លោកគ្រូ Koji ថា ការ​លេង​យប់​មិញ​មិន​អាក្រក់​ពេក​ទេ តែមាន​ចំណុច​ខ្វះ​ខាត​ច្រើន

គ្រូបង្គោលរបស់ក្រុមជម្រើសជាតិ កម្ពុជា លោក Koji Gyotoku បានសរសើរកូនក្រុមលេងបានល្អនៅក្នុងការប្រកួតវគ្គទី ២ បើធៀបនឹងការប្រកួតវគ្គទី ១ ទល់នឹងជម្រើសជាតិ វៀតណាម ហើយលោកបានចាត់ទុកជំនួបមិត្តភាពនេះ ជាបទពិសោធ​ដ៏ល្អ សម្រាប់ក្រុម ដើម្បីកែប្រែនូវចំណុចខ្វះខាតផ្សេងៗ។

កាលពីយប់ថ្ងៃទី ១៩ ខែ មីនា ម្សិលមិញ ក្រុមគោព្រៃកម្ពុជា បានធ្វើដំណើទៅកីឡដ្ឋាន Binh Duong ដើម្បីប្រកួតមិត្តភាពកម្តៅសាច់ដុំទល់នឹងជម្រើសជាតិ វៀតណាម ហើយជាលទ្ធផលក្រោយបញ្ចប់ការប្រកួត ៩០ នាទីពេញ ក្រុម កម្ពុជា បានបរាជ័យក្រោមថ្វីជើងក្រុមម្ចាស់ផ្ទះ វៀតណាម ២-១។

ក្នុងនោះ ២ គ្រាប់របស់ វៀតណាម គឺរកបាននៅវគ្គទី ១ ទាំង ២ គ្រាប់ ដែលស៊ុតបញ្ចូលទីដោយកីឡាករ Nguyen Hai Long និង Nguyen Van Vi។ ចំណែក ១ គ្រាប់របស់ កម្ពុជា វិញ គឺរកបានដោយខ្សែបម្រើវ័យក្មេងមកពីភ្នំពេញក្រោន ប៊ុង សាំយូអែល នៅវគ្គទី ២។

បន្ទាប់ពីបញ្ចប់ការប្រកួតភ្លាម លោក Koji មានប្រសាសន៍ក្នុងសន្និសីទសារព័ត៌មានយ៉ាងដូច្នេះថា ៖«ជាដំបូង ខ្ញុំសូមអរគុណដល់សហព័ន្ធបាល់ទាត់វៀតណាម ដែលបានរៀបចំការប្រកួតបានយ៉ាងល្អនៅថ្ងៃនេះ។ ក្រុមរបស់ខ្ញុំលេងបានល្អក្នុងវគ្គទីពីរ។ បើ​ប្រៀប​ធៀប​កម្រិតក្រុម​ទាំង​ពីរ វៀតណាម​សព្វ​ថ្ងៃ​មាន​ប្រៀប​ជាង​គ្រប់​យ៉ាង តាំង​ពី​បច្ចេកទេស​ និង​កម្លាំង។ ក្រុមរបស់ខ្ញុំបានក្រេបយកនូវបទពិសោធ​ជាច្រើន។ នៅវគ្គទីពីរ មានឱកាសជាច្រើនក្នុងការស៊ុតបញ្ចូលទី ប៉ុន្តែយើងចាញ់ ២-១។ នេះ​មិន​មែន​ជា​លទ្ធផល ដែលយើង​ពេញ​ចិត្ត​ទេ ប៉ុន្តែ​ថ្ងៃ​នេះយើងក៏​មិន​មែន​លេង​អាក្រក់មើលពេកដែរ»​។

គ្រូបង្គោលសញ្ជាតិ ជប៉ុន វ័យ ៦០ ឆ្នាំបានមានប្រសាសន៍បន្តទៀតថា ៖«នៅក្នុងវគ្គទី ១ ពួកយើងមិនសូវទទួលបានបាល់ទេ ជាពិសេសគឺតំបន់បម្រើ។ ដោយឡែកនៅវគ្គទី ២ យើងមានឱកាសច្រើន ហើយគ្រប់គ្រងបាល់ក៏ច្រើន។ ខ្ញុំបានរកឃើញនូវបញ្ហា ដែលពួកយើងអាចយកមកកែប្រែក្រុមឱ្យកាន់តែប្រសើរឡើង»៕

អត្ថបទ៖ សេម កុសល