យករថយន្ដឲ្យជាងជួសជុល បើកបានពាក់​កណ្ដាលផ្លូវឆ្លងចរន្ដឆេះមួយចំណាត់មុខ

រថយន្តមួយគ្រឿងម៉ាក KIA CARINVAL ត្រូវបានអណ្ដាលភ្លើងឆាបឆេះមួយកំណាត់មុខទាំងស្រុង ក្រោយពីម្ចាស់​បើកបានពាក់កណ្ដាលផ្លូវបំណងយកទៅឲ្យជាងជួសជុលប្រព័ន្ធកម្ដៅ។

ករណីនេះបានកើតឡើងនៅវេលាម៉ោង០៩និង១០នាទីព្រឹក ថ្ងៃទី១៧ ខែមិថុនា ឆ្នាំ២០២៥ តាមបណ្ដោយផ្លូវលេខ២១A នៅចំណុចភូមិត្រើយត្រឹង្ស ឃុំព្រែកអំបិល ស្រុកស្អាង ខេត្តកណ្ដាល។ រថយន្ដដែលត្រូវអណ្ដាតភ្លើងឆាបឆេះមួយកំណាត់​មុខនេះម៉ាក KIA CARINVAL ពណ៍ស ពាក់ផ្លាកលេខ2AX-9555។

បើតាមប្រភពពីម្ចាស់រថយន្តបានអោយដឹងថា មុនពេលកើតហេតុ គាត់បានបើករថយន្ដរបស់គាត់ពីកោះធំ ទៅស្អាងព្រែកតូច ក្នុងគោលបំណងយករថយន្ដឲ្យជាងជួលជុលប្រព័ន្ធកម្ដៅ នៅស្អាងព្រែកតូច។ លុះពេលបើកមកដល់ចំណុចកើតហេតុខាងលើ ក៏ឃើញរថយន្ដលោតសញ្ញាឡើងកម្ដៅ និងហុយផ្សែងចេញពីផ្នែកខាងមុខ ទើបឈប់មើល ស្រាប់តែរថយន្ដឆេះ និងហុយផ្សែងយ៉ាងខ្លាំង ទើបស្រែកឆោឡោឲ្យគេជួយពន្លត់។ ភ្លាមៗប្រជាពលរដ្ឋក៏បានទាក់ទងហៅរថយន្តពន្លត់អគ្គិភ័យមកជួយបាញ់ពន្លត់ទាន់ពេលវេលាទើបខូចខាតតែមួយកំណាត់ផ្នែកខាងមុខ។

ក្នុងប្រតិបត្តិការបាញ់ពន្លត់អគ្គិភ័យឆាបឆេះរថយន្តនេះ សមត្ថកិច្ចបានប្រើប្រាស់ទឹកអស់ចំនួន០១ឡាន ស្មើនឹងប្រាំពីរម៉ែត្រគូប ទើបគ្របគ្រងស្ថានការណ៍បានទាំងស្រុង៕

អត្ថបទ៖ ម៉េង