តាយាយពីរនាក់ប្តីប្រពន្ធត្រូវបានស្លាប់យ៉ាងអាថ៌កំបាំងនៅក្នុងផ្ទះរបស់ខ្លួន ដែលសភាពសពស្ទើរតែហើមស្អុយទៅហើយ ទើបមានការភ្ញាក់ផ្អើលឡើង។

ការប្រទះឃើញសពនេះបានកើតឡើងនាថ្ងៃទី​០៧​ ខែ​ឧសភា​ ឆ្នាំ២០២៣​ វេលាម៉ោង១២និង៣០នាទី​ថ្ងៃត្រង់ ចំណុចក្រុមទី១៨​ ភូមិកំពង់ពិល​ ឃុំវត្តតាមិម​ ស្រុកសង្កែ​ ខេត្ត​បាត់ដំបង។​ សពជនរងគ្រោះមានឈ្មោះ​ សូ​ សំអឿន​ ភេទប្រុស​ អាយុ៧៦ឆ្នាំ(ប្តី) និង​ប្រពន្ធឈ្មោះ​ អ៉ិត​ លឿត​ ​អាយុ៦៦ឆ្នាំ​ ។

បើតាមការរៀបរាប់ពីអ្នកជិតខាងបាននិយាយថា ក្រុមគ្រួសារនេះ គឺកូនៗបានបែកគ្រួសារទៅនៅឆ្ងាយៗអស់ហើយ នៅសល់តែតាយាយប៉ុណ្ណោះដែលនៅថែរក្សាផ្ទះ។ ប៉ុន្តែបើតាមអ្នកជិតខាងដែលធ្លាប់ដឹងបានបញ្ជាក់ថា បុរសជាប្តី គឺមានសុខភាពមិនសូវល្អទេដោយមានរោគប្រចាំកាយ។

ជុំវិញការស្លាប់ទាំងប្តីប្រពន្ធនេះ កម្លាំងសមត្ថកិច្ចដែលចុះទៅធ្វើកោសល្យវិច្ចយមិនទាន់ហ៊ានសន្និដ្ឋានបែបណានោះឡើយ ខណៈនៅកំពុងពិនិត្យ និងស្រាវជ្រាវ៕

អត្ថបទ៖ សោ និយមរ័ត្ន