាមត្តេយ្យទីរួមខេត្ត។

លោក យ៉ុង ប្រុស ជាឪពុករបស់បេក្ខជនម្នាក់ដែលមកលើកទឹកចិត្តកូនពេលប្រឡង លើកឡើងថា ការមើលកូនប្រឡងថ្ងៃនេះ ជាការលើកទឹកចិត្តដល់ពួកគេឱ្យប្រឹងប្រែងប្រឡងឱ្យអស់ពីសមត្ថភាពចំណេះដែលខ្លួនមាន កុំល្មើសនឹងបទបញ្ជាវិន័យប្រឡង។

លោក យ៉ុង ប្រុស បានបន្តថា កូនរបស់លោកពិតជាប្រឹងប្រែងរៀនសូត្រតាំងពីដើមឆ្នាំរហូតដល់ប្រឡង ហើយពេលលទ្ធផលប្រឡងជាប់ លោកជំរុញឱ្យកូនចាប់មុខវិជ្ជាទៅតាមចំណង់ចំណូលចិត្តមិនបង្ខំកូនឡើយ។

ចំណែក អ្នកស្រី សុង ស៊ីងអ៊ីង ជាម្តាយបេក្ខជនម្នាក់ទៀត មកពីស្រុកស្រែអំបិល ថ្លែងថា អ្នកស្រីគាំទ្រចំពោះគោលការណ៍របស់ក្រសួងអប់រំ «អ្នកចេះ គឺជាប់» ដែលជាការពង្រឹងគុណភាពធនធានមនុស្សទៅអនាគត ដើម្បីចូលរួមអភិវឌ្ឍន៍សង្គមកាន់តែរីកចម្រើន។

ដោយឡែក យុវជន ហ៊ាង សុវណ្ណ និង យុវតី មិលកា ជាបេក្ខជនប្រឡងនៅមណ្ឌលវិទ្យាល័យចំណេះទូទៅបច្ចេកទេសតេជោ សែន កោះកុង បានឱ្យដឹងដែរថា ពួកគេមិនមានអារម្មណ៍បារម្ភអ្វីទេអំឡុងពេលប្រឡង ដោយពួកគេប្រឹងធ្វើលំហាត់លើសន្លឹកកិច្ចការទៅតាមអ្វីដែលពួកគេបានយល់ដឹង និងរៀនសូត្រពីសាលា។

បើតាមបេក្ខជនប្រឡងដដែល នៅក្នុងមណ្ឌលប្រឡងគ្មានបេក្ខជនណាម្នាក់មានបញ្ហាសុខភាព ឬល្មើសនឹងបទបញ្ជាផ្ទៃក្នុងការប្រឡងនោះទេ។ ជាក់ស្ដែងពួកគេបានធ្វើលំហាត់រួចរាល់ពី ៦០ ទៅ ៧០ ភាគរយ ហើយរំពឹងថា នឹងទទួលបានលទ្ធផលប្រឡងល្អ៕

អត្ថបទ ៖ សិរីវឌ្ឍនៈ

Related Topics:ខេត្តកោះកុង ប្រឡងបាក់ឌុប

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា