ប្រើ​ពេលត្រឹម ៤០ ថ្ងៃ កសិករ​នៅ​ជនបទ​អាចរកចំណូល​បានជិត ៧០ មុឺនរៀល​ពីរ​បរចិញ្ចឹម​កណ្តូប

គ្រួសារ​កសិករមួយក្នុង​ខេត្ត​បាត់ដំបង​បាន​អះអាងថា ត្រឹមរយះពេល ៤០ ថ្ងៃ តាមរយះការចិញ្ចឹមសត្វកណ្តូប អាច​ទាញ​យក​ប្រាក់ចំណូលជាមធ្យមបានជិត ៧០ មុឺនរៀល សម្រាប់ទ្រទ្រង់ជីវភាពគ្រួសារប្រចាំថ្ងៃ។

អ្នកស្រីសួន សុខឃឿន កសិករ​រស់នៅក្នុងភូិប៉ៃឡាំ ឃុំ​ចែងមាជ័យ ស្រុកបាណន់ ខេត្តបាត់ដំបង​ប្រាប់​ថា ក្រោយ​ពី​ត្រឡប់​ពីធ្វើពលករនៅប្រទេសថៃ អ្នកស្រីបានចាប់ផ្តើមដាំពោតជាជំហានទី​មួយ ហើយរហូតមកដល់ពេលនេះដំណាំ​ពោត​របស់​អ្នកស្រីក៏ជិតបានប្រមូលផលដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អតីតពលករពីប្រទេស​ថៃ​បាន​បន្ត​ថា នៅដំណាក់កាលទីពីរអ្នកស្រីបានបង្កើន​មុខ​របរ​ចិញ្ចឹមកណ្តូប បើគិតមកដល់ពេលនេះ ការចិញ្ចឹមកណ្តូបក៏បានប្រមូលលក់បានជាលើកទីមួយ​ផង​ដែរ ដែលទទួលបានប្រាក់ចំណូលប្រមាណជិត ៧០ មុឺន​រៀល​ក្នុងរយះពេល ៤០ ថ្ងៃ ហើយប្រាក់ចំណូលនេះ អ្នកស្រីអះអាងថា គ្រប់គ្រាន់សម្រាប់ការចាយវាយប្រចាំថ្ងៃនៅមិនទាន់គិតពីប្រាក់ចំណូល​ពីការប្រមូលទិន្នផលពោតនៅឡើយផង។

គ្រួសារ​អ្នកស្រី សួន សុខឃឿន មានផ្ទៃដីតិចតួចសម្រាប់ដាំពោត ហើយការដាំ​នេះអ្នកស្រីថាបានជួយដល់ការបំប៉នសត្វកណ្តូបឲ្យមានសុខភាពល្អ ឆាប់ធំធាត់និងមានរសជាតិឆ្ងាញ់ ខណះការដាក់ចិញ្ចឹមជាលើកទីពីរមានអតិថិជនកម្ម៉ង់ទុករួចហើយដែរ ក្រោយដាក់ចិញ្ចឹមបាន ៣០ ថ្ងៃ ហើយ​រយៈពេល​ប្រមូលលក់ត្រឹម ៤០ ថ្ងៃ។

អ្នកស្រី សួន សុខឃឿន បាន​បញ្ជាក់​ថា ក្នុងមួយរោងការ​​ចិញ្ចឹម​ប្រមូលបានចន្លោះពី ៩ ទៅ ១១ គីឡូក្រាម បើសិនជាមិន​មានងាប់ខ្លះ ហើយមួយគីឡូក្រាមលក់បានចន្លោះពី ៣ ទៅ ៤ មុឺនរៀល មិនពិបាកយកទៅចូលទីផ្សារនោះទេ។

សម្រាប់អ្នកស្រីសុខឃឿន សត្វកណ្តូបដែលអ្នកស្រី​ចិញ្ចឹម អតិថិជនសរសើថាមានសាច់ធំធាត់ល្អ ខុសពីកន្លែងចិញ្ចឹមផ្សេងៗ និងមានរសជាតិឆ្ងាញ់ ព្រោះអ្នកស្រី​ឲ្យសុីតែស្លឹកពោតស្រស់ៗមិនដាក់ស្មៅឲ្យស៊ី​នោះទេ។

អ្នកស្រី សួន សុខឃឿន ​ប្រាប់​ថា ​មិន​មាន​គម្រោង​ពង្រីកការចិញ្ចឹមអីទៀតទេ ត្រឹមតែពីររោងនេះសមល្មមដោយមិនចង់លោភលន់ពេកទេ ហើយ​ណាមួយ​ក៏​មិនមានដីធំដាំពោតសម្រាប់ផ្គត់ផ្គង់​ចំណីវាងផងដែរ៕

អត្ថបទ÷សៅ សារិទ្ធ