កម្លាំងជំនាញស្ទាក់ចាប់រថយន្ដដឹកគ្រឿងក្នុងមាន់បង្កកនាំចូលពីប្រទេសថៃជិត៤០០០គីឡូក្រាម

ក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ សហការជាមួយការិយាល័យផលិតកម្ម និងបសុព្យាបាលនៃមន្ទីរកសិកម្មខេត្តបាត់ដំបង ចុះស្ទាក់ចាប់រថយន្ត០១គ្រឿង ដែលលួចដឹកគ្រឿងក្នុងមាន់បង្កក(កោះមាន់)ចំនួន៣៩០០គីឡូក្រាម នាំចូលពីប្រទេសថៃ បម្រុងយកទៅចែកចាយនៅក្រុងបាត់ដំបង ដោយគ្មានលិខិតអនុញ្ញាតអ្វីទាំងអស់។

ប្រតិបត្តការបង្ក្រាបនេះ បានធ្វើឡើងនៅវេលាម៉ោង១១និង១៨នាទី ថ្ងៃទី២៥ ខែមីនា ឆ្នាំ២០២២ លើផ្លូវជាតិលេខ៥៧B ភូមិស្ពានកណ្ដាល ឃុំបវេល ស្រុកបវេល ខេត្តបាត់ដំបង។

កម្លាំងជំនាញបានបញ្ជាក់ថា រថយន្ដដែលលួចដឹកគ្រឿងក្នុងមាន់បង្កកនេះ ម៉ាក Ssangyong istana ពណ៌ស ជាប្រភេទរថយន្តដឹកឣ្នកដំណើរ១៥កៅឣី ពាក់ស្លាកលេខភ្នំពេញ២K-៦៤៨៧។ តាមការបញ្ជាក់ពីម្ចាស់រថយន្ដបានបំភ្លឺថា គ្រឿងក្នុងមាន់ទាំង៣៩០០គីឡូក្រាមនេះ បាននាំចូលពីប្រទេសថៃ មកកាន់ប្រទេសកម្ពុជា តាមច្រកដូង ស្រុកកំរៀង ខេត្តបាត់ដំបង បម្រុងនឹងយកទៅចែកចាយនៅក្រុងបាត់ដំបង។

ក្រោយឆែកឃើញបទល្មើសទាំងនេះ ក្រុមការងារបាននាំយកវត្ថុតាងទាំងនោះទៅរក្សាទុកនៅមន្ទីរកសិកម្ម រុក្ខាប្រមាញ់ និងនេសាទខេត្តបាត់ដំបង ដើម្បីចាត់ការទៅតាមនីតិវិធីច្បាប់៕

អត្ថបទ៖ សុខុម