គណបក្សនយោបាយ គាំទ្រគំនិតផ្ដួចផ្ដើមរបស់សម្ដេច តេជោ ហ៊ុន សែន ក្នុងការកំណត់ថ្នាក់ដឹកនាំជាតិ ត្រូវមានសញ្ជាតិខ្មែរតែមួយ

បន្ទាប់ពីសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសម្រេចប្រគល់ភារកិច្ច ឲ្យរដ្ឋមន្ត្រីក្រសួងយុត្តិធម៌ សិក្សាអំពីការរៀបចំធ្វើវិសោធនកម្មរដ្ឋធម្មនុញ្ញ ឬសេចក្ដីព្រាងច្បាប់ ដើម្បីកំណត់ឲ្យនាយករដ្ឋមន្រ្តី, ប្រធានរដ្ឋសភា, ប្រធានព្រឹទ្ធសភា និងប្រធានក្រុមប្រឹក្សាធម្មនុញ្ញ ត្រូវមានសញ្ជាតិខ្មែរតែមួយរួចមក, ស្ថាប័នរាជរដ្ឋាភិបាល​ទាំង​ថ្នាក់​​ជាតិ និងថ្នាក់ក្រោមជាតិ កងប្រដាប់អាវុធទាំង ៣ប្រភេទ ព្រមទាំងប្រជាពលរដ្ឋ បានប្រកាសគាំទ្រនូវ​គំនិត​ផ្ដួចផ្ដើម របស់សម្ដេចតេជោខាងលើនេះ។ មិនត្រឹមតែប៉ុណ្ណោះ គណបក្សនយោបាយ ទាំងនៅក្នុងរាជរដ្ឋាភិបាល និងក្រៅរាជរដ្ឋាភិបាល ក៏បានប្រកាសគាំទ្រ​ ហើយថែមទាំងជំរុញឲ្យពន្លឿនការបង្កើតច្បាប់នេះផងដែរ។

គណៈអចិន្ត្រៃយ៍ គណៈកម្មាធិការកណ្ដាលគណបក្សប្រជាជនកម្ពុជា នៅថ្ងៃទី៦ ខែតុលា ឆ្នាំ២០២១ បានចេញ សេចក្ដីថ្លែងការណ៍ បដិសេធយ៉ាងដាច់អហង្ការនូវព័ត៌មាន ដែលបានចោទប្រកាន់យ៉ាងអយុត្តិធម៌បំផុត ចំពោះ សម្ដេចតេជោ ហ៊ុន សែន ថាបានទិញសញ្ជាតិបរទេស និងលិខិតឆ្លងដែន ពីប្រទេសសាយប្រឹស (Cyprus)។

ជាមួយគ្នានេះ គណបក្សប្រជាជនកម្ពុជា​ បានប្រកាសគាំទ្រយ៉ាងឱឡារិក ចំពោះការធ្វើវិសោធនកមម្មរដ្ឋធម្មនុញ្ញ ដែលទាក់ទងដល់ការកំណត់ ឲ្យមានសញ្ជាតិខ្មែរតែមួយគត់ ចំពោះថ្នាក់ដឹកនាំជាតិ កាន់តំណែងជា ប្រធានព្រឹទ្ធ សភា, ប្រធានរដ្ឋសភា, នាយករដ្ឋមន្ត្រី, និងប្រធានក្រុមប្រឹក្សាធម្មនុញ្ញ។

រីឯគណបក្សយុវជនកម្ពុជា ក៏ចេញសេចក្ដីប្រកាសគាំទ្រ ឲ្យមានច្បាប់កំណត់សញ្ជាតិខ្មែរតែមួយគត់ សម្រាប់មេដឹក​នាំ​​​​កំពូល​ជាតិ ដើម្បីបម្រើផលប្រយោជន៍ជាតិខ្មែរយើង។ ជាមួយគ្នានេះ គណបក្សយុវជនកម្ពុជា ក៏បានលើកទឹក និងជំរុញឲ្យរាជរដ្ឋាភិបាល ពន្លឿនការបង្កើតច្បាប់ខាងលើនេះ ឲ្យបានលឿនបំផុតតាមដែលអាចធ្វើទៅបាន។

