ជនរងគ្រោះម្នាក់អះអាងថាបាត់លុយ១ម៉ឺនដុល្លារដោយសារជនឆ្លៀតឱកាសបន្ទាប់ពីជួបគ្រោះថ្នាក់ចរាចរណ៍

បុរសម្នាក់បន្ទាប់ចេញពីដកលុយធនាគារបានហើយ ក៏ជួបគ្រោះថ្នាក់ចរាចរណ៍ជិះម៉ូតូប៉ះដៃចង្កូតជាមួយម៉ូតូផ្សេងទៀត ដួលខ្ទាតធ្លាក់ចូលប្រឡាយបណ្តាលឱ្យរងរបួសធ្ងន់ ហើយត្រូវជនឆ្លៀតឱកាសបន្លំលូកហោប៉ាវដកយកថង់លុយចំនួន១មុឺនដុល្លារនាំគ្នាគេចខ្លួនបាត់។

ហេតុការណ៍ខាងលើកើតឡើងកាលពីវេលាម៉ោង៧និង៣០នាទីយប់ថ្ងៃទី០៦ ខែកញ្ញា ឆ្នាំ២០២៤ នៅតាមផ្លូវជាតិលេខ៤ ភូមិអូរដឹម សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ​។

ជនរងគ្រោះមានឈ្មោះ សោម រដ្ឋា ភេទប្រុស អាយុ៣២ឆ្នាំ មុខរបរជាថៅកែរថយន្តដឹកដី មានទីលំនៅភូមិកោះម៉ាក់ប្រាំង ឃុំបឹងសាលាខាងជើង ស្រុកកំពង់ត្រាច ខេត្តកំពត ស្នាក់នៅសង្កាត់ក្រាំងធ្នង់ ខណ្ឌសែនសុខ ជនរងគ្រោះបានអះអាងថា ខ្លួនបានបាត់បង់លុយអស់ចំនួន១មុឺនដុល្លារក្នុងហេតុការណ៍នេះ។

តាមប្រភពនៅកន្លែងបានឱ្យដឹងថា មុនកើតហេតុជនរងគ្រោះមកដកលុយនៅធនាគារចំនួន១មុឺនដុល្លារ ថ្លៃដឹកដី ចាក់ដី រួចក៏ជិះម៉ូតូហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ 1DO-9337 ធ្វើដំណើរតាមផ្លូវជាតិលេខ៤ ពីកើតទៅលិច ដល់ចំណុចកើតហេតុ ប៉ះដៃចង្កូតជាមួយម៉ូតូផ្សេងទៀត បណ្ដាលឲ្យដួលខ្ទាតធ្លាក់ចូលក្នុងប្រឡាយ រងរបួសធ្ងន់ ផ្អើលប្រជាពលរដ្ឋជួយស្រង់ឡើងគោក ឆ្លៀតក្នុងឱកាសនោះ មានជនសង្ស័យ២នាក់បានបន្លំលូកហោប៉ាវខោ យកថង់លុយ នាំគ្នាឡើងជិះម៉ូតូគេចខ្លួនទៅបាត់។

បើតាមការបញ្ជាក់ពីជនរងគ្រោះបានឱ្យដឹងថា លុយចំនួន១មុឺនដុល្លារ ថ្លៃចាក់ដី ទើបដកចេញពីធនាគារ ត្រូវបានជនឆ្លៀតឱកាសលួចយកទៅបាត់ ។

ក្រោយកើតហេតុជនរងគ្រោះ ត្រូវបានប្រជាពលរដ្ឋហៅរថយន្តសង្គ្រោះរបស់អង្គភាព៧១១ កងពលតូចលេខ៧០ ដឹកបញ្ជូនទៅមន្ទីរពេទ្យព្រះកុសុមៈ ចំពោះការបាត់បង់លុយយ៉ាងណានោះ សមត្ថកិច្ចចាំទទួលពាក្យបណ្តឹងតាមក្រោយ និងបន្តធ្វើការស្រាវជ្រាវ៕

អត្ថបទ៖ សុខា