ឡោមព័ទ្ធអគារមួយកន្លែងឃាត់ខ្លួនមនុស្សជាង១០០នាក់ ពាក់ព័ន្ធករណីគ្រឿងញៀននិងល្បែងស៊ីសង

កម្លាំងអាជ្ញាធរចម្រុះនៃស្នងការដ្ឋាននគរបាលរាជធានីភ្នំពេញ បានចុះឡោមព័ទ្ធទីតាំងអគារដែលមានយីហោ ML ដែលសង្ស័យពាក់ព័ន្ធករណីគ្រឿងញៀន និងល្បែងស៊ីសង ត្រូវបានកម្លាំងនគរបាលជំនាញឃាត់ខ្លួនមនុស្សបានចំនួន ១៣៤នាក់ និងដកហូតវត្ថុតាងមួយចំនួនធំរួមទាំងមានកាំភ្លើងខ្លី០២ដើមផងដែរ។

ប្រតិបត្តិការនេះបានធ្វើឡើងកាលពីវេលាម៉ោង១រំលងអាធ្រាតឈានចូលថ្ងៃទី១ ខែតុលា ឆ្នាំ២០២២ នៅចំណុចអគារដែលមានយីហោ ML ស្ថិតនៅតាមបណ្ដោយផ្លូវលេខ១០៥ មូលដ្ឋានសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។

តាមប្រភពព័ត៌មានពីមន្ត្រីជំនាញឲ្យដឹងថា មុនឈានដល់ការឡោមព័ទ្ធនិងបង្ក្រាបទីតាំងអគារដែលមានយីហោ MLនេះដោយមានសេចក្ដីរាយការណ៍ និងផ្ដល់ព័ត៌មានយ៉ាងជាក់លាក់ថាទីតាំងនេះមានបង្កប់ល្បែងស៊ីសង និងគ្រឿងញៀន ដោយមានមនុស្សទាំងជនបរទេស ទាំងជនជាតិខ្មែរ ពពាក់ពពួន គ្នាចូលលេងយ៉ាងច្រើន។

ក្រោយទទួលបានព័ត៌មានកម្លាំងអាជ្ញាធរជំនាញបានធ្វើការស្រាវជ្រៅ និងស៊ើបអង្កេតរហូតឈានដល់ការចុះឡោមព័ទ្ធ បង្ក្រាបជាក់ស្ដែងដោយឃាត់ខ្លួនមនុស្សបានចំនួន១៣៤នាក់ ក្នុងនោះស្រី ៥៨ នាក់ និងដកហូតវត្ថុតាងមួយចំនួនធំ ព្រមទាំងកាំភ្លើងខ្លីចំនួនពីរដើមផងដែរ។

ក្នុងនោះមន្ត្រីអាជ្ញាធរបានបញ្ជាក់ប្រាប់ផងដែរថា ទីតាំងដែលមានយីហោរ ml នេះកន្លងមកកម្លាំងអាវុធហត្ថរាជធានីភ្នំពេញក៏ធ្លាប់បានចុះបង្ក្រាបម្ដងរួចមកហើយ ពាក់ព័ន្ធនឹងករណីដូចគ្នាផងដែរ។

ក្រោយប្រតិបត្តិការកម្លាំងអាជ្ញាធរបាននាំខ្លួនមនុស្សប្រុសស្រីចំនួន១៣៤នាក់ទៅស្នងការដ្ឋាននគរបាលរាជធានីភ្នំពេញ ដើម្បីធ្វើការសាកសួរ និងបំពេញឯកសារដើម្បីអនុវត្តតាមនីតិវិធី៕

អត្ថបទ៖ សុខា