ស្ពានព្រែកតាអុក ឃុំអណ្តូងទឹក កំពុងរងការ​ខូចខាត ព្រោះតែការដឹកលើសទម្ងន់

ស្ពានព្រែកតាអុក ស្ថិតនៅក្នុងឃុំអណ្តូងទឹក ស្រុកបូទុមសាគរ ខេត្តកោះកុង បាននិងកំពុងរងការខូចខាតយ៉ាងដំណំ ព្រោះតែក្រុមរថយន្តដឹកដី ខ្សាច់ និងថ្ម លើសទម្ងន់កំណត់ ទោះបីជាកន្លងទៅមានការណែនាំហាមឃាត់ពីអាជ្ញាធរមន្រ្តីជំនាញក៏ដោយ។

យ៉ាងហោចណាស់ មានសសរស្ពានចំនួន៤កន្លែងបានប្រេះស្រាំ និងធ្នឹមស្ពាន១កន្លែងនៃស្ពានព្រែកតាអុក បានរងការខូចខាតយ៉ាងដំណំ ដោយសារតែក្រុមរថយន្តធំៗដឹកលើសទម្ងន់កំណត់ចាប់ពីវិថីសាយភូថង ឆ្ពោះទៅកាន់ឃុំថ្មស។

លោក ជីវី ណា ប្រធាននាយកដ្ឋានផ្លូវល្បឿនលឿននៃក្រសួងសាធារណការ និងដឹកជញ្ជូន បានឱ្យដឹងក្រោយចុះមកត្រួតពិនិត្យគុណភាពស្ពានព្រែកតាអុក កាលពីថ្ងៃទី១០ ខែកញ្ញា ឆ្នាំ២០២៥ថា ស្ពាននេះពិតជាប្រេះបែកធ្ងន់ធ្ងរមែននៅចំណុចគល់សសរ និងធ្នឹមស្ពាន។ ការពិនិត្យយ៉ាងហ្មត់ចត់ណាស់ ហើយលោកបានធ្វើការបាញ់ ស្ទុង តាមស្តង់ដារ ផ្អែកសសរនិមួយៗ និងធ្នឹមទ្រស្ពាន។

លោក ជីវីណា និងក្រុមការងាររបស់លោក រួមសហការជាមួយមន្ទីរសាធារណការខេត្ត លើកឡើងថា ការសាងសង់ស្ពាននេះត្រូវខ្នាតស្តង់ដារបស់គេហើយ។ ប៉ុន្តែដោយសារ ការដឹកជញ្ជូនលើសទម្ងន់ពេក។ លោក សង្កត់ធ្ងន់ថា លោក និងក្រុមការងារនឹងធ្វើរបាយការណ៍មួយគោរពជូនរដ្ឋមន្រ្តីក្រសួង ដើម្បីពិនិត្យ និងមានវិធានការបន្ត។

ស្ពានព្រែកតាអុក មានប្រវែង១២៦ម៉ែត្រ ទទឹង ៨ម៉ែត្រ ជាគម្រោងសាងសង់របស់ ក្រសួងសាធារណការនិងដឹកជញ្ជូន ស្ថាបនាដោយនាយកដ្ឋានវិស្វកម្មក្រសួងការពារជាតិ។ ស្ពាននេះសាងសង់នៅឆ្នាំ២០១១ ធ្វើរួចរាល់នៅឆ្នាំ២០១៤ បើគិតអាយុកាលបានត្រឹមតែ១១ឆ្នាំ។

កន្លងទៅ ប្រជាពលរដ្ឋដែលរស់នៅឃុំអណ្តូងទឹក និងឃុំថ្មស សម្តែងការព្រួយបារម្ភយ៉ាងខ្លាំងអំពីស្ថានភាពឡានដឹកដែក ថ្ម ខ្សាច់ ស៊ីម៉ងត៍ រត់តកន្ទុយគ្នា ហើយណាមួយទៀត រថយន្តធុនធំនេះ បានឈប់លើស្ពាននេះជាច្រើនគ្រឿងទៀត ខណៈឡានឡើងចំណោតមិនរួច៕

អត្តបទ៖ សិរីវឌ្ឍនៈ