ទំនងចាំងភ្លើងហ្វារថយន្ដខាងមុខ បុរសម្នាក់បើករថយន្ដធ្លាក់ផ្លូវចូលប្រឡាយ

បុរសម្នាក់បើករថយន្តហាយឡែនឌ័រសង្ស័យចាំងភ្លើងហ្វារថយន្តដែលបើកបរខាងមុខ រេចង្កូតធ្លាក់ចូលប្រឡាយសំណាងមិនមានមនុស្សរងរបួស។

ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង៨និង៤០នាទីយប់ ថ្ងៃទី២៦ ខែសីហា ឆ្នាំ២០២១ ដែលស្ថិតនៅតាមបណ្ដោយផ្លូវបេតុងជាប់ផ្លូវរថភ្លើងស្ថិតក្នុងសង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញរថយន្តមួយគ្រឿងម៉ាកហាយឡែនឌ័រពណ៌ទឹកប្រាក់ ពាក់ស្លាកលេខ ភ្នំពេញ 2AQ 8496បើកបរដោយបុរសម្នាក់ ធ្វើដំណើរក្នុងទិសដៅពីកើតទៅលិច លុះមកដល់ចំណុចកើតហេតុបានបត់ស្ដាំ ដោយសង្ស័យថា ចាំងជាមួយនឹងភ្លើងហ្វារថយន្តមួយគ្រឿងទៀតដែលបើកបញ្ច្រាស់ទិសគ្នានៅពីខាងមុខ បណ្ដាលឲ្យរេចង្កូតធ្លាក់ចូលទៅក្នុងប្រឡាយទឹកស្អុយ រថយន្តរងការខូចខាតយ៉ាងដំណំ តែសំណាងល្អមិនបណ្ដាលឲ្យមានអ្នកណារងរបួសនោះទេ។

ក្រោយកើតហេតុសមត្ថកិច្ចមូលដ្ឋានបានមកដោយពិនិត្យជាក់ស្ដែង ដោយមិនប៉ះពាល់ដល់ទ្រព្យសម្បត្តិរបស់រដ្ឋក៏ដូចជាអ្នកធ្វើដំណើរតាមដងផ្លូវ ទើបសមត្ថកិច្ចឲ្យម្ចាស់រថយន្តខាងលើទាក់ទងទៅខាងរថយន្តស្ទូច ដើម្បីស្ទូចយករថយន្តទៅជួសជុលដោយខ្លួនឯង៕

អត្ថបទ ៖ សុខា