Granit Xhaka ​ព្រមាន Bayern Munich មុនជួបគ្នា​ថ្ងៃ​ស្អែក

ក្រុម Bayer 04 Leverkusen នឹងត្រូវធ្វើដំណើរទៅសួរសុខទុក្ខ ក្រុមម្ចាស់ផ្ទះ Bayern Munich ក្នុងការប្រកួតស​ប្ដាហ៍ទី៥ ពានរង្វាន់ Bundesliga នៅថ្ងៃសៅរ៍ ទី២៨ ខែកញ្ញា វេលា១១:៣០ នាទីយប់។

ខ្សែបម្រើ Granit Xhaka បានព្រមាន Bayern Munich ថា ពួកគេនឹងផ្ដល់ការរំខានដល់ក្រុមម្ចាស់​ផ្ទះម្ដងទៀត ក្នុងជំនួបនៅថ្ងៃស្អែកនេះ។

កីឡាករ Granit Xhaka បានប្រាប់ Sky Germany ថា ៖«យើងចង់នៅឈរកំពូលឲ្យបានយូរតាមដែលអាចធ្វើទៅបាន។ យើងធ្វើបានយ៉ាងល្អកាលពីឆ្នាំមុន ហើយនឹងបន្តជាមួយនឹងការរៀបចំ​បាន​ល្អ​នៅឆ្នាំនេះទៀត។ យើង​មាន​ការ​ប្រកួត​បី​ទៅ​បួន​ប្រកួត​ដែល​គ្រូ​បង្វឹក​តែង​តែ​គិត។ ឥឡូវ​នេះ​ដល់​ពេល​ Bayern Munich ហើយ​យើង​ចង់​បង្កការរំខាន​ពួក​គេ​​ដូច​​រដូវ​កាល​មុន»។

តាមការប្រៀបធៀប ក្រុម Bayern Munich ដឹកនាំដោយលោក Vincent Kompany មានទម្រង់លេងគួរឲ្យកត់សម្គាល់​ក្នុង​រដូវកាល ដោយបានឈ្នះ​ទាំង៤លើក និងស៊ុត​បាន១៦គ្រាប់។ ទោះជាយ៉ាងណា Xhaka មានទំនុកចិត្តថា ពួក​គេ​នឹង​អាចយកឈ្នះ Bayern ម្តងទៀត។

ក្នុងរដូវកាលនេះ Bayer Leverkusen មិនអាចរក្សាកំណត់មិនចាញ់សោះក្នុង១រដូវកាលដូច​ដែលពួក​គេ​បាន​ធ្វើ​កាលពីរដូវកាលមុន ក្រោយពួកគេចាញ់ RB Leipzig ៣-២ នៅសប្ដាហ៍ទី២៕

ប្រែសម្រួល៖ ផា រតនា