កីឡា

ដោនថោន បញ្ចប់ភារកិច្ចក្នុងពានក្លិបបាល់ទាត់ហ្វូតសាលអាស៊ាន ដោយរកបាន ៣ពិន្ទុក្នុងពូល

បានផុស

៥ ខែ មុន

នៅ

ថ្ងៃអង្គារ ៦ កញ្ញា ២០២២

ដោយ

ក្រុមតំណាងកម្ពុជា ដោនថោនស្ពត បានបញ្ចប់ភារកិច្ចក្នុងពានរង្វាន់ក្លិបបាល់ទាត់ហ្វូតសាលអាស៊ាន (AFF Futsal Cup 2022) ធ្វើនៅប្រទេសថៃ ជាផ្លូវការហើយ ត្រឹមថ្ងៃទី០៦ ខែកញ្ញានេះ ដោយបានត្រឹម ៣ពិន្ទុក្នុងពូល A។

ថ្ងៃចុងក្រោយនេះ ដោនថោន ត្រូវជួបប្រកួតជាមួយក្រុមខ្លាំង និងជាម្ចាស់ផ្ទះថៃ Hongyen Thakam ប៉ុន្តែលទ្ធផលបញ្ចប់ទៅដោយបានចាញ់ ១១-២។ ក្នុងការប្រកួតវគ្គទី១ ដោនថោន បានបើកការនាំមុខមុនលើក្រុម Hongyen Thakam នៅនាទី១ ដោយសារកីឡាករថៃធ្វើឱ្យចូលទីដោយខ្លួនឯង ប៉ុន្តែគេក៏បានវាយបកត្រលប់មកវិញ ៣គ្រាប់ផ្ទួនៗ ធ្វើឱ្យបញ្ចប់វគ្គទី១ Hongyen Thakam នាំមុខដោនថោន ៣-១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាមិញនៅវគ្គទី២ Hongyen Thakam បានបន្ថែមគ្រាប់បាល់ដល់ទៅ ៨គ្រាប់ ខណៈដោនថោន សងវិញបានតែ ១គ្រាប់ប៉ុណ្ណោះ និងរក្សាលទ្ធផលចុងក្រោយ ១១-២ ដល់ចប់ការប្រកួតជាផ្លូវការ។

បរាជ័យនេះធ្វើឱ្យដោនថោន ឈរនៅលេខ៣ ជាផ្លូវការក្នុងតារាង មាន៣ពិន្ទុ លើក្រុមលេខ៤ ព្រុយណេ ដែលមិនដែលឈ្នះសោះ ហើយក្រុមរបស់ថៃ ជាមួយ ឥណ្ឌូនេស៊ី ដឹកដៃគ្នាឡើងវគ្គពាក់កណ្ដាលផ្ដាច់ព្រ័ត្រ៕

អត្ថបទ ៖ មន្នីរ័ត្ន