នាយកដ្ឋាននគរបាលចរាចរណ៍និងសណ្តាប់​ធ្នាប់​សាធារណៈ ទទួលបានឧបករណ៍ពិនិត្យសារធា​តុ​ញៀនថ្មីដំបូងសម្រាប់ពិនិត្យលើអ្នកបើកបរ

ក្នុងវគ្គបណ្តុះបណ្តាលស្តីពីបច្ចេកទេសធ្វើតេស្តស្វែងរកសារធាតុញៀនលើអ្នកបើកបររថយន្ត នាយកដ្ឋាននគរបាលចរាចរណ៍​ និងសណ្តាប់ធ្នាប់សាធារណៈ ទទួលបានឧបករណ៍ត្រួតពិនិត្យសាធារតុញៀន (អិលអ៊ីហ្វាយ) ដែលជាសម្ភារៈថ្មីដំបូងសម្រាប់ប្រើប្រាស់ក្នុងការត្រួតពិនិត្យសារធាតុញៀនលើអ្នកបើកបររថយន្ដ។

ឯកឧត្តមនាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ តំណាងដ៏ខ្ពង់ខ្ពស់ឯកឧត្តម នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ បានមានប្រសាសន៍ថា ដោយមានការយកចិត្តទុកដាក់ខ្ពស់ពីថ្នាក់ដឹកនាំក្រសួង ពិសេសសម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានគណៈកម្មា​ធិការជាតិសុវត្ថិភាពចរាចរណ៍ផ្លូវគោក និងឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្រ្តីក្រសួងសាធារណៈការនិងដឹកជញ្ជូន លោកបានផ្ដល់នូវអំណោយជាសម្ភារៈឧបករណ៍ត្រួតពិនិត្យសាធារតុញៀន (អិលអ៊ីហ្វាយ) ដែលជាសម្ភារៈថ្មីដំបូង​សម្រាប់ប្រើប្រាស់ក្នុងការត្រួតពិនិត្យសារធាតុញៀន ដែលបច្ចុប្បន្ននេះជាករណីដែលយើងកំពុងជួបប្រទះ ហើយបង្កនូវគ្រោះថ្នាក់ចរាចរណ៍ជាមួយនឹងមូលហេតុផ្សេងៗទៀត។

វគ្គបណ្ដុះបណ្ដាលដែលរៀបចំឡើងរយៈពេល៣ថ្ងៃ នៅអគ្គស្នងការដ្ឋាននគរបាលជាតិ កាលពីថ្ងៃទី៧ ខែកុម្ភៈ ឆ្នាំ​២០២៣​ មានសិក្ខាកាមចំនួន៦៦រូប មកពីនាយកដ្ឋាននគរបាលចរាចរណ៍និងសណ្តាប់ធ្នាប់សាធារណៈ និងស្នងការដ្ឋាន​នគរបាលរាជធានី ខេត្តទាំង២៥ ទទួលបានការបណ្តុះបណ្តាលលើមេរៀនសំខាន់ៗពីគ្រូជំនាញនៃអង្គភាពមន្ទីរប្រឆាំង​បទល្មើសគ្រឿងញៀន និងអ្នកជំនាញអូស្រ្តាលី រួមមាន ៖
១-ច្បាប់ស្តីពីការត្រួតពិនិត្យគ្រឿងញៀន
២-ឥទ្ធិពលនៃគ្រឿងញៀនចំពោះផ្លូវកាយ និងផ្លូវចិត្ត
៣-ប្រភេទ និងភិនភាគនៃគ្រឿងញៀន
៤-បច្ចេកទេសធ្វើតេស្តស្វែងរកសាធារធាតុញៀនតាមរយៈទឹកមាត់
៥-បច្ចេកទេសធ្វើតេស្តស្វែងរកសារធាតុញៀនតាមរយៈទឹកនោម
៦-ការចុះអនុវត្តជាក់ស្តែងធ្វើតេស្តស្វែងសាធារធាតុញៀនលើអ្នកបើកបរ។

ជាមួយគ្នានេះដែរ ដើម្បីឲ្យអ្នកបើកបរ ឬអ្នកប្រើប្រាស់ផ្លូវមានសុវត្ថិភាពទាំងយានយន្ត និងមនុស្ស ឯកឧត្តមនាយឧត្តមសេនីយ៍​ ហ៊ឹម យ៉ាន បានណែនាំឲ្យនគរបាលចរាចរណ៍ផ្លូវត្រូវមានវិធានការ៥ គឺ៖
ទី១ ផ្សព្វផ្សាយអប់រំ
ទី២ ការរឹតបន្ដឹងច្បាប់ចរាចរណ៍
ទី៣ ផ្លូវថ្នល់ (វិស្វកម្ម)
ទី៤ សង្គ្រោះ និងទី៥/ការលើកទឹកចិត្ត៕

អត្ថបទ៖ សុខុម