កីឡា

កំពូលអ្នកកីឡាកាស Jinder Mahal និង John Cena ចាប់អារម្មណ៍ការប្រកួតខ្សែក្រវាត់ Bhulla ថ្ងៃសៅរ៍នេះ

បានផុស

៣ years មុន

នៅ

ថ្ងៃសុក្រ ១៤ ឧសភា ២០២១

ដោយ

កំពូលអ្នកប្រដាល់ទម្ងន់ធ្ងន់ Arjan Bhulla ប្តេជ្ញាធ្វើឲ្យក្លាយជាជនជាតិឥណ្ឌាទី១ដែលឈ្នះខ្សែក្រវាត់គុនចម្រុះពិភពលោកក្នុងប្រវត្តិសាស្ត្រប្រទេសមួយនេះសម្រាប់ការប្រកួតនាចុងសប្តាហ៍នេះ។

អ្នកលេងគុនចម្រុះឥណ្ឌា Arjan Bhulla មានភារកិច្ចធ្ងន់នៅពេលដែលគាត់ត្រូវឡើងប្រជែងខ្សែក្រវាត់គុនចម្រុះពិភពលោកពីអធិរាជសង្វៀនយូរអង្វែង Brandon Vera នៅព្រឹត្តិការណ៍ ONE: Dangal នាល្ងាចថ្ងៃសៅរ៍ ទី១៥ ខែឧសភានេះ នៅប្រទេសសិង្ហបុរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មុនការប្រកួតមកដល់ Arjan Bhulla ទទួលបានការគាំទ្រយ៉ាងធំសម្បើមពីកំពូលតារាកីឡាកាស WWE កីឡាករ Jinder Mahal។

ជាមួយគ្នានេះ អតីតជើងឯកកីឡាកាស WWE ១៣សម័យកាល John Cena ដែលមានកេរ្តិ៍ឈ្មោះល្បីល្បាញទូទាំងពិភពលោកក៏ចាប់អារម្មណ៍នឹងការប្រកួតដណ្តើមខ្សែក្រវាត់ពិភពលោកទម្ងន់ធ្ងន់នេះដែរ។

គ្រាន់តែឃើញការគាំទ្រពីតារាកីឡាកាស Mahal ហាក់ធ្វើឲ្យអ្នកគាំទ្រមានការងឿឆ្ងល់ថា ហេតុអ្វីបានជាអ្នកកីឡាកាសដែលវ៉ៃនៅលើទឹកដីអាមេរិករូបនេះគាំទ្រកីឡាករឥណ្ឌាដែលជាដៃគូរបស់ Brandon Vera ដែលមានសញ្ជាតិហ្វីលីពីន-អាមេរិក។ តាមពិតទៅ អ្នកកីឡាកាសរូបនេះជាមិត្តជិតស្និទ្ធជាមួយ Bhullar ដែលមានកំណើតនៅប្រទេសកាណាដាដូចគ្នា និងមានឈាមជ័រឥណ្ឌាដូចគ្នា។

គេនៅចាំបានថា Mahal ធ្លាប់បានផ្តួលកំពូលអ្នកកីឡាកាស Randy Orton ដើម្បីឈ្នះខ្សែក្រវាត់ពិភពលោក WWE កាលពីថ្ងៃទី២១ ខែឧសភា ឆ្នាំ២០១៧ និងបានក្លាយជាអ្នកកីឡាកាសដែលមានឈាមជ័រឥណ្ឌាទី១ដែលបានក្លាយជាជើងឯកពិភពលោក WWE។

ដូចទៅនឹងមិត្តសម្លាញ់របស់ខ្លួនដែរ Arjan Bhulla អាចនឹងក្លាយជាជនជាតិឥណ្ឌាទី១ដែលបានក្លាយជាជើងឯកគុនចម្រុះពិភពលោកទម្ងន់ធ្ងន់ ប្រសិនបើរូបគេអាចយកឈ្នះម្ចាស់ខ្សែក្រវាត់ពិភពលោក Brandon Vera បាន។

អតីតជើងឯកពិភពលោក WWE បាននិយាយក្នុងវីដេអូឃ្លីបខ្លីមួយថា ៖«នេះជាសករាជថ្មីរបស់ Maharaja’ Jinder Mahal ហើយខ្ញុំចង់ផ្តល់ការគាំទ្រជាពិសេសដល់មិត្តសម្លាញ់ Arjan ‘Singh’ Bhullar សម្រាប់ការប្រកួតដ៏ពិសេសនេះ»។

«សំណាងល្អសម្លាញ់។ សម្លាញ់តំណាងឲ្យប្រជាជនឥណ្ឌា១.៣ប៊ីលាននាក់ ហើយសូមនាំយកខ្សែក្រវាត់ពិភពលោកទម្ងន់ធ្ងន់ទៅទឹកដីប្រទេសឥណ្ឌា។ ជូនពរឲ្យទទួលបានជោគជ័យ»។

ចំណែកអតីតកំពូលអ្នកកីឡាកាស John Cena ក៏ចាប់អារម្មណ៍សម្រាប់ការប្រកួតដណ្តើមខ្សែក្រវាត់ពិភពលោកនេះដែរ។

Vera បានសួរទៅអតីតជើងឯកពិភពលោក WWE ១៣សម័យកាលថាតើចាប់អារម្មណ៍ប្រដាល់គុនចម្រុះទេមុនពេលគាត់ឡើងការពារខ្សែក្រវាត់ពិភពថ្ងៃសៅរ៍នេះ ហើយ Cena បាននិយាយថា «ខ្ញុំជូនពរលោកសំណាងល្អ។ ខ្ញុំដឹងថា ប្រឹងប្រែងហាត់កម្រិតណារាល់ពេលមានការប្រកួតម្តងៗ។ វាជាឱកាសដើម្បីឈរលើកំពូល»៕