​កម្មករក្រុមហ៊ុនដាំចេក ៦ នាក់ស្លាប់ នៅរតនគិរី សង្ស័យពុល

សេចក្ដីរាយការណ៍បឋមបានឱ្យដឹងថា យ៉ាងហោចណាស់កម្មករបម្រើការងារនៅក្រុមហ៊ុន ថាកូ ចម្ការចេកស្ថិតនៅ ភូមិ៣ ឃុំស្រែអង្គ្រង ស្រុកកូនមុំ ខេត្តរតនគិរី ចំនួន ៦ នាក់បានស្លាប់ សង្ស័យករណីពុល។

បើយោងតាមការសាកសួរព័ត៌មានពីមន្រ្តីមណ្ឌលសុខភាពប្រាប់ថា បុរសអ្នកជំងឺទាំង ៦ នាក់មកទទួលសេវាមានសភាពធ្ងន់ធ្ងរដូចជា សន្លប់ ប្រកាច់ សញ្ញាជីវិតខ្សោយ​ជួនកាលស្ទើគ្មានសញ្ញាជីវិត។

តាមការសាកសួរប្រវត្តិអ្នកជំងឺមានរោគសញ្ញាចុកពោះ ក្អួត ហត់ អស់កម្លាំង ស្រវាំងភ្នែក ភាគច្រើនពួកគាត់បានទទួលទានស្រាជាប្រចាំ ហើយគឺគ្មានប្រវត្តិជំងឺប្រចាំកាយទេ។ ជាទូទៅមុនពេលចេញរោគសញ្ញាអ្នកជំងឺមានសុខភាពធម្មតា ក្រោយចេញរោគសញ្ញាចន្លោះពី៤ទៅ ៦ ម៉ោង បណ្តាលឱ្យអ្នកជំងឺស្លាប់។
     
តាមការសន្និដ្ឋានបឋមអាចបណ្តាលមកពីការពុលចំណីអាហារ ឬពុលសារធាតុគីមី។ បច្ចុប្បន្ន អាជ្ញាធរមូលដ្ឋាន ព្រមទាំងមន្ត្រីជំនាញខេត្ត កំពុងចុះបើកការស៊ើបអង្កេតរកមូលហេតុជាក់លាក់ណាមួយឲ្យប្រាកដ ដែលបណ្ដាលឲ្យមនុស្សស្លាប់ជាបន្តបន្ទាប់ ធ្វើឲ្យមានការភ្ញាក់ផ្អើល និងមានការភ័យខ្លាច ពីសំណាក់ប្រជាពលរដ្ឋ ដែលរស់នៅតំបន់ក្រុមហ៊ុននោះ៕

អត្ថបទ៖ វុទ្ធឦសាន