ព័ត៌មានជាតិ

តែទីក្រុងភ្នំពេញ ឆ្លង ១០៣ នាក់ ទៀតនៅព្រឹកនេះ សូមបងប្អូនប្រុងប្រយ័ត្ន

បានផុស

៤ years មុន

នៅ

ថ្ងៃព្រហស្បតិ៍ ៨ មេសា ២០២១

ដោយ

ក្រសួងសុខាភិបាលបានកត់ត្រាករណីឆ្លងថ្មី ១១៣ នាក់ទៀតនៅព្រឹកនេះ ដោយរាជធានីភ្នំពេញមានអ្នកឆ្លង ១០៣ នាក់ទៅហើយ។

រាជធានីភ្នំពេញដែលមានប្រជាជនជាង ២ លាននាក់រស់នៅ ស្ថិតនៅក្នុងតំបន់ក្រហម ដែលមានហានិភ័យខ្ពស់ក្នុងការឆ្លងកូវីដ ១៩។ រាជធានីសេដ្ឋកិច្ច និងពាណិជ្ជកម្មនេះ មានចំនួនអ្នកឆ្លងកើនឡើងរាល់ថ្ងៃ ខណៈដែលអាជ្ញាធរក៏បានចាត់វិធានការដោយដាក់បម្រាមគោចរចាប់ពីម៉ោង៨យប់ ដល់ ៥ព្រឹក ដើម្បីទប់ស្កាត់ការរីករាលដាលនៃជំងឺកូវីដ-១៩ នៅក្នុងភូមិសាស្ត្ររាជធានីភ្នំពេញ។

ប្រមុខរដ្ឋាភិបាលក៏បានប្រកាសដែរថា បើស្ថានភាពការឆ្លងមិនថមថយនោះទេ នឹងរៀបចំក្រុមប្រតិបត្តិដាក់អ្នកជំងឺកូវីដព្យាបាលនៅតាមផ្ទះ ដើម្បីកាត់បន្ថយការកកស្ទះព្យាបាលនៅតាមមន្ទីរពេទ្យនានា។

រដ្ឋាភិបាល ក៏ជំរុញដល់យុទ្ធនាការចាក់វ៉ាក់សាំងជាកាតព្វកិច្ចចាំបាច់ ដើម្បីកាត់ផ្តាច់ខ្សែចម្លងពីម្នាក់ទៅម្នាក់ និងបន្ថយអត្រាគ្រោះថ្នាក់ធ្ងន់ធ្ងរដល់អ្នកឆ្លងកូវីដ១៩៕

គួរបញ្ជាក់ថា ករណីផ្ទុះកូវីដនៅរោងចក្រឌីន ហាន់ និងលើអាជីវករផ្សារអូរឫស្សី បានបង្កើតក្តីកង្វល់ដល់អាជ្ញាធររាជធានីភ្នំពេញ។ គ្រាន់តែទីតាំងទាំងពីរនេះ រកឃើញអ្នកឆ្លងជាង ១០០ នាក់ និងរាប់ពាន់នាក់ត្រូវបានប៉ះពាល់។

អាជ្ញាធររាជធានីភ្នំពេញ ក៏បានប្រកាសអំពាវនាវដល់អ្នកប៉ះពាល់ទាំងអស់ ត្រូវធ្វើចត្តាឡីស័ក រយៈពេល ១៤ថ្ងៃ តាមចំនួនកំណត់ ហើយត្រូវមកធ្វើតេស្ត។ បើមិនមកធ្វើតេស្ត រកមេរោគកូវីដ១៩ ឬក៏មិនបានចត្តាឡីស័កឲ្យបានត្រឹមត្រូវទេ នឹងត្រូវទទួលទោសពិន័យតាមច្បាប់ ជាក់ជាមិនខានឡើយ៕