​លោក ហ៊ុន​ ម៉ាណែត​ ផ្តាំទៅក្រុមនៅក្រៅប្រទេសកុំមកញុះញង់ពលរដ្ឋក្នុងស្រុកដែលរស់សុខក្នុងសន្តិភាព

លោក ហ៊ុន ម៉ាណែត បេក្ខភាពនាយករដ្ឋមន្រ្តីនាពេលអនាគតរបស់គណបក្ស​ប្រជាជនកម្ពុជា បានបញ្ជូនសារទៅកាន់ក្រុមអតីតបក្សប្រឆាំងនៅខាងក្រៅប្រទេសថា កុំមកញុះញង់ប្រជាពលរដ្ឋដែលកំពុងរស់នៅបានសុខក្រោមដំបូលសន្តិភាព។ លោក ហ៊ុន ម៉ាណែត បានបញ្ជូនសារនេះពីក្នុងពិធីប្រកាសទទួលស្គាល់ក្រុមការងារជនបង្គោលយុវជនថ្នាក់កណ្តាលចុះជួយស្រុកបាធាយ​​កាលពីថ្ងៃអាទិត្យ។

ពិធីនេះ មានការចូលរួមពីសមាជិក សមាជិការបស់គណបក្សប្រជាជនកម្ពុជាជាច្រើនាក់​ ក្រោមអធិបតីភាព​ លោកបណ្ឌិត ហ៊ុន ម៉ាណែត សមាជិកគណៈអចិន្ត្រៃយ៍គណៈកម្មាធិការកណ្តាល និងជាប្រធានយុវជនគណបក្សថ្នាក់កណ្តាល​  និងមានការអញ្ជើញចូលរួមពី​ លោក អ៊ុន​ ចាន់ដា​ ប្រធានគណបក្សប្រជាជនកម្ពុជា​ខេត្តកំពង់ចាម​ និង​ លោក ខ្លូត​ ផន​ អនុប្រធានគណៈបក្សប្រជាជនកម្ពុជា​ខេត្តកំពង់ចាម​ផងដែរ។

លោក ហ៊ុន ម៉ាណែត បានអះអាងថា ក្រុមនៅខាងក្រៅប្រទេសកុំញុះញុងពលរដ្ឋដែលកំពុងមានភាពសុខសាន្ត ហើយបានជំរុញលើកទឹកចិត្តដល់សមាជិកគណបក្សទាំងអស់ត្រូវចេះផ្សព្វផ្សាយរាល់សកម្មភាពដែលជាស្នាដៃរបស់បក្ស និងរួមថែរក្សាសុខសន្តិភាពបន្តទៀត។ ជាមួយគ្នានេះ លោកក៏​បានជំរុញលើកទឹកចិត្តដល់យុវជន​បន្តវេន​ឲ្យខិតខំប្រឹងប្រែង​ពង្រឹង​សមត្ថភាព​ ចំណេះ​ដឹង​ សាមគ្គី​ភាព​គ្នា​ ធ្វើយ៉ាងណាក្លាយខ្លួនជាមន្ត្រីបក្ស​ គឺមានភារកិច្ច​ដោះស្រាយ​ បម្រើសេវាសាធារណៈជូនប្រជាពលរដ្ឋ​ ដោយមានភាពទទួលខុសត្រូវ​ តម្លាភាព​ និងតាមតម្រូវការរបស់ប្រជាពលរដ្ឋ៕

អត្ថបទ ៖ ហុង ម៉េង ហៀ