មួយឡានស្លាប់៦នាក់ របួសធ្ងន់ម្នាក់ក្នុងហេតុការណ៍​គ្រោះថ្នាក់ចរាចរណ៍រថយន្ដ​ហាយឡែនឌ័របុកជាមួយរថយន្ដកុងតឺន័រ

មនុស្ស៦នាក់បានស្លាប់ក្នុងហេតុការណ៍គ្រោះថ្នាក់ចរាចរណ៍រវាងរថយន្ដហាយឡែនឌ័របុកជាមួយរថយន្ដកុងតឺន័រ ខណៈម្នាក់ទៀតរងរបួសធ្ងន់ធ្ងរកំពុងសង្គ្រោះបន្ទាន់នៅមន្ទីរពេទ្យ។ តាមរបាយការណ៍ជនរងគ្រោះទាំង៧នាក់សុទ្ធសឹងជាក្រុមគ្រួសារសាច់ញាតិនឹងគ្នា។

ហេតុការណ៍គ្រោះថ្នាក់ដ៏រន្ធត់នេះបានកើតឡើងកាលពីព្រលប់ថ្ងៃទី១៧ ខែសីហា ឆ្នាំ២០២៤ នៅផ្លូវជាតិលេខ៤ ម្តុំឃុំទួលទទឹង ក្នុងស្រុកព្រៃនប់ ខេត្តព្រះសីហនុ។ ប្រភពដដែលបន្ថែមថា ភាគីខាងរថយន្ដហាយឡែនឌ័រធ្វើដំណើរទិសដៅពីរាជធានីភំ្នពេញ ឆ្ពោះទៅខេត្តព្រះសីហនុ បើកបរដោយឈ្មោះ អេ សុងហេង ភេទប្រុស អាយុ២៥ឆ្នាំ មុខរបរជាងជួសជុលម៉ូតូ និងមានអ្នករួមដំណើរចំនួន០៦នាក់។ ប្រភពបញ្ជាក់ថា​ អ្នកបើកបរឈ្មោះ អេ សុងហេង បានរងរបួសធ្ងន់ ចំណែកអ្នករួមដំណើរ៥នាក់ស្លាប់នៅកន្លែងកើតហេតុ និងម្នាក់ទៀតស្លាប់ពេលបញ្ជូនដល់មន្ទីរពេទ្យ។ តាមប្រភព ជនរងគ្រោះទាំង៧នាក់ មានទីលំនៅភូមិស្គន់ ឃុំសូទិព្វ ស្រុកជើងព្រៃ ខេត្តកំពង់ចាម។

បន្ទាប់ពីកើតហេតុ កម្លាំងសមត្ថកិច្ចមូលដ្ឋានបានចុះដល់ទីតាំងកើតហេតុដើម្បីវាស់វែងយករថយន្ដទាំងគ្រឿងទៅរក្សាទុកដើម្បីរង់ចាំដោះស្រាយតាមផ្លូវច្បាប់ ចំណែកសពជនរងគ្រោះត្រូវបានសមត្ថកិច្ចទំនាក់ទំនងទៅក្រុមគ្រួសារដើម្បីមកទទួលយកទៅធ្វើបុណ្យតាមប្រពៃណី៕

អត្ថបទ៖ សុខុម