ព័ត៌មានបន្ថែម ករណីអគ្គិភ័យនៅក្រុងព្រះសីហនុ

សំណង់អគារមួយកន្លែងដែលម្ចាស់ទុកចោលមិនដំណើរការត្រូវបានអគ្គិភ័យឆាបឆេះយ៉ាងសន្ធោសន្ធៅទាំងកណ្តាលអាធ្រាត្រ។

ហេតុការណ៍នេះបង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះទៅអន្តរាគមន៍ភ្លាមៗនៅកន្លែងកើតហេតុ។ បើតាមសមត្ថកិច្ចមូលដ្ឋានបានឲ្យដឹងថា ហេតុការណ៍នេះបានកើតមានឡើងវេលាម៉ោង៣និង៣០នាទីយប់ទៀបភ្លឺ ថ្ងៃទី២៧ ខែកក្កដា ឆ្នាំ២០២២ នៅចំណុចជិតរង្វង់មូលតោពីរ (ក្បែរធនាគារ ABA) ស្ថិតនៅភូមិ៤ សង្កាត់លេខ៤ ក្រុង-ខេត្តព្រះសីហនុ។ 

សមត្ថកិច្ចបានឲ្យដឹងថា ពេលនេះគេមិនទាន់ដឹងថា ករណីគ្រោះអគ្គិភ័យនេះបង្កឡើងដោយសារអ្វីនៅឡើយទេ ព្រោះថាអគារនេះម្ចាស់បានទុកចោលមិនដំណើរការ។ សមត្ថកិច្ចបានឲ្យដឹងទៀតថា ក្នុងប្រតិបត្តិការបាញ់ទឹកពន្លត់ភ្លើងនេះ បានប្រើប្រាស់រថយន្ដពន្លត់អគ្គិភ័យសរុបចំនួន ៦គ្រឿង ប្រើប្រាស់ទឹកអស់ចំនួន១០ឡាន ក្នុងនោះរថយន្តពន្លត់អគ្គិភ័យ កងរាជអាវុធហត្ថ ០២គ្រឿង ប្រើប្រាស់ទឹកអស់ ចំនួន ០៣ឡាន។ រថយន្តពន្លត់អគ្គិភ័យនគរបាល ០២គ្រឿង ប្រើប្រាស់ទឹកអស់ចំនួន០៥ឡាន។ រថយន្តពន្លត់អគិគីភ័យ កំពង់ផែស្វយ័ត ក្រុងព្រះសីហនុ ០២គ្រឿង ប្រើប្រាស់ទឹកអស់ចំនួន ០២ឡាន។

ក្នុងប្រតិបត្តិការបាញ់ទឹកពន្លត់ភ្លើងនេះ កម្លាំងសមត្ថកិច្ចបានប្រើពេលអស់រយៈពេល២ម៉ោង ដោយភ្លើងបានរលត់ទាំងស្រុងនៅម៉ោង៥កន្លះព្រឹកផងដែរ។ សមត្ថកិច្ចបាននិយាយថា ករណីនេះសមត្ថកិច្ចកំពុងស្រាវជ្រាវរកមូលហេតុដែលបង្ករឲ្យកើតមានគ្រោះអគ្គិភ័យនេះ ដោយឡែកចំពោះទ្រព្យសប្បត្តិដែលខូចខាតមិនទាន់ដឹងដែរ៕

អត្ថបទ៖ ស៊ុយ ចាន់ធា