កុងស៊ីកាប់ជ្រូកមួយកន្លែងក្នុងផ្សារស្វាយព្រៃ កំពុងបង្កផល​ប៉ះពាល់ដល់ពលរដ្ឋដោយសារក្លិនស្អុយ

កុងស៊ីសត្តឃាតរបស់លោក ឆាយ ស្ថិតនៅក្នុងផ្សារស្វាយព្រៃ ឃុំលំចង់ ស្រុកសំរោង ខេត្តតាកែវ កំពុងបង្កផលប៉ះពាល់ដល់ការរស់នៅរបស់ប្រជាពលរដ្ឋជាច្រើនគ្រួសាររាប់ឆ្នាំមកហើយ។

ដោយអត់ទ្រាំនឹងក្លិនស្អុយ ឆ្អេះឆ្អាបសាយភាយចេញពីកន្លែងសត្តឃាត់កណ្តាលទីប្រជុំជនក្នុងផ្សារស្វាយព្រៃ ក្រុមប្រជាពលរដ្ឋសូមសំណូមពរដល់អាជ្ញាធរជួយរកដំណោះស្រាយពួកគាត់ផង ទាំងដែលកន្លងមកពួកគាត់បានរាយការណ៍ទៅអាជ្ញាធរឃុំលំចង់ជួយអន្តរាគមន៍ដែរ តែស្ងាត់សូន្យឈឹងដូចត្រូវថ្នាំម្ចាស់កុងស៊ីសត្តឃាត។

ក្រុមប្រជាពលរដ្ឋលើកឡើងថា ទីតាំងសត្តឃាតនេះ មិនថា ថ្ងៃឬយប់ទេ គឺជះក្លិនស្អុយ ឆ្អេះឆ្អាបពិបាកដកដង្ហើមណាស់ ព្រោះជាទីតាំងគ្មានកន្លែងបង្ហូរទឹកចេញ គឺនៅក្បែរផ្ទះពួកគាត់តែម្តង។ ងាកទៅម្ចាស់កុងស៊ីវិញ ពេលពួកគាត់សុំឲ្យមានការផ្លាស់ប្តូរទីតាំង បែរជាខឹងប្រជាពលរដ្ឋវិញ ហើយរុញឲ្យទៅប្តឹងដល់ណាដល់ទៅ គាត់មិនខ្លាចទេ ទាំងដែលទីតាំងគាត់កំពុងជះក្លិនស្អុយអាសោចរំខានដល់ការរស់នៅរបស់ពួកគាត់រាល់ថ្ងៃ រាប់ឆ្នាំមកហើយ។ ក្រុមប្រជាពលរដ្ឋសុំស្នើទៅលោក កៅ វគ្គសែល អភិបាលស្រុកសំរោង ជួយអន្តរាគមន៍ដោះស្រាយពួកគាត់ផង ព្រោះទីតាំងសត្តឃាតនេះ បង្កផលប៉ះពាល់ដល់ការរស់នៅពួកគាត់ជិត២០ឆ្នាំមកហើយ។

ពាក់ព័ន្ធទីតាំងសត្តឃាតនេះ លោកមេឃុំលំចង់មិនអាចសុំការបំភ្លឺបានទេ ដោយទូរសព្ទមិនចូល។ ចំណែកលោក កៅ វគ្គសែល អភិបាលស្រុកសំរោង ក៏មិនអាចទាក់ទងសុំការបំភ្លឺបានដែរនៅព្រឹកថ្ងៃទី២៨ ខែមេសា ឆ្នាំ២០២៥ ដោយហៅទូរស័ព្ទមិនចូល៕

អត្ថបទ៖ វីរៈ