កីឡា

រឿង សុភ័ណ្ឌ បារម្ភបញ្ហាអាកាសធាតុសម្រាប់ការប្រកួតនៅអង់គ្លេសថ្ងៃអាទិត្យនេះ

បានផុស

៩ ខែ មុន

នៅ

ថ្ងៃពុធ ១៦ តុលា ២០២៤

ដោយ

កីឡាករ រឿង សុភ័ណ្ឌ បានធ្វើដំណើរទៅប្រទេសអង់គ្លេសហើយ ដើម្បីធ្វើការប្រកួតជាមួយកីឡាករ Luke Whelan ក្នុងកម្មវិធី MTGP 90 Fight Night London នៅថ្ងៃអាទិត្យ ទី១៩ ខែតុលា ឆ្នាំ២០២៤ ម៉ោង៧យប់នៅអង់គ្លេស ត្រូវនឹងម៉ោង១:០០ រំលងអាធ្រាត្រ ឈានចូលថ្ងៃទី២០ តុលា នៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកលេងកណ្តាប់ដៃភ្លើងជើងរន្ទះ រឿង សុភ័ណ្ឌ បានប្រាប់ថា មិនមានបញ្ហាចោទខ្លាំងពេលជួបកីឡាករលំដាប់លេខ១ នៅចក្រភពអង់គ្លេសក្នុងទម្ងន់៧០គីឡូក្រាម ទោះបីជា Luke Whelan មានកម្ពស់១.៨៥ម៉ែត្រ។ ចំពោះម្ហូបអាហារនៅតំបន់អឺរ៉ុបមិនមានបញ្ហាអ្វីសម្រាប់រូបគេឡើយ ពីព្រោះខ្លួនចេញធ្លាប់ចេញទៅប្រកួតច្រើនដងហើយ។ ទោះបីជាយ៉ាងណា អាកាសធាតុជាបញ្ហាចម្បងមួយដែលរូបគេព្រួយបារម្ភ។

កីឡាករ រឿង សុភ័ណ្ឌ បានប្រាប់«កម្ពុជាថ្មី»ថា ៖«អ្វីដែលខ្ញុំមានការព្រួយបារម្ភគឺបញ្ហាអាកាសធាតុ ដោយសារខ្ញុំចាញ់ត្រជាក់ ហើយវាអាចប៉ះពាល់ដល់ច្រមុះរបស់ខ្ញុំ ដោយសារខ្ញុំមានបញ្ហារលាកច្រមុះ ប៉ុន្តែខ្ញុំគិតថាវាមិនអីទេ»។

បើនិយាយពីសមាសភាពកីឡាករខ្មែរ៣រូបដែលត្រូវចេញទៅប្រកួតនៅចក្រភពអង់គ្លេស កីឡាករ រឿង សោភ័ណ្ឌ ត្រូវធ្វើការងារធ្ងន់ជាងគេ ដោយត្រូវប៉ះដៃគូខ្ពស់ជាងខ្លួននិងមានប្រវត្តិប្រកួតធ្លាប់ប្រកួតនៅសង្វៀនធំៗស្ទើរទូទាំងពិភពលោកដូចជា សង្វៀនឃីកបុកស៊ីងលំដាប់ពិភពលោក K-1 របស់ជប៉ុន សង្វៀនលំដាប់ពិភពលោក Glory របស់ប្រទេសអង់គ្លេស និងសង្វៀនជាច្រើននៅតំបន់អឺរ៉ុប។

កីឡាករ រឿង សុភ័ណ្ឌ បានបន្ថែមថា៖«ក្នុងនាមជាអ្នកកីឡាគឺគេចមិនរួចទេ ហើយចង់ប្រកួតជាមួយអ្នកអន់ៗដល់ពេលណាទៀត ហើយដល់ពេលដែលត្រូវប្រកួតជាមួយអ្នកលំដាប់ហើយ។ ខ្ញុំក៏ធ្លាប់ជួយអ្នកខ្លាំងៗច្រើន តែយ៉ាងណាក៏ខ្ញុំគិតថា ខ្ញុំអាចធ្វើបាន»៕