មុនជោគជ័យទៅដល់ក្រៅប្រទេស Kento ជួបឧបសគ្គច្រើន

Kento Miyaura ជាកីឡាករបាល់ទះម្នាក់ក្នុងចំណោមកីឡាករ​​ជម្រើសជាតិជប៉ុន​៦រូប​ ដែលកំពុងប្រកបអាជីពនៅក្រៅ​ប្រទេស​។ ទម្រាំមានថ្ងៃនេះរូបគេស្ទើរ​បោះបង់​ចោល​អាជីព​បាល់ទះ ដោយសារកាយ​សម្បទា​មិនអំណោយផលកាល​នៅ​ពី​ក្មេង។

កីឡាករ Kento Miyaura កើតថ្ងៃទី២២ ខែកុម្ភៈ ឆ្នាំ១៩៩៩ នៅទីក្រុង Kumamoto នៅលើកោះ Kyushu មានកម្ពស់១.៨៤​ម៉ែត្រ និងទម្ងន់៨៧គីឡូក្រាម។ បច្ចុប្បន្ន រូប​គេ​លេងឲ្យក្រុម Paris Volley នៅលីគ LNV Ligue A Masculine ក្នុងប្រទេសបារាំង។ រូប​គេ​ធ្លាប់ជាប្រធានជាក្រុម U-19 ជប៉ុន និងក្លិប​បាល់ទះ​សាកលវិទ្យាល័យ Waseda។ ចាប់ផ្តើមដំបូងពីការលេងបាល់ទះតាំងពីថ្នាក់ទី២ ពេលនោះរូបគេមានកាយ​សម្បទា​ស្គម​ និងខ្វះថាមពល ដូច្នេះ​មិនទទួលបានឱកាសលេង​​រហូតដល់ថ្នាក់ទី៤ ហើយតែតែងនៅកៅអីបម្រុង។

ចូល​វិទ្យាល័យ Miyaura បានស្នើសុំឱ្យបង្កើតក្លិបបាល់ទះកម្រិតយុវជនថ្មីមួយនៅវិទ្យាល័យ Chinzei។ នៅពេលនោះ មានកីឡាករតែ២នាក់ប៉ុណ្ណោះ​ ហើយពួកគេមិនអាចចូលរួមការប្រកួត​​ផ្សេង​ៗ​ទេ​​ដោយសារ​កីឡាករមិនគ្រប់គ្រាន់។ ទោះ​បី​ជា​យ៉ាង​ណា រូបគេ​នៅ​តែ​បន្តហ្វឹកហាត់ជារៀងរាល់ថ្ងៃ។ ក្រោយមក រូប​គេ​បាន​របួស ហើយ​ក៏​សម្រេចចិត្តចាកចេញពីក្រុម។ ក្រោយជាពីរបួស Miyaura បាន​ក្លាយ​ជាប្រធានក្រុម ប៉ុន្តែ​រូប​គេ​តែងតែបង្កបញ្ហាដល់ក្រុម។ នោះ​ជា​ពេល​វេលា​ដ៏​លំបាក​មួយ​ក្នុង​ជីវិតបាល់ទះ រហូត​គិត​ចង់​ឈប់ពីបាល់ទះ។ ពេល​វេលា​លំបាកក៏បានកន្លង​ផុត​ទៅ ភាព​លំបាក​ទាំងអស់បាន​ធ្វើ​ឲ្យ​គេ​កាន់​តែ​រឹងមាំ។

ក្រោយរង​ការ​រញ្ជួយ​ដី Kumamoto ឆ្នាំ២០១៦ កន្លែងហ្វឹកហាត់ត្រូវ​បានបិទ។ មួយខែក្រោយមក Miyaura រកបានកន្លែងហ្វឹកហាត់ថ្មី ប៉ុន្តែកន្លែងថ្មីនោះបរិយាកាសមិនល្អ។ យ៉ាងមិញ​​ក្រុម​គេបានទទួល​បាន​ចំណាត់​ថ្នាក់​លេខ​២​ក្នុង​ការ​ប្រកួត​បាល់ទះ​ជើង​ឯក​​វិទ្យាល័យជប៉ុន All Japan។

បន្ទាប់ពីបញ្ចប់ការសិក្សានៅវិទ្យាល័យ Miyaura បន្ត​ទៅ​សាកលវិទ្យាល័យ Waseda។ រូបគេត្រូវបានកោះហៅឱ្យទៅក្រុមបាល់ទះជម្រើសជាតិ​ជប៉ុន​អាយុក្រោម១៩ឆ្នាំជាលើកដំបូង ហើយក្រោយមកបានក្លាយជាប្រធានក្រុម។

ឆ្នាំចុងក្រោយនៅសកលវិទ្យាល័យ Miyaura បានក្លាយជាប្រធានក្រុម ហើយបានដឹកនាំក្រុមឱ្យទទួលជ័យជម្នះក្នុងការប្រកួតជើងឯក All Japan Intercollegiate ដែលជួយសាកលវិទ្យាល័យ Waseda ឈ្នះជើងឯក​៥ឆ្នាំជាប់គ្នា។​ ឆ្នាំ២០២០ រូប​គេ​បាន​ចូលរួមជាមួយក្រុម JTEKT Stings ក្នុងលីគកំពូល​ជប៉ុន​។ ក្រោយលេង​ឲ្យ​ក្លិបអាជីពបានជាង១ឆ្នាំ រូបគេ​បាន​ជាប់​ជម្រើសជាតិ​ជប៉ុន​ក្រុម​​ធំ​សម្រាប់​ការប្រកួត​ជើងឯក​អាស៊ី។

ថ្ងៃទី២ ខែសីហា ឆ្នាំ២០២២ Miyaura បានផ្លាស់ទៅលេងនៅក្លិប PSG Stal Nysa របស់ប្រទេសប៉ូឡូញ​ដែល​ជាក្លិបក្រៅ​ប្រទេស​ដំបូង​របស់​ខ្លួន។ នៅថ្ងៃទី១៦ ខែមិថុនា ឆ្នាំ២០២៣ រូបគេ​បានផ្លាស់​ទៅ​ក្លិប​ Paris Volley ដែល​ជា​ក្រុម​ខ្លាំង​អាជីព​ធ្លាប់ឈ្នះ​ជើង​ឯក​លីគ​បាល់ទះ​កំពូល​បារាំង៩​សម័យ​កាល។

សមិទ្ធផលដែល Miyaura បានឈ្នះជាមួយក្រុមជម្រើសជាតិជប៉ុន៖

• ឈ្នះមាសដាយសំរិទ្ធ ជើង​ឯក​ Nation League
• ឈ្នះមេដាយមាស និង​មេដាយប្រាក់ ជើងឯក​អាស៊ី Asian Championship
• ឈ្នះមេដាយសំរិទ្ធ  ជើងឯក​អាស៊ី​អាយុ​២៣​ឆ្នាំ​ Asian U23 Championship
• ឈ្នះមេដាយសំរិទ្ធ ជើង​ឯក​ពិភពលោក​អាយុ​១៩​ឆ្នាំ​ U19 World Championship
• ឈ្នះមេដាយសំរិទ្ធ ជើង​ឯក Asian Cup

អត្ថបទ៖ ផា រតនា