រថយន្ដធុនធំពីរគ្រឿងបុកគ្នាស្លាប់មនុស្ស២នាក់ និងរបួសម្នាក់

មនុស្ស២នាក់បានស្លាប់ និងម្នាក់រងរបួសស្រាលនៅក្នុងហេតុការណ៍គ្រោះថ្នាក់ចរាចរណ៍​រវាងរថយន្តធន់ធំ២គ្រឿងបុកគ្នា។

ករណីខាងលើនេះបានកើតឡើងនៅវេលាម៉ោង១២និង ៣០នាទីយប់រំលងអាធ្រាត្រ ឈានចូលថ្ងៃទី០៥ ខែមេសា នៅលើផ្លូវជាតិលេខ៥ចន្លោះបង្គោលគីឡូម៉ែត្រ៤៦និង ៤៧នៅភូមិអន្លង់ត្នោត ឃុំលង្វែក ស្រុកកំពង់ត្រឡាច ខេត្តកំពង់ឆ្នាំង។

លោកឧត្តមសេនីយ៍ត្រី កេត យ៉ុង ស្នងការរងនគរបាលខេត្តទទួល បន្ទុកចរាចរណ៍​បានឲ្យដឹងនៅព្រឹកថ្ងៃទី៥ ខែមេសា នេះ​ថា​ ករណីគ្រោះថ្នាក់ចរាចរណ៍ខាងលើនេះបង្កឡើងរវាងរថយន្តម៉ាក HYU NDIA ពណ៌ស ពាក់ផ្លាកលេខ ពោធិ៍សាត់3A-0770 ដឹកលៀសបើកបរពីទិសខាងជើងទៅខាងត្បូង អ្នក បើកបរឈ្មោះ សៀវ ប៉ាវ ភេទប្រុស អាយុ២០ឆ្នាំ ជនជាតិខ្មែរ នៅភូមិពោធិ៍ម្រេះ ឃុំចក ស្រុកបរិបូរណ៍ ខេត្តកំពង់ឆ្នាំង​បានស្លាប់នៅកន្លែងកើតហេតុ និងអ្នករួមដំណើរ២នាក់ ១ឈ្មោះ ជា សុខ ភេទ ប្រុស អាយុ៤៤ឆ្នាំជនជាតិខ្មែរ រស់នៅភូមិ ឆ្នុកទ្រូ ឃុំឆ្នុកទ្រូ ស្រុកបរិបូណ៌ខេត្តកំពង់ឆ្នាំង ស្លាប់នៅកន្លែងកើតហេតុ ។ ៣.ឈ្មោះ ម៉ន សំណាង ភេទ ប្រុស អាយុ៣០ឆ្នាំនៅភូមិទី៤ ឃុំកំពង់លួង ស្រុកក្រគរ ខេត្តពោធិ៍សាត់ បានរងរបួស ស្រាល ។

លោកស្នងការរងនគបាលខេត្តបានអោយដឹងទៀតថា នៅពេលមកដល់ចំណុចកើត​ហេតុ​ខាងលើរថយន្តហ៊ីយ៉ាន់ដាយ បានរេចង្កូតទៅបុកជាមួយរថយន្តម៉ាកHINO ពណ៌ ស.ខៀវ  ពាក់ផ្លាកលេខ ព្រះសីហនុ 3A- 7514 សណ្ដោងរ៉ឺម៉ក ពណ៌ខៀវ ពាក់ផ្លាកលេខ​ព្រះសីហនុ 4A- 3722 ដែលបានបើកបរច្រាស់ទិសគ្នាពីត្បូងទៅជើង អ្នកបើកបរមិន​ស្គាល់​ឈ្មោះ និងបានរត់គេចខ្លួនពីកន្លែងកើតហេតុ ។

សពជនរងគ្រោះទាំង២​នាក់ត្រូវបានសមត្ថកិច្ចនគរបាលចរាចរណ៍ផ្លូវគោកខេត្ត​កំពង់ឆ្នាំង ធ្វើកំណត់ហេតុប្រគល់ជូនទៅក្រុមគ្រួសារដឹកយកទៅលំនៅឋានធ្វើបុណ្យតាមប្រពៃណី  ។ ដោយឡែកអ្នករងរបួសត្រូវបានបញ្ជូនទៅមន្ទីរពេទ្យបង្អែកស្រុកកំពង់ត្រឡាចដើម្បីធ្វើ​ការសង្គ្រោះបន្ទាន់ផងដែរ ។

ចំណែករថយន្តទាំង២ ត្រូវបានសមត្ថកិច្ចនគបាលចរាចបានធ្វើការវាស់វែងនិងស្ទូច​រថយន្តយក​មករក្សាទុកនៅអធិ ការនគរបាលស្រុកកំកំពង់ត្រឡាចរងចាំធ្វើការដោះស្រា យតាមច្បាប់៕

អត្ថបទ៖ ឈៀងថារិទ្ធ