កីឡា

ជាប្រវត្តិសាស្ត្រដំបូង កីឡាការិនីកម្ពុជា២រូបបានទៅលេងនៅលីគនារីថៃ

បានផុស

៤ ខែ មុន

នៅ

ថ្ងៃសៅរ៍ ២៥ មករា ២០២៥

ដោយ

កីឡាការិនីជម្រើសជាតិកម្ពុជា យ៉ុន យ៉ើន និង ហុក សៅឌី របស់ក្លិបណាហ្គាវើលដ៍ នឹងចូលរួមជាមួយក្លិបបាល់ទាត់នារី Bangkok Women FC របស់លីគកំពូលនារីថៃ ក្នុងលក្ខខណ្ឌខ្ចីជើងចាប់ពីរដូវកាលក្រោយទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្លិបបាល់ទាត់នារីណាហ្គាវើលដ៍ បានប្រកាសជាផ្លូវកាលពីរសៀល ថ្ងៃទី២៤ ខែមករា ឆ្នាំ២០២៥ ពីកីឡាការិនីទាំងពីរ តាមរយៈលក្ខខណ្ឌខ្ចីជើងទៅលីគនារីថៃសម្រាប់រដូវកាលក្រោយ។ កីឡាការិនីទាំងពីរនឹងបញ្ចប់ភារកិច្ចជាមួយក្លិបនារី ណាហ្គវើលដ៍ ក្នុងលីគបាល់ទាត់នារីកម្ពុជា រដូវកាល២០២៤-២៥ ដែលឈានដល់វគ្គខ្វែង៤ក្រុមចុងក្រោយ។

នេះជាប្រវត្តិសាស្ត្រលើកដំបូងដែលមានកីឡាការិនីបាល់ទាត់កម្ពុជាទៅលេងនៅលីគបាល់ទាត់នារីថៃ។ នៅមិនទាន់ដឹងច្បាស់ក្នុងសម័យកាលមុនសង្គ្រាមថាតើធ្លាប់មានកីឡាការិនីកម្ពុជាទៅលេងនៅទីនោះឬយ៉ាងណានោះទេ ប៉ុន្តែគិតត្រឹមជាង៥០ឆ្នាំចុងក្រោយគឺមិនធ្លាប់មានកីឡាការិនីកម្ពុជាទៅលេងនៅថៃឡើយ។

នេះជាប្រទេសទី២ដែលកីឡាការិនី យ៉ុន យ៉ើន បានចេញទៅលេងនៅក្រៅប្រទេស បន្ទាប់ពីលើកទី១ត្រូវបានក្លិបឡាវ Young Elephants ខ្ចីជើងទៅលេងក្នុងពានរង្វាន់ AFC Women Championships League វគ្គសន្សំពិន្ទុក្នុងពូល។ សម្រាប់កីឡាការិនី ហុក សៅឌី គឺជាលើកទី១ដែលបានទៅលេងនៅក្រៅប្រទេស។

កីឡាការិនីទាំងពីរជាកម្លាំងសំខាន់នៅក្នុងក្រុមបាល់ទាត់ជម្រើសជាតិនារីកម្ពុជាដែលបានឡើងវគ្គពាក់កណ្តាលផ្តាច់ព្រ័ត្រក្នុងព្រឹត្តិការណ៍កីឡាស៊ីហ្គេម កាលពីឆ្នាំ២០២៣ និងបានឡើងដល់វគ្គផ្តាច់ព្រ័ត្រពានរង្វាន់ AFF Women’s Cup 2024 នៅប្រទេសឡាវ កាលពីចុងឆ្នាំ២០២៤ ដោយទទួលបានចំណាត់ថ្នាក់លេខ២៕