ស្នងការខេត្ដតាកែវជំរុញដល់អធិការគ្រប់ស្រុកក្រុងធ្វើវេទិកាសាធារណៈដើម្បីបំពេញតម្រូវការរបស់ប្រជាពលរដ្ឋ

លោកឧត្ដមសេនីយ៍ទោ ម៉ែន លី ស្នងការនៃស្នងការដ្ឋាននគរបាលខេត្ដតាកែវ បានជំរុញដល់បណ្ដារអធិការគ្រប់ស្រុកក្រុងទាំងអស់នៅក្នុងភូមិសាស្ត្រខេត្ដតាកែវ ធ្វើវេទិកាសាធារណៈដោយសហការជាមួយអាជ្ញាធរមូលដ្ឋាន ដើម្បីចង់ដឹងពីកង្វល់ និងបំពេញតម្រូវការរបស់ប្រជាពលរដ្ឋ ផ្សព្វផ្សាយអំពីសន្តិសុខសណ្ដាប់ធ្នាប់ និងទប់ស្កាត់រាល់បទល្មើសផ្សេងៗដែលកើតមាននៅក្នុងមូលដ្ឋាន។ 

លោកស្នងការលើកឡើងបែបនេះក្នុងពេលដែលលោករួមជាមួយលោកស្នងការរង ចុះជួបសំណេះសំណាលជាមួយកងកំលាំងនគរបាលនៃអធិការដ្ឋានស្រុកបូរីជលសារ ខេត្ដតាកែវ កាលពីព្រឹកថ្ងៃទី២២ ខែសីហា ឆ្នាំ២០២៤ នៅអធិការនគរបាលស្រុកបូរីជលសារ។ 

លោកឧត្ដមសេនីយ៍ទោ ម៉ែន លី ក៏បានធ្វើការណែនាំដល់លោកអធិការ អធិការរង គ្រប់ស្រុកក្រុងទាំងអស់នៅក្នុងខេត្ដតាកែវ ចាប់ពីពេលនេះតទៅ ត្រូវមានគំនិតមួយជាគោលជំហរថា យើងត្រូវធ្វើយ៉ាងដូចម្ដេចដើម្បីមានសេចក្ដីសុខសាន្ត សម្រាប់ប្រជាពលរដ្ឋនៅមូលដ្ឋានរបស់យើង។ ដូច្នេះក្នុងនាមយើងជាមន្ត្រីនគរបាលយុត្តិធម៌ ជាម្ចាស់នៃស្រុកនីមួយៗ ត្រូវក្ដាប់កំលាំងអោយមូលនៅក្នុងដៃ ដើម្បីពង្រឹងលើការងារសន្តិសុខផ្ទៃក្នុង ការសាម្គីភាព អនុវត្តតាមគោលនយោបាយភូមិឃុំមានសុវត្តិភាព អោយបានល្អប្រសើរ ទើបធ្វើអោយប្រជាពលរដ្ឋមានជំនឿទុកចិត្តលើកងកំលាំងនគរបាលរបស់យើង៕

អត្ថប៖ វីរៈ