មេភូមិស្វាយតាអុក១ និងប្រជាពលរដ្ឋ​រៃលុយគ្នាទិញប្រេងចាក់ម៉ាសុីនបូមទឹកចេញពីផ្លូវ

លោក ឡុង សុខុម មេភូមិស្វាយតាអុក១ បានឲ្យដឹងថា អស់រយៈពេល២ថ្ងៃហើយលោកបានយកម៉ាសុីនបូមទឹកមកដាក់បូមទឹកចេញពីផ្លូវដែលរងការលិចលង់ដើម្បីឲ្យប្រជាពលរដ្ឋក្នុងភូមិងាយស្រួលក្នុងការធ្វើដំណើរ។

លោកមេភូមិបានបញ្ជាក់ប្រាប់ថា ផ្លូវដែលរងការលិចលង់ គឺស្ថិតនៅផ្លូវទួលបាយ៉ាប ក្នុងភូមិស្វាយតាអុក១ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ។ អ្វីដែលលោកមេភូមិមានក្តីរំភើបនោះ គឺដំណើរការក្នុងការបូមទឹកដោយទទួលបានពីការចូលរួមពីប្រជាពលរដ្ឋ ក្នុងនោះគឺខ្លះចេញប្រេង ខ្លះទៀតចេញថវិកាសម្រាប់ទិញប្រេង និងខ្លះទៀតចេញម្ហូបចំណីសម្រាប់ឲ្យក្រុមការងារដែលចុះបូមទឹកបានទទួលទាន។

ទោះជាយ៉ាងណាក៏លោក ឡុង សុខុម មេភូមិស្វាយតាអុក១បានបញ្ជាក់ថា រហូតមកដល់ថ្ងៃទី២០ ខែវិច្ឆិកាក៏បន្តបូមឲ្យទាល់តែរីងស្ងួតដើម្បីឲ្យប្រជាពលរដ្ឋលោកធ្វើដំណើរទៅបំពេញការងារ រកសុីទទួលទានរៀងៗខ្លួនបានងាយស្រួល។ ក្នុងនោះលោកមេភូមិសូមកោតសសើរដល់សណ្តានចិត្តប្រជាពលរដ្ឋដែលបានចូលរួមចំណាយថវិកាទិញប្រេងដាក់ម៉ាសុីន​បូមទឹកទៀតផង៕

អត្ថបទ៖ នរា