បុរសម្នាក់បើករថយន្តស៊េរីទំនើប ជ្រុលទៅបុកបង្គោលភ្លើង និងជញ្ជាំងឃ្លាំងលក់រថយន្ត រងការខូចខាតយ៉ាងដំណំ

បុរសម្នាក់ រួមដំណើរដោយនារីម្នាក់ទៀត បើករថយន្តស៊េរីទំនើបមួយគ្រឿងក្នុងល្បឿនលឿន ជ្រុលទៅបុកបង្គោលភ្លើងថ្មមួយដើមពេញទំហឹង ហើយបានបោកទៅនឹងបញ្ជាំងឃ្លាំងលក់រថយន្តមួយកន្លែង រងការខូចខាតយ៉ាងដំណំ តែសំណាងល្អ មិនបង្កឲ្យមានអ្នករបួសឡើយ។

ហេតុការណ៍នេះ កើតឡើងកាលពីវេលាម៉ោង១ និង ៣០នាទីយប់រំលងអាធ្រាត្រ ឈានចូលថ្ងៃទី២៨ ខែតុលា ឆ្នាំ ២០២១ នៅចំណុចមុខឃ្លាំងលក់រថយន្តមួយកន្លែង ជាប់នឹងរង្វង់មូល (នាងកេណ) តាមបណ្ដោយផ្លូវ OCIC ក្នុងសង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ។

ប្រភពព័ត៌មានពីកន្លែងកើតហេតុ បានឲ្យដឹងថា មុនកើតគេឃើញបុរសម្នាក់ រួមដំណើរដោយនារីម្នាក់ទៀត បើករថយន្តស៊េរីទំនើបមួយគ្រឿង ពណ៌ស ពាក់ស្លាកលេខកម្ពុជា MONIKA 09 ធ្វើដំណើរទិសដៅពីជើងទៅត្បូង ក្នុងល្បឿន លឿន លុះ​ដល់ចំណុចកើតហេតុខាងលើ បានរេចង្កូតទៅខាងស្ដាំដៃ ជ្រុលទៅបុកបង្គោលភ្លើងថ្មមួយដើមពេញទំហឹង បណ្តាលឲ្យរថយន្តទៅបោកនឹងជញ្ជាំងឃ្លាំងលក់រថយន្ត បណ្តាលឲ្យរងការខូចខាតយ៉ាងដំណំ។ រថយន្តបង្ក រងការខូច ខាតស្ទើរទាំងស្រុង។ បន្ទាប់មកអ្នកបើកបរ និងអ្នករួមដំណើរ បានចុះពីលើរថយន្ត​ ហើយយកស្លាកលេខរថយន្តយកទៅជាមួយ រួចគេចខ្លួនបាត់។

ក្រោយកើតហេតុ សមត្ថកិច្ចមូលដ្ឋាន បានចុះដល់កន្លែងកើតហេតុ បន្ទាប់មកក៏ឃើញម្ចាស់រថយន្ត បានមកកន្លែងកើតហេតុវិញ រួចសមត្ថកិច្ចឲ្យធ្វើការសម្របសម្រួល ជាមួយម្ចាស់ឃ្លាំងលក់រថយន្ត ដើម្បីបញ្ចប់រឿងនៅកន្លែងកើតហេតុ៕

អត្ថបទ៖ សុខា