កម្ពុជា រំពឹងដណ្តើមបានមេដាយមាស៣គ្រឿង​ពីការប្រកួតកីឡាអាស៊ានប៉ារ៉ាហ្គេម នៅឥណ្ឌូណេស៊ី

កម្ពុជា បានដាក់ក្ដីរំពឹងក្នុងការដណ្តើមបានមេដាយមាស ចំនួន៣គ្រឿង ពីការប្រកួតក្នុងព្រឹត្តិការណ៍កីឡា​អាស៊ានប៉ារ៉ាហ្គេម លើកទី១១ ឆ្នាំ២០២២ នៅឥណ្ឌូណេស៊ី។ នេះបើតាមការបញ្ជាក់ដោយលោក យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា ថ្លែងក្នុងសន្និសីទសារព័ត៌មានកាលពីពេលថ្មីៗនេះ។

ព្រឹត្តិការណ៍កីឡាអាស៊ានប៉ារ៉ាហ្គេម លើកទី១១ ឆ្នាំ២០២២ នឹងចាប់ផ្ដើមពីថ្ងៃទី៣០ ខែកក្កដា ហើយនឹងបញ្ចប់​នៅថ្ងៃទី០៦ ខែសីហា ឆ្នាំ២០២២ ដោយកម្ពុជានឹងបញ្ជូន១១ប្រភេទកីឡា ក្នុងចំណោម ១៤ប្រភេទ រួមមាន អត្តពលកម្ម, ហែលទឹក, បាល់ទះអង្គុយបុរស និងនារី, បាល់បោះរទេះបុរស និងនារី, បាល់បោះជនពិការភ្នែក, បាល់ទាត់៧ម្ខាង (ចលករខួរក្បាល), វាយកូនឃ្លីលើតុ, វាយសី, លើកទម្ងន់, អុក និងប៊ូស្យា។

លោក យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា ដដែលបានឱ្យដឹងថា សម្រាប់ព្រឹត្តិការណ៍​អាស៊ានប៉ារ៉ាហ្គេម លើកទី១១នេះ កម្ពុជា អាចនឹងដណ្តើមបានមេដាយមាស ៣គ្រឿង រួមទាំងប្រាក់ និងសំរិទ្ធជា​ច្រើនគ្រឿងទៀត តែឆ្នាំ២០២២នេះ កម្ពុជាមានវិញ្ញាសាឯកត្តជន ១២២ និងវិញ្ញាសាជាក្រុម១១ សរុប ១៣៣វិញ្ញាសា។ «យើងរំពឹងទុកថា នឹងបំបែកកំណត់ត្រាចាស់ឆ្នាំ២០១៧ ជាមួយនឹងកំណត់ត្រាថ្មី មេដាយមាស ៣គ្រឿង និងមេដាយប្រាក់ ប្រហែល១០គ្រឿង និងសំរិទ្ធ១៥គ្រឿងផងដែរ លើ៤ប្រភេទកីឡា ក្នុងចំណោម១១ប្រភេទកីឡា។ ក្រោមការយកចិត្តទុកដាក់របស់មជ្ឈមណ្ឌលជាតិហ្វឹកហ្វឺនកីឡា និងក្រសួងអប់រំ យុវជន និងកីឡា និងសកម្មភាពហ្វឹកហាត់យ៉ាងខ្លាំងរបស់អត្តពលិកជនពិការកម្ពុជា។» នេះជាការបញ្ជាក់របស់លោក យី វាសនា។

សូមរំឮកថា កម្ពុជា ធ្លាប់ធ្វើបានល្អបំផុតក្នុងព្រឹត្តិការណ៍កីឡាអាស៊ានប៉ារ៉ាហ្គេម កាលពីលើលទី៧ ឆ្នាំ២០១៤ នៅប្រទេសមីយ៉ាន់ម៉ា ដោយរកមេដាយសរុប ៩គ្រឿង ក្នុងនោះមាស ៣គ្រឿង ប្រាក់ ៤គ្រឿង និងសំរឹទ្ធិ ២គ្រឿង។ ដោយឡែកលើកចុងក្រោយ កាលពីឆ្នាំ២០១៧ កម្ពុជា រកមេដាយប្រាក់៥ និងសំរឹទ្ធ៥៕

អត្ថបទ៖ មន្នីរ័ត្ន