គ្រាន់តែបង្ហើបឃ្លាអន្ទងក្នុងបទ «មនសិការជាតិខ្មែរ» អ្នកគាំទ្រ ខេមរៈ សិរីមន្ត ពោលសរសើរគ្រប់គ្នា

តាមរយៈបទ «មនសិការជាតិខ្មែរ» តារាចម្រៀងប្រុសលំដាប់ប្រទេស ខេមរៈ សិរីមន្ត បានបង្ហើបប៉ុន្មានឃ្លាពីបទថ្មីខ្លួន ធ្វើឱ្យមហាជនដែលជាអ្នកគាំទ្រ មានការស្ញប់ស្ញែងជាខ្លាំងចំពោះការបង្ហើរសូរស័ព្ទសំនៀងដ៏គ្រលួចរណ្តំលើឃ្លោងឃ្លាពេញដោយអត្ថន័យ។

ជាមួយឃ្លាអន្ទងព្រលឹងបុព្វបុរសខ្មែរ និងទសបារមីដែលខ្មែរតែងមានជំនឿលើ បានធ្វើឱ្យសាធារណជនជាច្រើនពោលថា “ស្តាប់ហើយព្រឹ” ព្រោះសំឡេងតារាចម្រៀងរូបនេះធ្ងន់ល្អ ហើយផ្សំនឹងឃ្លោងឃ្លាពេញដោយថាមពលដាស់ដួងព្រលឹងដូនតាខ្មែរ ធ្វើឱ្យការបង្ហើបឃ្លានេះកាន់តែអស្ចារ្យ។

កាលពីព្រឹកថ្ងៃទី១៦ ខែកក្កដា កំពូលតារាចម្រៀងជួរមុខកម្ពុជារូបនេះ ក្រុមការងារ និងក្រុមគ្រួសារ បានរៀបចំធ្វើពិធីក្រុងពាលីសុំពរជ័យនៅទីតាំងប្រាសាទអង្គរវត្ត។ បើតាមការបញ្ជាក់ឱ្យដឹង សម្រាប់ការធ្វើពិធីក្រុងពាលីនេះ​ គឺបង្ហាញពីស្មារតីសាមគ្គីរួមគ្នាជាធ្លុងតែមួយ ដើម្បីលើកទឹកចិត្តដល់វីរកងទ័ពរបស់កម្ពុជា ដែលកំពុងឈរជើងការពារបូរណភាពទឹកដីដ៏អង់អាចក្លាហាន នៅតាមបន្ទាត់ព្រំដែនកម្ពុជា-ថៃ។

មិនតែប៉ុណ្ណោះ គឺដើម្បីបួងសួងដល់បុព្វបុរសគ្រប់ជំនាន់ និងវត្ថុស័ក្ដិសិទ្ធិទាំងអស់ ជួយដល់កងទ័ពកម្ពុជាឈ្នះអស់មារសត្រូវ ព្រមនិងសុំសុខសួស្តីដល់ការថត MV ថ្មី បទ «មនសិកាជាតិខ្មែរ» ផងដែរ។ ខណៈ MV ចម្រៀងកំពុងផលិតនៅទីតាំងទឹកដីវប្បធម៌ និងប្រវត្តិសាស្ត្រកម្ពុជា ហើយត្រៀមចេញឆាប់ៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួរជម្រាបថា ក្រោយការប៉ះទង្គិចគ្នារវាងទាហានកម្ពុជា និងទាហានថៃ កាលព្រឹកថ្ងៃទី ២៨ខែឧសភា ឆ្នាំ២០២៥ ស្ថិតនៅចំណុចភូមិតេជោមរកត ឃុំមរកតស្រុកជាំក្សាន្តខេត្តព្រះវិហារ មិនមែនតែប្រជាពលរដ្ឋកម្ពុជានោះទេ បណ្តាអ្នកក្នុងចង្កោមសិល្បៈ បានបង្ហាញការយកចិត្តទុកដាក់យ៉ាងខ្លាំង ដូចជាការផ្តល់កម្លាំងចិត្តតាមរយៈសកម្មភាពផ្សេងៗ ដែលរួមមានការឧបត្ថម្ភជំនួយ និងការផលិតចម្រៀងដើម្បីជំរុញស្មារតីគាំទ្រជាដើម។

ជាមួយនឹងស្មារតីរួមគ្នានេះ កំពូលតារាចម្រៀង ខេមរៈ សិរីមន្ត្ត ក៏ត្រៀមចម្រៀងថ្មីដែរ ដែលអានត្រឹមចំណងជើង មានន័យដូចកំពុងបង្ហាញភក្តីចំពោះជាតិមាតុភូមិ។ សកម្មភាពនេះដែរ ក៏ត្រូវបានមហាជន ពិសេសអ្នកគាំទ្រតារាចម្រៀងប្រុសរូបនេះ បង្ហាញការពេញចិត្តនិងស្ញប់ស្ញែងផងដែរ៕