កីឡា

ពេជ្រ សម្បត្តិ ប៉ះ Bahroumi ម្ចាស់ខ្សែក្រវាត់WBCនៅបារាំងចុងសប្តាហ៍នេះ

បានផុស

៣ years មុន

នៅ

ថ្ងៃពុធ ២១ មិថុនា ២០២៣

ដោយ

អ្នកលេងគុនខ្មែរ ពេជ្រ សម្បត្តិ ត្រូវធ្វើការធ្ងន់នៅពេលជួបកីឡាករបារាំង Faycal Bahroumi ក្នុងកម្មវិធី Kun Khmer All Star នៅយប់ថ្ងៃទី២៤ ខែមិថុនា ឆ្នាំ២០២៣ នៅទីក្រុងបារីស ប្រទេសបារាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Faycal Bahroumi ជាជើងខ្លាំងដែលមានបទពិសោធច្រើន និងធ្លាប់ឈ្នះខ្សែក្រវាត់ច្រើន។ រូបគេបានក្លាយជាជើងឯកថ្នាក់ជាតិបារាំងនៅឆ្នាំ២០១៩ និងនៅឆ្នាំដដែលនោះ រូបគេបានឈ្នះខ្សែក្រវាត់ WBC International មួយថៃក្នុងប្រភេទទម្ងន់៦១គីឡូក្រាម បន្ទាប់ពីបានប្រកួតឈ្នះកីឡាករអ៉ីតាលី Andrea Serra ក្នុងកម្មវិធី Hearts on Fire។

ស្ថិតិនៃការប្រកួតជាក់ស្តែងមិនច្បាស់ឡើយ ប៉ុន្តែបើតាមយោងតាមការបង្ហាញតាមរយៈការប្រកួតកន្លងមក កីឡាករបារាំងមកពីក្លិប Team Alamos រូបនេះធ្លាប់ឡើងសង្វៀនមិនក្រោម៥០ដងឡើយ។ អាវុធដែលគ្រោះថ្នាក់របស់ Faycal គឺទាត់ និងចេះឡើងជង្គង់ ស្របពេលកាយសម្បទារឹងមាំ កម្ពស់១.៧៥ម៉ែត្រ រូបគេប្រហែលជាដាក់សម្ពាធលើ ពេជ្រ សម្បត្តិ ដែលមានកម្ពស់ត្រឹមតែ១.៦៥ម៉ែត្រ។

ទោះបីជាយ៉ាងណា ពេជ្រ សម្បត្តិ ជាកីឡាករវ៉ៃមិនចេះចុះញមនឹងដៃគូ។ រាល់ពេលឡើងសង្វៀនរូបគេតែងតែដើរសម្រុកចូលវ៉ៃរហូតតាមរយៈកណ្តាប់ដៃធ្ងន់ៗ និងកែងដ៏គ្រោះថ្នាក់។

ពេជ្រ សម្បត្តិ ស្ថិតក្នុងចំណោមកីឡាករគុនខ្មែរ៤រូបដែលមានឈ្មោះប្រកួតក្នុងកម្មវិធីប្រដាល់ Kun Khmer All Star ដែលតាមការគ្រោងទុកនឹងចាប់ប្រកួតវេលាម៉ោង១០យប់ ថ្ងៃទី២៤ ខែមិថុនា ឆ្នាំ២០២៣ នៅសង្វៀន Michel Jaz Gymnasium តំបន់ Bussy Saint George ក្នុងទីក្រុងបារីស ប្រទេសបារាំង៕

អត្ថបទ៖ វីរបុត្រ