កីឡា

ប្រកួតដំបូងបានត្រឹម១០ម៉ឺនរៀល អេលីត សាន់ តស៊ូរហូតប្រកួតព្រឹត្តិការណ៍ធំៗ

បានផុស

១ year មុន

នៅ

ថ្ងៃចន្ទ ១៦ តុលា ២០២៣

ដោយ

អ្នកលេងគុនខ្មែរកីឡាករ អេលីត សាន់ ធ្លាប់មានគំនិតបោះបង់ចោលអាជីពប្រដាល់ ប៉ុន្តែការតស៊ូដោយមានការគាំទ្រ និងជំរុញទឹកចិត្តពីក្រុមគ្រួសារ គ្រូបង្វឹកផងនោះបានធ្វើឲ្យរូបគេក្លាយជាកីឡាករជួរមុខម្នាក់ដែលទទួលបានឱកាសប្រកួតក្នុងព្រឹត្តិការណ៍ធំៗ បូករួមទាំងការចេញទៅប្រកួតនៅក្រៅប្រទេស។

អេលីត សាន់ បានប្រាប់«កម្ពុជាថ្មី»ថា៖«ពេល ខ្ញុំប្រកួតដំបូងៗ បានលុយ១០ម៉ឺនទៅ១២ម៉ឺនរៀល។ ពេលនោះ ជួនកាល ខ្ញុំចង់ឈប់ពីប្រដាល់ដែរ ព្រោះតម្លៃខ្លួនតិច។ ក្រោយៗមកមានបងប្អូនគាំទ្រលើកទឹកច្រើន ខ្ញុំចេះតែបន្តហ្វឹកហាត់រហូតដល់ឥឡូវ។ ខ្ញុំមិនធ្លាប់គិតថា ខ្ញុំនឹងមានឱកាសចូលរួមកម្មវិធីធំៗ ប្រកួតដណ្តើមរថយន្ត ឬចេញទៅក្រៅប្រទេសទេ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការខិតខំនប្រឹងប្រែងហ្វឹកហាត់បូករួមទាំងមានការជំរុញលើកទឹកចិត្តពីមនុស្សជុំវិញខ្លួនផងនោះ អេលីត សាន់ បានឆក់យកបេះដូងអ្នកគាំទ្រតាមរយៈក្បាច់វ៉ៃដ៏ជក់ចិត្តរហូតមានកម្មវិធីធំៗជាបន្តបន្ទាប់ត្រូវការ។

កម្មវិធីគុនខ្មែរអលស្តារវគ្គ៨ កីឡាករ អេលីត សាន់ ជាបេក្ខភាពដណ្តើមរថយន្ត ក្រោយយកឈ្នះកីឡាករ Zaw Aye See របស់មីយ៉ាន់ម៉ា ប៉ុន្តែលទ្ធផលចុងគឺរូបគេទទួលបានសម្លេងគាំទ្រតិចជាង ពេជ្រ សម្បត្តិ ដែលជាម្ចាស់រថយន្តទី១ពីក្រុមហ៊ុនប៊ូសស្ត្រង។ ឱកាសប្រកួតដណ្តើមរថយន្តលើកទី២ អេលីត សាន់ ធ្វើបានយ៉ាងល្អនៅជុំទី១ដោយបានផ្តួលឲ្យកីឡាករថៃ រុងរ៉ាវី បានឆាមេក និងបានឡើងទៅវគ្គផ្តាច់ព្រ័ត្រ ប៉ុន្តែចាញ់ ឃីម បូរ៉ា។