នយោបាយ

BREAKING NEWS: វិសោធនកម្មមាត្រា៣៣នៃរដ្ឋធម្មនុញ្ញត្រូវបានអនុម័តដោយសមាជិកសភាទាំង១២៥រូប

បានផុស

១១ ខែ មុន

នៅ

ថ្ងៃសុក្រ ១១ កក្កដា ២០២៥

ដោយ

វិសោធនកម្មរដ្ឋធម្មនុញ្ញមាត្រា៣៣ ដែលអនុញ្ញាតឱ្យអាចដកសញ្ជាតិពីពលរដ្ឋខ្មែរណាដែលចូលដៃជើងជាមួយបរទេស ត្រូវបានសមាជិកសភាទាំង១២៥រូប ស្មើនឹង១០០%នៃសមាជិកសភាទាំងមូលនៅក្នុងសម័យប្រជុំសភាពេញអង្គនៅព្រឹកថ្ងៃទី១១ ខែកក្កដា ឆ្នាំ២០២៥នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីជជែក ការពារ និងបកស្រាយហើយនោះ វិសោធនកម្មនេះត្រូវបានសមាជិកសភាលើកដៃអនុម័តនៅម៉ោង៩និង៥៨នាទី ព្រឹកថ្ងៃសុក្រ ទី១១ ខែកក្កដា ឆ្នាំ២០២៥នេះ។ វិសោធនកម្មធម្មនុញ្ញនេះត្រូវបានលើកស្នើឡើងពីសមាជិកសភាទាំង១២៥រូប និងរដ្ឋាភិបាល។

ខ្លឹមសារនៃវិសោធនកម្មមាត្រា៣៣ នៃរដ្ឋធម្មនុញ្ញ «ប្រជាពលរដ្ឋខ្មែរមិនត្រូវបាននិរទេសឬចាប់បញ្ជូនខ្លួនទៅឱ្យប្រទេសក្រៅណាមួយឡើយលើកលែងតែមានកិច្ចព្រមព្រៀងជាមួយគ្នាទៅវិញទៅមក។ ប្រជាពលរដ្ឋខ្មែរដែលកំពុងរស់នៅបរទេសត្រូវបានរដ្ឋគាំពា ការទទួលសញ្ជាតិខ្មែរ និងការបាត់សញ្ជាតិខ្មែរ ដោយរួមទាំងការដកសញ្ជាតិខ្មែរត្រូវកំណត់ក្នុងច្បាប់»។

អនុប្រធានទី១នៃរដ្ឋសភា និងជាប្រធានក្រុមតំណាងរាស្ត្រហត្ថលេខី លោក ជាម យៀប បានលើកឡើងថាការអនុម័តវិសោធនកម្មថ្មីនេះគឺជាការរួមចំណែកយ៉ាងសំខាន់ប្រឆាំងការជ្រែតជ្រែកកិច្ចការផ្ទៃក្នុងកម្ពុជា និងអំពើក្បត់ជាតិ។ លោកបន្ថែមក្រោយអនុម័តថា ចាប់ពីពេលនេះពលរដ្ឋខ្មែរណាដែលបានឃុបឃិតជាមួយបរទេសនឹងលែងនៅជាមួយជាតិខ្មែរទៀតហើយ និងបានថ្លែងអំណរគុណដល់សមាជិកសភាទាំងមូលផងដែរ។

ដោយឡែកតំណាងរដ្ឋាភិបាលរដ្ឋមន្ត្រីក្រសួងយុត្តិធម៌ ឧបនាយករដ្ឋមន្ត្រី កើត រិទ្ធ បានថ្លែងថា ក្រោយវិសោធនកម្មនេះនឹងបើកផ្លូវឱ្យរដ្ឋធ្វើវិសោធនកម្មច្បាប់សញ្ជាតិឆ្នាំ១៩៩៨ និងលិខិតបទដ្ឋានផ្សេងទៀតដើម្បីកំណត់ពីលក្ខខន្ត និងនីតិវិធីនៃការដកសញ្ជាតិ។

លោកថា៖ «រាជរដ្ឋាភិបាលនឹងយកការទទួលខុសត្រូវក្នុងការធ្វើវិសោធនកម្មច្បាប់ស្ដីពីសញ្ជាតិនិងលិខិតបទដ្ឋានគតិយុត្តិនានានៅពេលខាងមុខដោយធានាថាច្បាប់នេះនឹងបម្រើឱ្យផលប្រយោជន៍ជាតិព្រមទាំងធានាបាននូវនិយាមនិងស្ដង់ដារអនុវត្តស្របតាមបទដ្ឋានអន្តរជាតិ»។

តាមការលើកឡើងរបស់អ្នកតំណាងរាស្ត្រដែលមានយោបល់ក្នុងសម័យប្រជុំនេះបានបញ្ជាក់ថា ការដកសញ្ជាតិខ្មែរពីប្រជាពលរដ្ឋរបស់ខ្លួនណាម្នាក់ មិនមែនជារឿងថ្មីនោះទេ ដោយថាកាលពីសម័យមុនក៏មានច្បាប់កំណត់អំពីដកសញ្ជាតិខ្មែរដែរដូចជា ក្រមរដ្ឋប្បវេណីឆ្នាំ១៩២០ ដែលត្រូវបានធ្វើវិសោធនកម្ម ជាបន្តបន្ទាប់ និងច្បាប់ស្ដីពីការបាត់សញ្ជាតិខ្មែរ ដែលត្រូវបានប្រកាសឱ្យប្រើកាលពីថ្ងៃទី១៦ ខែតុលា ឆ្នាំ១៩៦៨ ជាដើម។ ទន្ទឹមនឹងនេះ នៅបណ្ដាប្រទេសចំនួនប្រមាណ១៥០នៅលើពិភពលោក ទំាងនៅអាស៊ី និងអឺរ៉ុបក៏មានច្បាប់ដកសញ្ជាតិផងដែរ។

គំនិតផ្ដួចផ្ដើមឱ្យមានការធ្វើវិសោធនកម្មរដ្ឋធម្មនុញ្ញដើម្បីដកសញ្ជាតិពលរដ្ឋខ្មែរណាដែលចូលដៃជើងជាមួយបរទេសបំផ្លាញប្រយោជន៍ជាតិ ត្រូវបានលើកឡើងដោយសម្ដេចតេជោ ហ៊ុន សែន ក្នុងពេលដែលសម្ដេចចុះជួបសំណេះសំណាលជាមួយសមាជិកក្រុមប្រឹក្សាឃុំសង្កាត់ ស្រុកក្រុង នៅខេត្តព្រះវិហារកាលពីថ្ងៃទី២៧ ខែមិថុនា ឆ្នាំ២០២៥កន្លងទៅ។ សម្ដេចថាការសម្រេចនេះគឺដោយសារអ្នកជ្រុលនិយមខ្លះប្រឆាំងហួសហេតុពេកមិនគិតផលប្រយោជន៍ជាតិ៕