ឆេះសំណង់ផ្ទះល្វែងដែលគេសង់ទុកចោល ដោយសារជនអនាថាដុតខ្សែភ្លើងយកស្ពាន់

ផ្ទះល្វែងដែលគេសាងសង់ទុកចោលមួយកន្លែងត្រូវបានអគ្គិភ័យឆាបឆេះយ៉ាងសន្ធោសន្ធៅ ដោយសារក្រុមជនអនាថាដុតខ្សែភ្លើងយកស្ពាន់បង្កការភ្ញាក់ផ្អើល ខណៈក្រុមបង្កគេចខ្លួនបាត់។

ហេតុការណ៍នេះកើតឡើងកាលពីវេលាម៉ោង០៩និង៥០នាទីយប់ថ្ងៃទី១៧ ខែមករា ឆ្នាំ២០២៦ នៅតាមបណ្តោយផ្លូវលេខ ៦៦៦ ក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ។

តាមប្រភពព័ត៌មានពីប្រជាពលរដ្ឋបានអោយដឹងថា មុនកើតហេតុគេបានឃើញជនអនាថាមានគ្នា ០២-០៣នាក់ បានយកខ្សែភ្លើងចាស់ៗ ជាច្រើនមកដុតក្នុងផ្ទះដែលគេសង់ទុកចោលបណ្ដាលឲ្យហុយផ្សែងបង្កការភ្ញាក់ផ្អើលពេញម្តុំបឹងសាឡាងតែម្តង។ លុះមួយសន្ទុះក្រោយមក ក៏មានអណ្តាតភ្លើងយ៉ាងសន្ធោរសន្ធៅបង្កការផ្អើលឆោឡោដល់អ្នករស់នៅក្បែរនោះ រាយការណ៍ជូនសមត្ថកិច្ចមូលដ្ឋាន ចំណែកជនអនាថាដែលដុតបាននាំគ្នារត់គេចខ្លួនបាត់ស្រមោល។

អគ្គិភ័យនេះដែរបានបង្កអណ្តាតភ្លើងរោលដល់សំណង់ផ្ទះល្វែងនោះមួយផ្នែកធំ តែមិនបង្កភាពធ្ងន់ធ្ងរនោះឡើយ និង ប្រើប្រាស់រថយន្តពន្លត់របស់ស្នងការដ្ឋាននគរបាលរាជធានីភ្នំពេញ ចំនួន ០៣គ្រឿង បាញ់អោយរលត់ជាស្ថាពរ ។ ចំពោះមូលហេតុ សមត្ថកិច្ចបានបញ្ជាក់អោយដឹងថា មកជនអនាថា ដុតខ្សែភ្លើងយកស្ពាន់ បណ្តាលអោយកើតជាអគ្គិភ័យ៕

អត្ថបទ៖ រដ្ឋា