សន្តិសុខសង្គម

ឆេះរោងចក្រស្បែកជើង ០១ កន្លែង នៅសង្កាត់ចោមចៅទី ០៣ ប្រើប្រាស់រថយន្តពន្លត់អគ្គិភ័យ ០៨ គ្រឿង

បានផុស

១១ ខែ មុន

នៅ

ថ្ងៃពុធ ២៣ កក្កដា ២០២៥

ដោយ

អគ្គិភ័យបានឆាបឆេះឃ្លាំងស្តុកសំរាម និងកម្ទេចស្បែក នៅរោងចក្រយីងដុងស៊ូ (រោងចក្រស្បែកជើង) យ៉ាងសន្ធោសន្ធៅ ដែលបង្កឲ្យមានការភ្ញាក់ផ្អើលកាលពីវេលាម៉ោង ១២ និង ២០ នាទីរំលងអធ្រាត្រ ឈានចូលថ្ងៃទី ២៣ ខែកក្កដា ឆ្នាំ ២០២៥ ស្ថិតក្នុងភូមិអង្គកែង សង្កាត់ចោមចៅទី ០៣ ខណ្ឌពោធិ៍សែនជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពព័ត៌មានបានឲ្យដឹងថា មុនពេលកើតហេតុគេឃើញមានភ្លើងឆេះចេញពីក្នុងឃ្លាំងស្តុកសំរាម និងកម្ទេចស្បែក នៅបរិវេណរោងចក្រយីហោ យីងដុងស៊ូ (រោងចក្រស្បែកជើង) ហើយភ្លាមៗ នោះ ក៏បានរាយការណ៍ទៅកម្លាំងសមត្ថកិច្ចផងដែរ។ ក្រោយពីទទួលព័ត៌មានភ្លាម កម្លាំងបង្ការ និងពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញ ក៏បានចុះទៅដល់កន្លែងកើតហេតុតែម្ដង។

ក្នុងរង្វង់ប្រតិបត្តិការខាងលើ សមត្ថកិច្ចជំនាញ បានប្រើប្រាស់រថយន្តពន្លត់អគ្គិភ័យអស់ ០៨ គ្រឿង , ប្រើប្រាស់ទឹកអស់ ៣២ ម៉ែត្រគូប , និងប្រើប្រាស់ប្រព័ន្ធទុយោទឹកពន្លត់អគ្គិភ័យរបស់រោងចក្រចំនួន ០២ កន្លែង។ ក្នុងនោះ គ្រប់គ្រងបាន ១០០% ត្រឹមវេលាម៉ោង ០២ និង ៣០ នាទីរំលងអធ្រាត្រ ថ្ងៃខែដដែល។ ចំណែកសម្ភារៈខូចខាតមានឃ្លាំងស្តុកសំរាមទាំងស្រុង ហើយចំពោះមូលហេតុមកពីឆ្លងចរន្តអគ្គិសនី៕

អត្ថបទ ៖ សុខា