កីឡា

ឈុត សេរីវ៉ាន់ថង ឆ្លើយតប អេលីត សាន់ ថា ចង់លេងក្បាច់អ្វីក៏បាន

បានផុស

៩ ខែ មុន

នៅ

ថ្ងៃចន្ទ ៩ តុលា ២០២៣

ដោយ

ជើងខ្លាំងគុនខ្មែរទម្ងន់៦០គីឡូក្រាម៤រូបត្រូវប្រជែងគ្នាដើម្បីរង្វាន់រថយន្តថ្មីសន្លាង១គ្រឿងពីភេសជ្ជៈប៊ូសស្ត្រង នៅថ្ងៃទី១១ ខែតុលា ឆ្នាំ២០២៣ នៅវិមានពហុកីឡដ្ឋានជាតិអូឡាំពិកដែលចូលទស្សនាដោយសេរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បេក្ខភាពទាំង៤រូបសុទ្ធតែជើងខ្លាំងជួរមុខគឺ ឃីម បូរ៉ា, ទូច ដេវីត, ឈុត សេរីវ៉ាន់ថង និង អេលីត សាន់។ បេក្ខភាពទាំង៤រូបនេះកំពុងទទួលបានការចាប់អារម្មណ៍ខ្លាំងពីអ្នកគាំទ្រ ហើយក៏មានសង្គ្រាមពាក្យសំដីផ្ទុះដាក់គ្នារវាងកីឡាករ។

ក្នុងនោះគេឃើញកីឡាករពូកែបុក អេលីត សាន់ ប៉ះសំដីគ្នាជាមួយអ្នកលេងក្បាច់ ឈុត សេរីវ៉ាន់ថង។ អេលីត សាន់ ចង់ជួប ឈុត សេរីវ៉ាន់ថង នៅវគ្គផ្តាច់ព្រ័ត្រ ដើម្បីជម្រុះបញ្ជីចាស់ និងចង់ឲ្យកីឡាករមកពីខេត្តបាត់ដំបងម្នាក់នេះវ៉ៃបុកពោលគឺមិនត្រូវព្យាយាមថយក្រោយឡើយ។

ឆ្លើយតបនឹងការចង់បានរបស់ អេលីត សាន់ ម្ចាស់មេដាយមាសស៊ីហ្គេម ឈុត សេរីវ៉ាន់ថង បានឆ្លើយតបថា ៖«បុកក៏បាន ថយក៏បាន ក្បាច់គុនខ្មែរមានច្រើនទម្រង់ ច្រើនក្បាច់ ច្រើនស្នៀត អ្នកខ្លាំងពិតគឺចេះវាយគ្រប់ដាន»។

អ្នកទាំងពីរធ្លាប់ប៉ះចុងក្រោយកាលពីខែមិថុនាដែលពេលនោះ ឈុត សេរីវ៉ាន់ថង ឈ្នះដោយពិន្ទុដើម្បីទទួលបានខ្សែក្រវាត់ដែលមានប្រាក់រង្វាន់១ម៉ឺនដុល្លារ និងខ្សែកមាស២តម្លឹង។ ការប្រកួតនោះ អេលីត សាន់ ជាអ្នកដើរចូលវ៉ៃ ប៉ុន្តែធ្វើអ្វីមិនបានលើ សេរីវ៉ាន់ថង ដែលព្យាយាមប្រើបច្ចេកទេស ថយក្រោយ និងវ៉ៃយកពិន្ទុ។

លក្ខខណ្ឌនៃការប្រកួតដើម្បីប្រជែងរង្វាន់រថយន្តថ្មីសន្លាង១គ្រឿងមានដូចខាងក្រោម៖

១. ករណី កីឡាករខ្មែរទាំង៤រូបទទួលបានជ័យជម្នះដូចគ្នា នឹងជ្រើសរើសយក២រូប (ខ្មែរប៉ះខ្មែរ) ដែលទទួលបានការគាំទ្រច្រើនពីអ្នកទស្សនាផ្ទាល់ សារគាំទ្រតាមលេខទូរសព្ទ និងតាមបណ្តាញសង្គម ឡើងទៅប្រកួតវគ្គផ្តាច់ព្រ័ត្រដែលជាគូទី៨ ហើយអ្នកឈ្នះគឺជាម្ចាស់រថយន្ត។
២. ករណី កីឡាករខ្មែរ៣រូបឈ្នះ គឺជ្រើសរើសយក២រូបដែលទទួលបានការគាំទ្រច្រើនពីអ្នកទស្សនាផ្ទាល់ សារគាំទ្រតាមលេខទូរសព្ទ និងតាមបណ្តាញសង្គម ឡើងទៅប្រកួតវគ្គផ្តាច់ព្រ័ត្រដែលជាគូទី៨ ហើយអ្នកឈ្នះគឺជាម្ចាស់រថយន្ត។
៣. ករណី កីឡាករខ្មែរ២នាក់ឈ្នះ គឺអ្នកឈ្នះទាំងពីររូបឡើងទៅប្រកួតវគ្គផ្តាច់ព្រ័ត្រដែលជាគូទី៨ ហើយអ្នកឈ្នះគឺជាម្ចាស់រថយន្ត។
៤. ករណី កីឡាករខ្មែរតែ១រូបឈ្នះគឺក្លាយជាម្ចាស់រថយន្តតែម្តងដោយគ្មានការប្រកួតវគ្គផ្តាច់ព្រ័ត្រគូទី៨ទេ។
៥. ករណី កីឡាករខ្មែរចាញ់ទាំង៤រូប គឺប្រើវិធីសាស្ត្រនៃការគាំទ្រច្រើនពីអ្នកទស្សនាផ្ទាល់ សារគាំទ្រតាមលេខទូរសព្ទ និងតាមបណ្តាញសង្គម ដើម្បីប្រកួតគូទី៨ ហើយអ្នកឈ្នះគឺជាម្ចាស់រថយន្ត។

កីឡាករបរទេសមិនមែនជាបេក្ខភាពដើម្បីរង្វាន់រថយន្តទេ។ ពួកគេប្រកួតមិត្តភាពអន្តរជាតិធម្មតាដែលខុសពីកីឡាករកម្ពុជាប្រកួតមិត្តភាពអន្តរជាតិដើម្បីប្រជែងគ្នាឆ្ពោះទៅដណ្តើមរង្វាន់រថយន្ត។

គូប្រកួត