អធិការរងខណ្ឌព្រែកព្នៅរត់គេច​ពីសមត្ថកិច្ចបង្រ្កាប​​គ្រឿងញៀន ធ្លាក់ពីលើអគារជាន់​ទី ​៣៧​ ដាច់ខ្លួនជាពីរកំណាត់

អធិការរងខណ្ឌព្រែកព្នៅម្នាក់សង្ស័យជួញដូរ និងប្រើប្រាស់សារធាតុញៀនខុសច្បាប់នៅក្នុងបន្ទប់ជាន់ទី ៣៧ នៃអគារស្កាយឡាញ ត្រូវបានកម្លាំងមន្ទីរប្រឆាំងបទល្មើសគ្រឿងញៀន ចុះបង្ក្រាបរហូតដល់ជនរងគ្រោះដែលជាជនសង្ស័យបានព្យាយាមតោងបង្អួច ដើម្បីរត់គេចខ្លួនពីកម្លាំងសមត្ថកិច្ចមន្ទីរប្រឆាំងគ្រឿងញៀនធ្វើឱ្យរបូតដៃធ្លាក់មកខាងក្រោមស្លាប់ភ្លាមៗ​។

ហេតុការណ៍បានកើតឡើងកាលពីវេលាម៉ោង ៦ ព្រឹក ថ្ងៃទី ២០ ខែកញ្ញា ឆ្នាំ២០២៣ ស្ថិតនៅត្រង់ចំណុចអគារ the skyline តាមបណ្ដោយផ្លូវបេតុង ក្នុងសង្កាត់វាលវង់ ខណ្ឌ៧មករា រាជធានីភ្នំពេញ។

ជនរងគ្រោះឈ្មោះ ហឿង ភីរុណ ភេទប្រុស អាយុ​ ២៨ ឆ្នាំ ជនជាតិខ្មែរ មានតួនាទីជាអធិការរងខណ្ឌព្រែកព្នៅ ដែលមាន​ទីលំនៅក្នុងភូមិ​ព្រែកមហាទេព សង្កាត់​ស្វាយប៉ោ ក្រុងបាត់ដំបង ខេត្តបាត់ដំបង​។​

យោងតាមរបាយការណ៍ពីកម្លាំងសមត្ថកិច្ច ជនសង្ស័យ​ជា​អធិការរងខណ្ឌព្រែកព្នៅបានធ្លាក់ពីលើអគារដែលមានឈ្មោះ the skyline ជាន់ទី ៣៧ បណ្ដាលឱ្យធ្លាក់មកដាច់ខ្លួនជាពីរកំណាត់ស្លាប់ភ្លាមៗ ខណៈព្យាយាមតោងបង្អួចដើម្បីគេចខ្លួនពីកម្លាំងសមត្ថកិច្ចប្រឆាំងបទល្មើសជួញដូរគ្រឿងញៀន។

ការ​ចុះបង្រ្កាបបទល្មើសគ្រឿងញៀននៅបន្ទប់ជនរងគ្រោះដែលធ្លាក់នោះ កម្លាំងសមត្ថកិច្ចបានស៊ើបអង្កេតនិងដាក់ការសង្ស័យថា នៅបន្ទប់ជនរងគ្រោះដែលជាជនសង្ស័យកំពុងស្នាក់នៅនេះ​មានបទល្មើសជួញដូរនិងប្រើប្រាស់គ្រឿងញៀន។

យោងតាមការបំភ្លឺរបស់មេសន្តិសុខអគារ ​Skyline នៅម៉ោងកើតហេតុ កម្លាំង​មន្ទីរ​ប្រឆាំង​គ្រឿង​ញៀនបាន​បើក​ប្រតិបត្តិការ​បង្ក្រាបករណីគ្រឿងញៀន។ ពេលនោះជនសង្ស័យ​បានព្យាយាម​គេចឆ្លងតាមបង្អួច ក៏របូតដៃធ្លាក់ទៅក្រោមបណ្ដាល​ឱ្យ​ស្លាប់​។

តាមប្រភពព័ត៌មានពីពលរដ្ឋ​ មុនពេលកើតហេតុគេបានឮសំឡេងធ្លាក់មកខាងក្រោមបង្កការភ្ញាក់ផ្អើលដល់អ្នកនៅម្តុំនោះនាំគ្នារត់ទៅមើល ស្រាប់តែឃើញបុរសម្នាក់បានធ្លាក់មកដល់ដីដោយសភាពដាច់ខ្លួនជាពីរតែម្ដង។ ពេលនោះប្រជាពលរដ្ឋក៏បានរាយការណ៍ទៅកម្លាំងសមត្ថកិច្ចមូលដ្ឋាន​ដើម្បីចុះធ្វើអន្តរាគមន៍។ នៅពេលដែលកម្លាំងសមត្ថកិច្ចបានមកដល់នៅទីតាំងកើតហេតុ បានធ្វើកោសល្យវិច័យទៅលើសាកសព និងទំនាក់ទំនងឆែករកភស្តុតាង និងមូលហេតុនៃការធ្លាក់ដោយ​សមត្ថកិច្ចថា ការធ្លាក់របស់ជនរងគ្រោះគឺជាអំពើធ្វើអត្តឃាតខ្លួនឯងដោយលោតចុះពីលើអគារ។

ក្រោយពេលកើតហេតុ កម្លាំងសមត្ថកិច្ចបានយកសាកសពទៅតម្កល់ទុកនៅវត្តស្ទឹងមានជ័យ ដើម្បីទំនាក់ទំនងទៅក្រុមគ្រួសារមកយកសពទៅធ្វើបុណ្យតាមប្រពៃណី៕

អត្ថបទ៖ សុខា