ថ្ងៃនេះ ស្ពានឆ្លងទន្លេ​មេគង្គខេត្តក្រចេះបើកឲ្យ​ពលរដ្ឋ​​ឆ្លងកាត់​​បណ្តោះអាសន្ន​ សម្រួលការធ្វើដំណើរអំឡុងបុណ្យភ្ជុំបិណ្ឌ

ស្ពានមិត្តភាពកម្ពុជា-ចិនមេគង្គ ក្រចេះ បាន​បើកឱ្យធ្វើដំណើរឆ្លងកាត់ជាបណ្តោះ​ចាប់ពីថ្ងៃនេះ​រហូត​ដល់ថ្ងៃទី ២៨ ខែ កញ្ញា ឆ្នាំ ២០២៥នេះ ក្នុងរយៈពេល ២១ថ្ងៃ ដើម្បីសម្រួលការធ្វើដំណើរដល់ពលរដ្ឋនាកំឡុងពិធីបុណ្យកាន់បិណ្ឌនិងភ្ជុំបិណ្ឌ។

នេះបើតាមការបញ្ជាក់ពីលោក លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន បានឱ្យដឹងនាព្រឹកថ្ងៃទី០៨ ខែកញ្ញា ឆ្នាំ២០២៥ ក្នុងឱកាសអញ្ជើញពិនិត្យ និងបើកដាក់ឲ្យដំណើរការជាបណ្តុះអាសន្ន ក្រោមវត្តមានចូលរួមពីលោក ហឿ ស៊ីយ៉ែម ប្រធានក្រុមប្រឹក្សាខេត្ត លោក វ៉ា ថន អភិបាលខេត្ត តំណាងក្រុមហ៊ុនសាងសង់ និងមន្ទីរអង្គភាពពាក់ព័ន្ធជុំវិញខេត្ត។

លោក លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន មានប្រសាសន៍បន្តថា ស្ពានមិត្តភាពកម្ពុជា-ចិន មេគង្គក្រចេះ នឹង​ចាប់ផ្តើមបើកឱ្យធ្វើដំណើរឆ្លងកាត់ជាបណ្តោះអាសន្ន ចាប់ពីព្រឹកថ្ងៃនេះតទៅរហូតដល់ថ្ងៃទី២៨ ខែកញ្ញា ឆ្នាំ២០២៥ ដែលបងប្អូនប្រជាពលរដ្ឋក្នុងខេត្តក្រចេះ ក៏ដូចជា បងប្អូននៅតាមបណ្តាខេត្តនានា ដែលធ្វើដំណើរឆ្លងកាត់ខេត្តក្រចេះ អាចធ្វើដំណើរឆ្លងកាត់តាមស្ពានមិត្តភាពកម្ពុជា-ចិន មេគង្គក្រចេះ នៅក្នុងរយៈពេល ២៨ថ្ងៃនេះ នាកំឡុងនៃពិធីបុណ្យភ្ជុំបិណ្ឌនេះ។

ការបើកឱ្យឆ្លងកាត់ជាបណ្តោះអាសន្ន ចំពោះមធ្យោបាយធ្វើដំណើរ ដូចជា៖ ថ្មើរជើង ទោចក្រយានយន្ត រថយន្តធុនតូច និងរថយន្តទេសចរណ៍ចាប់ពី១២កៅអីចុះ ក្នុងរយៈពេលចំនួន ២១ថ្ងៃ ចាប់ពីថ្ងៃទី៨ ខែកញ្ញា ដល់ថ្ងៃទី២៨ ខែកញ្ញា ឆ្នាំ២០២៥ ដើម្បីចូលរួមអបអរសាទរក្នុងឱកាសពិធីបុណ្យ កាន់បិណ្ឌ និងភ្ជុំបិណ្ឌ។

ក្នុងនោះដែរ លោករដ្ឋលេខាធិការ បានក្រើនរម្លឹកដល់បងប្អូនប្រជាពលរដ្ឋ អ្នកបើកបរ ក៏ដូចជា អ្នកដឹកជញ្ជូន សូមឱ្យបន្តគោរពច្បាប់ចរាចរណ៍ឱ្យបានខ្ជាប់ខ្ជួន កុំបើកបរហួសល្បឿនកំណត់ និងកុំដឹកជញ្ជូនលើសទម្ងន់កម្រិតកំណត់ដោយច្បាប់ មានការចូលរួមពីប្រជាពលរដ្ឋអ្នកប្រើប្រាស់ ផ្លូវ-ស្ពាន និងអ្នកធ្វើដំណើរទាំងអស់គ្នា ដើម្បីកាត់បន្ថយបាននូវករណីគ្រោះថ្នាក់ចរាចរណ៍ និងថែរក្សាបាននូវគុណភាពផ្លូវ-ស្ពាន ឱ្យប្រើប្រាស់បានយូរអង្វែង៕

អត្ថបទ ប្រុញ វិធិន