បង្ក្រាបគ្រឿងញៀន៣គោយន្ដបម្រុងឆ្លងដែនចូលកម្ពុជា ជាប់ព្រំដែនខេត្តស្ទឹងត្រែង

កម្លាំងយោធាការពារព្រំដែនឡាវ ប្រចាំការជាប់ខ្សែបន្ទាត់ព្រំដែនកម្ពុជាក្នុងខេត្តស្ទឹងត្រែង បានធ្វើការបង្ក្រាប និងរឹបអូសបានគ្រឿងញៀន ៣២បេ ស្មើនឹង៦៤០ដុំ ប្រមាណជា៦០០គីឡូក្រាម ដែលក្រុមឧក្រិដ្ឋជនគ្រឿងញៀនគ្រោងនាំចូលពីប្រទេសឡាវ ចូលមកក្នុងប្រទេស​កម្ពុជា។

សេចក្តីរាយការណ៍ពីច្រកទ្វារអន្តរជាតិត្រពាំងក្រៀលកម្ពុជា-ណងណុកខៀនឡាវ បានឲ្យដឹងថា ប្រតិបត្តិការបង្ក្រាប និងរឹបអូសគ្រឿងញៀន ដ៏ច្រើននេះ បានធ្វើឡើងនៅម៉ោង២រំលងអាធ្រាត្រ ឈានចូលថ្ងៃទី២៥ ខែមីនា ឆ្នាំ២០២២ នៅចំណុចផ្លូវខ្សែភ្លើង ហួសប៉ុស្តិ៍ចាស់ដុងក្រឡ នៅតាមខ្សែបន្ទាត់ព្រំដែន ខេត្តស្ទឹងត្រែងកម្ពុជា និងខេត្តចម្ប៉ាសាក់ឡាវ។

មន្ត្រីនគរបាល BLO ប្រចាំច្រកទ្វារអន្តរជាតិត្រពាំងក្រៀលកម្ពុជា បានប្រាប់ឲ្យដឹងថា គ្រឿងញៀនដែលទាហានឡាវចាប់បាននោះ គឺជាថ្នាំ​ញៀនប្រភេទ (ខេ K) ត្រូវបានគេវិចខ្ចប់ក្នុងថង់ផ្លាស្ទិកពណ៌បៃតង និងច្រកក្នុងបេការ៉ុងពណ៌បៃតងដូចគ្នា។ ហើយថ្នាំញៀនទាំងនេះ ត្រូវបានគេដឹកជញ្ជូនតាមគោយន្តកន្ត្រៃចំនួន៣គោយន្ត គ្រោងនាំចូលមកក្នុងប្រទេសកម្ពុជា ប៉ុន្តែត្រូវបានបង្ក្រាប គ្រាដែលកម្លាំងយោធា និងប៉ូលិសឡាវ ដើរល្បាតក្នុងភូមិសាស្ត្ររបស់ខ្លួន ដើម្បីទប់ស្កាត់ការនាំចូល និងនាំចេញនូវទំនិញឆ្លងដែនគេចពន្ធគ្រប់ប្រភេទ ពិសេស រថយន្តចង្កូតស្តាំគេចពន្ធពន្ធ ពីឡាវចូលមកកម្ពុជា និងពីកម្ពុជា ចូលទៅក្នុងទឹកដីឡាវ។

មន្ត្រីនគរបាល BLO កម្ពុជា បានឲ្យដឹងទៀតថា វត្ថុតាងបទល្មើសដែលកម្លាំងសមត្ថកិច្ចព្រំដែនឡាវបង្ក្រាប និងរឹបអូសបានក្នុងពេលនោះ គឺជាថ្នាំញៀនប្រភេទខេ ចំនួន ៣២បេ ស្នើនឹង ៦៤០ដុំ បើតាមការប៉ានប្រមាណ មានមិនតិចជាង ៦០០គីឡូក្រាមនោះទេ និងគោយន្តកន្ត្រៃ ៣គ្រឿង ដែលជាមធ្យោបាយបម្រើឲ្យការដឹកជញ្ជូន វត្ថុតាងបទល្មើសគ្រឿងញៀនឆ្លងដែន។ ដោយឡែក ក្រុមឧក្រិដ្ឋជនបានរត់ចូលព្រៃគេចខ្លួនបាត់អស់ទាំងយប់។

ក្រោយការបង្ក្រាប និងរឹបអូសបានគ្រឿងញៀនទាំង៦៤០ដុំ រួមទាំងគោយន្តកន្ត្រៃ៣គ្រឿង ត្រូវបាននាំយកមករក្សាទុកនៅប៉ុស្តិ៍ប្រចាំការ ក្នុងទឹកដីឡាវ ជាប់ព្រំដែនខេត្តស្ទឹងត្រែង ប្រទេសកម្ពុជា៕

អត្ថបទ៖ សុខុម