មនុស្ស៧នាក់ស្លាប់ក្នុងហេតុការណ៍រថយន្ដធុនធំពីរគ្រឿងបុកគ្នា

យ៉ាងហោចណាស់មនុស្ស៧នាក់បានស្លាប់ក្នុងករណីគ្រោះថ្នាក់ចរាចរណ៍រវាងរថយន្តធំៗ២គ្រឿងបុកគ្នាពេញទំហឹង កាលពីវេលាទាបភ្លឺថ្ងៃទី១៤ ខែមិថុនា ឆ្នាំ២០២៤ ចំណុចលើផ្លូវជាតិលេខ៧១C ស្ថិតក្នុងភូមិព្រះអង្គ ឃុំរកាពប្រាំ ស្រុក/ខេត្តត្បូងឃ្មុំ។

នគរបាលស្រុកត្បូងឃ្មុំបានឲ្យដឹងថា ករណីគ្រោះថ្នាក់ចរាចរណ៍រវាងរថយន្តធន់ធំនេះបង្កឡើងរវាងរថយន្ដម៉ាក​ហុីយ៉ានដាយ ពណ៌ស ពាក់ផ្លាកលេខ កំពង់ធំ 3A-3053 បើកបរដោយឈ្មោះ ឈាង ហ៊ាង ភេទប្រុស អាយុ១៨ឆ្នាំ ជនជាតិខ្មែរ រស់នៅភូមិសំរោង ឃុំទំរីង ស្រុកសណ្តាន់ ខេត្តកំពង់ធំ (របួសធ្ងន់) បានដឹកឈ្មោះ រឿង សារឿន ភេទប្រុស អាយុ២៣ឆ្នាំ ជនជាតិខ្មែរ នៅភូមិឃុំជាមួយគ្នា(របួសធ្ងន់) ។ បង្កជាមួយរថយន្តម៉ាកហុីយ៉ានដាយ ពណ៌ទឹកប្រាក់ ពាក់ផ្លាក់លេខ ត្បូងឃ្មុំ 3A-4487 មិនស្គាល់ឈ្មោះ និងអាស័យដ្ឋានអ្នកបើកបរ (ស្លាប់នៅកន្លែងកើតហេតុ) បើកបរក្នុងទិសដៅបញ្រ្ចាសទិសគ្នា រថយន្ត ពាក់ផ្លាកលេខ កំពង់ធំ បើកបរមកពីជើងទៅត្បូងប្រើប្រាស់ល្បឿនលឿន ទៅបុករថយន្តពាក់ផ្លាកលេខ ត្បូងឃ្មុំ បើកបរមកពីត្បូងទៅជើង។

ក្នុងហេតុការណ៍នេះ បណ្ដាលឲ្យមនុស្សចំនួន៥នាក់ ស្លាប់នៅកន្លែងកើតហេតុ និង២នាក់ទៀតស្លាប់េះពេលបញ្ជូនដល់មន្ទីរពេទ្យ ខណៈរបួសធ្ងន់ម្នាក់។

នគរបានបានបញ្ជាក់ឲ្យដឹងទៀតថា មូលហេតុបណ្ដាលឲ្យកើតហេតុគ្រោះថ្នាក់ចរាចរណ៍នេះ កឺដោយសាររថយន្តបានប្រើប្រាស់ល្បឿនលឿន។ វត្ថុតាងរថយន្តធំៗបង្កការខូចខាតរថយន្ដ២គ្រឿង កម្រិតធ្ងន់ហើយជំនាញគ្រោងអូសយកទៅរក្សាទុកនៅអធិការដ្ឋាននគរបាលស្រុកត្បូងឃ្មុំដើម្បីចាត់ការទៅតាមនីតិវិធី។ ចំណែកសាកសពទាំង៧នាក់ ជំនាញបានប្រគល់ជូនក្រុមគ្រួសារដើម្បីយកទៅធ្វើបុណ្យទៅតាមលក្ខណៈប្រពៃណី៕

អត្ថបទ៖ សាន វិឡែម