កីឡា

ឥណ្ឌូណេស៊ី តែងតាំងគ្រូធ្លាប់ឈ្នះពាននៅកម្ពុជា ឲ្យដឹកនាំ U-22 មកប្រកួតស៊ីហ្គេម ឆ្នាំ ២០២៣

បានផុស

១ ខែ មុន

នៅ

ថ្ងៃពុធ ១ កុម្ភៈ ២០២៣

ដោយ

សហព័ន្ធកីឡាបាល់ទាត់ឥណ្ឌូណេស៊ី (PSSI) បានប្រកាសតែងតាំង លោក Indra Sjafri ដែលធ្លាប់ឈ្នះពានម្ដងនៅកម្ពុជា ដើម្បីកាន់តួនាទីជាគ្រូបង្វឹកដឹកនាំក្រុម U-22 ប្រកួតក្នុងព្រឹត្តិការណ៍កីឡាអាស៊ីអាគ្នេយ៍ លើកទី ៣២ ឆ្នាំ ២០២៣ នៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Indra Sjafri គឺជានាយកបច្ចេកទេសរបស់សហព័ន្ធកីឡាបាល់ទាត់ឥណ្ឌូណេស៊ី (PSSI) ហើយត្រូវបានសម្រេចការតែងតាំង ដោយផ្អែកលើលទ្ធផល នៃកិច្ចប្រជុំគណៈកម្មាធិការប្រតិបត្តិ PSSI កាលពីថ្ងៃទី ៣០ ខែមករា ឆ្នាំ ២០២៣។

ការតែងតាំង លោក Indra Sjafri ត្រូវបានធ្វើឡើងដោយសារតែគ្រូបង្វឹកធំ លោក Shin Tae-yong នឹងផ្ដោតលើក្រុមយុវជនអាយុក្រោម ២០ ឆ្នាំ ឥណ្ឌូណេស៊ី ដែលនឹងចូលរួមប្រកួតពានរង្វាន់បាល់ទាត់ពិភពលោកអាយុក្រោម ២០ ឆ្នាំ (FIFA U-20 World Cup) ខណៈឥណ្ឌូណេស៊ី ត្រូវធ្វើជាម្ចាស់ផ្ទះផ្ទាល់នាអំឡុងចុងខែឧសភា ក្រោយព្រឹត្តិការណ៍ស៊ីហ្គេម ប៉ុន្មានថ្ងៃ។

លោក Indra Sjafri ជាគ្រូបង្វឹកសញ្ជាតិឥណ្ឌូណេស៊ីផ្ទាល់ ហើយកាន់អាជ្ញាប័ណ្ណគ្រូបង្វឹក កម្រិត Pro License។ កាលពីឆ្នាំ ២០១៩ លោកធ្លាប់បានដឹកនាំ U-22 ឥណ្ឌូណេស៊ី ឈ្នះជើងឯកពានយុវជនអាស៊ីអាគ្នេយ៍ អាយុក្រោម ២២ ឆ្នាំ (AFF U-22 Championship) ធ្វើឡើងនៅទឹកដីកម្ពុជាផងដែរ និងឆ្នាំដដែលលោកដឹកនាំក្រុម U-22 ឥណ្ឌូណេស៊ី ឲ្យទទួលបានមេដាយប្រាក់ ក្នុងព្រឹត្តិការណ៍ស៊ីហ្គេម លើកទី ៣០ ធ្វើឡើងនៅប្រទេសហ្វីលីពីន។

ការប្រកួតកីឡាស៊ីហ្គេម ឆ្នាំ ២០២៣ គ្រោងនឹងធ្វើឡើងនៅថ្ងៃទី ០៥ ដល់ថ្ងៃទី ១៧ ខែឧសភា ឆ្នាំ ២០២៣។ ទន្ទឹមនឹងនោះ ពានរង្វាន់បាល់ទាត់ពិភពលោកអាយុក្រោម ២០ ឆ្នាំ (FIFA U-20 World Cup) នឹងធ្វើឡើងនៅថ្ងៃទី ២០ ខែឧសភា ដល់ថ្ងៃទី ១១ ខែមិថុនា ឆ្នាំ ២០២៣៕

ប្រភព ៖ PSSI

អត្ថបទ ៖ មន្នីរ័ត្ន