កីឡាក្រសួងមហាផ្ទៃ​តំណាងកម្ពុជា ចូលរួមប្រកួតព្រឹត្តិការណ៍កីឡានគរបាល និងកងពន្លត់អគ្គិភ័យ នៅហូឡង់

សហភាពកីឡានគរបាលជាតិកម្ពុជា បាននឹងកំពុងចូលរួមការប្រកួតព្រឹត្តិការណ៍កីឡានគរបាល និងកងពន្លត់អគ្គិភ័យ លើកទី១៩ (The 19th World Police and Fire Games) នៅទីក្រុង Rotterdam ប្រទេសហូឡង់។

ព្រឹត្តិការណ៍នេះ នឹងប្រព្រឹត្តទៅពីថ្ងៃទី២២ ដល់៣១ ខែកក្កដា ឆ្នាំ២០២២ ដោយមានកីឡា ៦៣ប្រភេទដាក់ឱ្យប្រកួត ខណៈប្រភេទកីឡា ដែលសហភាពកីឡានគរបាលជាតិកម្ពុជា បញ្ជូនចេញទៅប្រកួតប្រជែង មាន ៦ប្រភេទរួមមាន តេក្វាន់ដូ WT, វាយសី, វាយកូនឃ្លីលើតុ, ចំបាប់, យូដូ និងការ៉ាតេ ដោយមានប្រតិភូ គ្រូបង្វឹក និងកីឡាករ កីឡាការិនី ចំនួន ២២រូប។

លើស​ពី​នេះ អ្នកចូលរួមប្រកួតប្រជែងមានដល់ទៅជាង ១០,០០០នាក់ មកពី ៧០ប្រទេសផ្សេងៗគ្នាចូលរួមក្នុង WPFG2022។ ពួកគេនឹងប្រកួតក្នុងកីឡាចំនួន៦៣ ដែលរួមមានកីឡាប្លែកៗដូចជា អត្តពលកម្ម, បាល់ទឹក, ទូកខ្លែង និងការប្រកួតពន្លត់អគ្គីភ័យចុងក្រោយ។

ការប្រកួត World Police & Fire Games 2022  នឹង​ប្រើប្រាស់កីឡាជាមធ្យោបាយនៃការបង្កើតការជួបគ្នារវាងអ្នកឆ្លើយតបដំបូង។ លើសពីនេះ គោលបំណងគឺដើម្បីជំរុញទឹកចិត្តកីឡា និងបង្កើតការគោរពចំពោះបុគ្គលិកសង្គ្រោះបន្ទាន់ទាំងអស់ ដែលត្រៀមខ្លួនសម្រាប់ប្រជាជនទាំងយប់ទាំងថ្ងៃ។

ចំពោះអង្គភាពកីឡាក្រសួងមហាផ្ទៃ បានធ្វើដំណើរទៅដល់ប្រទេសហូឡង់ហើយ និងត្រៀមខ្លួនប្រកួតនៅថ្ងៃទី២២ (ម៉ោងនៅហូឡង់) ត្រូវនឹងថ្ងៃទី២៣ ខែកក្កដា ម៉ោងនៅកម្ពុជាយប់នេះ៕

អត្ថបទ ៖ មន្នីរ័ត្ន