នាយកដ្ឋានប្រឆាំងបទល្មើសសេដ្ឋកិច្ច កោះហៅលោក សាន សាធុកា​ ឲ្យចូលបំភ្លឺក្រោយរងការ​ចោទ​ប្រកាន់រឿងជំរិតទារប្រាក់

នាយកដ្ឋាននគរបាលប្រឆាំងបទល្មើសសេដ្ឋកិច្ច នៃអគ្គស្នងការដ្ឋាននគរបាលជាតិ បានកោះហៅលោកវរសេនីយ៍ទោ សាន សាធុកា អនុប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច ឲ្យចូលបំភ្លឺ ក្រោយរងការចោទប្រកាន់ថា បានជំរិតទារលុយពីប្រជាពលរដ្ឋចំនួន ៥០០ដុល្លារ សហរដ្ឋអាមេរិក ដែលជាអ្នករកស៊ីមុខរបរលក់ផលិតផលតាម​អន​ឡាញបន្តិចបន្តួច។

ការកោះហៅនេះ ធ្វើឡើងបន្ទាប់ពីមានគណនីហ្វេងប៊ុកមួយចំនួន បានបង្ហោះផ្សព្វផ្សាយលើនៅបណ្ដាញសង្គម ហើយក៏បានការចែករំលែកយ៉ាងផុសផុលផងដែរ។

តាមសេចក្ដីបំភ្លឺរបស់នាយកដ្ឋាននគរបាលប្រឆាំងបទល្មើសសេដ្ឋកិច្ច បានឲ្យដឹងនៅព្រឹកថ្ងៃទី២២ ខែមេសា ឆ្នាំ២០២៥​នេះថា បន្ទាប់ពីបានពិនិត្យឃើញមានការបង្ហោះផ្សព្វផ្សាយព័ត៌មានខាងលើ នាយកដ្ឋាននគរបាលប្រឆាំងបទល្មើសសេដ្ឋកិច្ច បានធ្វើការចាត់តាំងសមាសភាពក្រុមការងារដើម្បីធ្វើការស្រាវជ្រាវ ស៊ើបអង្កេត ប្រមូលព័ត៌មាន និងបានធ្វើការកោះហៅលោកវរសេនីយ៍ទោ សាន សាធុកា ឋានៈ អនុប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច មកធ្វើការសាកសួរបំភ្លឺជុំវិញករណីខាងលើ ដើម្បីនាយកដ្ឋានមានមូលដ្ឋានច្បាស់លាស់ក្នុងការអនុវត្តនីតិវិធីបន្ត។

បើតាមនាយកដ្ឋាននគរបាលប្រឆាំងបទល្មើសសេដ្ឋកិច្ច នាពេលថ្មីៗកន្លងទៅនេះនៅលើបណ្តាញទំនាក់ទំនងសង្គម (Facebook) មួយចំនួន មានការបង្ហោះផ្សព្វផ្សាយព័ត៌មានដែលមានខ្លឹមសារថា “លោកវរសេនីយ៍ទោ សាន សាធុកា ហៅ (ធន់ សាធុកា) អនុប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច នៃអគ្គស្នងការដ្ឋាននគរបាលជាតិ ក្រសួងមហាផ្ទៃ រងការចោទប្រកាន់ថា បានជំរិតលុយប្រជាពលរដ្ឋ ដែលរកស៊ីមុខរបរលក់ផលិតផលតាមអនឡាញបន្តិចបន្តួច ដើម្បីចិញ្ចឹមក្រពះចំនួន ៥០០ដុល្លារ សហរដ្ឋអាមេរិក។

បន្ទាប់ពីមានការបង្ហោះផ្សព្វផ្សាយព័ត័មាននេះ មានអ្នកលេងបណ្ដាញសង្គមជាច្រើនបានចែករំលែកព័ត៌មានជាបន្តបន្ទាប់ ហើយមានអ្នកខ្លះក៏បានចូលទៅបញ្ចេញមតិ (ខមិន) ថា ក្រុមខ្លួនក៏ធ្លាប់អស់ប្រាក់ដោយសារគាត់ដែរ៕

អត្ថបទ៖ សុខុម