មិនខុសគ្នាដែរ គណបក្សសញ្ជាតិកម្ពុជា ក៏បានចេញសេចក្តីថ្លែងការណ៍ ប្រកាសគាំទ្រយ៉ាងពេញទំហឹង និងប្រកប​ដោយមនសិការជាតិខ្ពស់ ចំពោះគំនិតផ្តួចផ្តើមរបស់សម្តេចតេជោហ៊ុន សែន ក្នុងការធ្វើវិសោធនកម្មរដ្ឋធម្មនុញ្ញ​ទាក់ ទង អំពីការកំណត់តួនាទីថ្នាក់ដឹកនាំជាតិ កាន់តំណែងជា ប្រធានព្រឹទ្ធសភា, ប្រធានរដ្ឋសភា, នាយករដ្ឋមន្ត្រី, ប្រ ធានក្រុមប្រឹក្សាធម្មនុញ្ញ ត្រូវមានសញ្ជាតិខ្មែរតែមួយគត់ជាដាច់ខាត។ ជាមួយគ្នានេះ គណបក្សសញ្ជាតិកម្ពុជា ក៏​បានអំពាវនាវដល់ ប្រជាពលរដ្ឋគ្រប់និន្នាការទាំងអស់ កងកម្លាំងប្រដាប់អាវុធ គាំទ្រនូវជំហររបស់រាជរដ្ឋាភិបាល ជាពិសេសគំនិតផ្ដួចផ្ដើមរបស់សម្ដេចតេជោ ហ៊ុន សែន ដែលទាក់ទងដល់ការកំណត់ ឲ្យមានសញ្ជាតិខ្មែរតែមួយគត់ ចំពោះថ្នាក់ដឹកនាំជាតិ។

ចំណែកឯលោក ញឹក ប៊ុនឆៃ ប្រធានគណបក្សខ្មែររួបរួមជាតិ មានប្រសាសន៍ប្រាប់អ្នកសារព័ត៌មាន នៅថ្ងៃទី៧ ខែ​តុលា លោកពេញចិត្តគំនិតផ្ដួចផ្ដើម របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា​ ដែលឲ្យរដ្ឋមន្ត្រី​ក្រសួង​យុត្តិធម៌ សិក្សាទៅលើការធ្វើវិសោធនកមម្មរដ្ឋធម្មនុញ្ញ ដោយកំណត់ឲ្យថ្នាក់កំពូលរបស់ជាតិ ត្រូវមានសញ្ជាតិខ្មែ​រ​តែ​​មួយគត់។ លោក ញឹក ប៊ុនឆៃ មានប្រសាសន៍បន្តថា គំនិតផ្ដួចផ្ដើម របស់សម្ដេចតេជោនាយករដ្ឋមន្ត្រី គឺពិត​មាន​ស្មារតីជាតិនិយមខ្ពស់ណាស់ សម្រាប់ប្រជាជាតិកម្ពុជាទាំងមូល។

សូមជម្រាបថា សម្ដេចតេជោ ហ៊ុន សែន បានសរសេរនៅលើទំព័រហ្វេសប៊ុក កាលពីព្រឹកថ្ងៃទី៦ ខែតុលានេះថា ដើម្បីបង្ហាញនូវការស្មោះ​ត្រង់ចំពោះជាតិ និងបញ្ចៀសនូវការជ្រៀតជ្រែកពីបរទេស ថ្នាក់ដឹកនាំជាតិ ដែលកាន់តួនាទីជាប្រធានព្រឹទ្ធ​សភា ប្រធានរដ្ឋសភា នាយករដ្ឋមន្ត្រី និងប្រធានក្រុមប្រឹក្សាធម្មនុញ្ញ ត្រូវមានសញ្ជាតិខ្មែរតែមួយ។

សម្ដេចតេជោនាយករដ្ឋមន្ត្រី បានសរសេរបន្តថា «ខ្ញុំបានប្រគល់ការងារជូនឯកឧត្តមកើត រិទ្ធ រដ្ឋមន្ត្រី​ក្រសួងយុត្តិ​ធម៌សិក្សារៀបចំ ធ្វើសេចក្តីព្រាងច្បាប់ វិសោធនកម្មរដ្ឋធម្មនុញ្ញ ឬសេចក្តីព្រាងច្បាប់អង្គការ ដែលចេញពីរាជរដ្ឋាភិបាល ឬជាសេចក្តីស្នើច្បាប់ ដែលចេញពីព្រឹទ្ធសភា និងរដ្ឋសភា»៕

អត្ថបទ៖ ឃួន សុភ័ក្រ